Ũhoro wa Ma Ĩndĩ wa Kĩeha Wĩgiĩ Gĩkuũ

TA HŨŨRA mbica ũkĩĩrorera video ĩgiĩ mũndũ mũna ũĩkaine mũno, hihi ta mũini wendete. Video ĩkambĩrĩria mũini ũcio arĩ mwana, akĩĩruta kũina, na ũrĩa eemenyagĩria kũina maita maingĩ. Ĩgacoka ĩkonania mũini ũcio akĩina mbere ya andũ aingĩ, agĩthiĩ mabũrũri-inĩ matiganĩte, nginya akamenyekana thĩ yothe. Thutha wa ihinda inini, ĩkonania matukũ make ma ũkũrũ, na ĩgĩũka kũrĩkĩrĩra agakua.

Video ĩyo ti ya gwĩcirĩrio, no ĩronania ũtũũro wa mũndũ ũrarĩ muoyo no rĩu ndarĩ muoyo. Gũtekũmakania kana mũndũ ũcio nĩ mũini, mũthomi wa sayansi, mũthaaki, kana mũndũ ũngĩ ũĩkaine mũno, rũgano rũu rũngĩarĩkĩrĩra o ũguo. No kũhoteke mũndũ ũcio nĩ ahingĩtie maũndũ maingĩ, no ta wĩcirie maũndũ mangĩ marĩa angĩahingirie korũo ndaakũrire na agĩkua?

Mũndũ no aigue kĩeha eciria ũhoro ũcio, ĩndĩ ũguo noguo gũgaathiĩ harĩ ithuothe. (Kohelethu 9:5) O na tũngĩĩrutanĩria atĩa, no mũhaka tũkũre na tũkue. Ningĩ rĩmwe mũndũ no akue nĩ ũndũ wa gũkorũo nĩ ũndũ ũterĩgĩrĩirũo kana ndwari. O ta ũrĩa Bibilia ĩtaarĩirie, tũhaana o ta kĩbii kĩa rũcinĩ kĩrĩa “gĩũkaga o kahinda kanini gĩgacoka gĩgathira.”—Jakubu 4:14.

Nĩ ũndũ wa gũkorũo no tũkue hĩndĩ o yothe, andũ amwe moigaga, “nĩ tũkĩrĩei na tũnyue, tondũ rũciũ nĩ tũgaakua.” (1 Akorintho 15:32) Andũ mekaga ũguo tondũ nĩ moĩ atĩ no makue hĩndĩ o yothe na matirĩ na kĩĩrĩgĩrĩro kĩa mahinda marĩa maroka. Hĩndĩ ĩmwe ũtũũro-inĩ makĩria rĩrĩa mũndũ aragerera ũndũ mũritũ no eyũrie, ‘Hihi ũtũũro no ũyũ tu?’ Macokio mangĩoneka kũ?

Andũ aingĩ meciragia atĩ athomi a sayansi nĩo mangĩkorũo na macokio. Athomi a sayansi na mandagĩtarĩ nĩ mathondekete indo iteithagia andũ maikare mĩaka mĩingaingĩ. Na athomi amwe a sayansi no marerutanĩria gũthondeka indo ingĩtũma andũ maikare mĩaka mĩingĩ makĩria. O ũrĩa moimĩrĩro ma wĩra wao marĩkorũo mahaana, kĩũria nĩ gĩkĩ: Nĩ kĩĩ gĩtũmaga tũkũre na tũkue? Hihi hena kĩĩrĩgĩrĩro atĩ kwĩ hingo thũ ĩyo itũ gĩkuũ ĩgaatoorio? Icunjĩ iria irũmĩrĩire nĩ ciarĩrĩirie maũndũ macio na igacokia kĩũria gĩkĩ, Hihi ũtũũro no ũyũ tu?