Iririkania cia Kĩrũrũngano Kĩa Ngʼongo—2012

◼ Thaa cia Tabarĩra: Tabarĩra ĩkaambĩrĩria thaa 3:20 rũcinĩ mĩthenya yothe ĩtatũ. Kwanĩrĩrũo atĩ tũrwĩmbo twa kĩnanda nĩ tũkwambĩrĩria, ithuothe twagĩrĩirũo gũikara thĩ nĩguo tabarĩra yambĩrĩrie na njĩra ĩrĩ na gĩtĩo na mũbango. Mũthenya wa Njumaa na Njuuma tabarĩra ĩgaathira thaa 10:55 hwaĩ-inĩ, naguo Kiumia ĩgaathira thaa 9:40 hwaĩ-inĩ.

◼ Ngari: Kũrĩa guothe tũgekĩra irũrũngano, nĩ gũgaakorũo na kũndũ gwa kũiga ngari hatarĩ marĩhi, mũndũ akaaheagwo ha kũiga ngari kũringana na thaa iria akinya.

◼ Kũiga Itĩ: No ũigĩre itĩ andũ arĩa tu maraikara gwaku mũciĩ, arĩa mũrathiĩ nao ngari-inĩ yaku, kana arutwo a Bibilia arĩa ũthomaga nao.—1 Kor. 13:5.

◼ Irio cia Mĩaraho: Ũkũũrio ũgaakuua irio handũ ha gũgathiĩ gũcaria irio nja ya kũrĩa kĩrũrũngano gĩgeekĩrũo. No ũkuue irio na kĩndũ gĩtarĩ kĩnene kĩrĩa kĩngĩiganĩra rungu rwa gĩtĩ. Tũtiĩtĩkĩrĩtio gũkuua indo nene mũno cia irio kana indo cia ngirathi kĩrũrũngano-inĩ.

◼ Mĩhothi: Twĩ kĩrũrũngano-inĩ, no tuonanie ngatho citũ nĩ ũndũ wa mĩbango ya kĩrũrũngano na njĩra ya kũruta mĩhothi ya kwĩyendera nĩ ũndũ wa wĩra wa thĩ yothe. Ceki o yothe yagĩrĩire kwandĩkwo ĩrĩhwo kũrĩ “International Bible Students Association.” Kana kũrĩ rũhonge rũrĩa rwagĩrĩire kũringana na watho bũrũri-inĩ wanyu.

◼ Aksidenti na Maũndũ Materĩgĩrĩirũo: Kũngiumĩra ũndũ wa hi na hi ũrabatara ũrigitani kĩrũrũngano-inĩ, menyithia ũmwe wa anyitani-ũgeni ũrĩa ũrĩ hakuhĩ, ũrĩa ũkũmenyithia rũhonge rwa Ũteithio wa Mbere o na ihenya nĩguo mũndũ wĩ na ũũgĩ wĩgiĩ ũrigitani wa mbere arore ũritũ wa thĩna ũcio na aheane ũteithio. Angĩkorũo nĩ gũkũbatarania, arĩa marĩ rũhonge-inĩ rwa ũteithio wa mbere nĩ megwĩta ngari ya gũkuua arũaru. Ũndũ ũcio no ũteithie nĩguo arĩa metagwo rĩrĩa kuoimĩra ũndũ wa hi na hi matikahũrĩrũo thimũ nĩ andũ aingĩ.

◼ Ũrigitani: Angĩkorũo nĩ kũrĩ ndawa wandĩkĩirũo nĩ ndagĩtarĩ, ndũkanariganĩrũo gũkuua cia kũigana, tondũ gũtigakorũo na ndawa icio kĩrũrũngano-inĩ. Cindano na indo iria ihũthĩrĩtwo gwĩtheca nĩ ũndũ wa mũrimũ wa cukari ciagĩrĩire gũteo harĩa hagĩrĩire no ti mabuba-inĩ ma gĩko kĩrũrũngano-inĩ na hoteli-inĩ.

◼ Iratũ: O mwaka nĩ kuonekaga nguraro ciigana ũna iria ciumanaga na iratũ. Nĩ wega gwĩkĩra iratũ njega, irakũigana wega nĩguo ndũgakorũo na thĩna ũkĩambata tũcĩra-inĩ, ngathĩ-inĩ, na kũndũ kũngĩ ta kũu.

◼ Maguta na Maraci: Irũrũngano nyingĩ ciĩkagĩrũo nyũmba itakoragwo na huhĩrio cia kũingĩria rĩera rĩingĩ. Nĩ ũndũ ũcio-rĩ, no ũkorũo ũrĩ ũndũ wa wendo kũhũthĩra maguta kana maraci matarĩ na mũtararĩko mũnene ũrĩa ũngĩtũma arĩa makoragwo na mathĩna makonainie na kũhuhia mathĩnĩke.—1 Kor. 10:24.

◼ Bomu cia Tafadhali Fuatia Upendezi (S-43): Bomu ya Tafadhali Fuatia Upendezi yagĩrĩirũo kũhũthĩrũo kũheana ũhoro wĩgiĩ mũndũ o wothe ũhunjĩirio hĩndĩ ya kĩrũrũngano na akonania gũkenio nĩ ũhoro ũcio. Ahunjia magĩthiĩ kĩrũrũngano magĩrĩirũo gũkuua bomu ĩmwe kana igĩrĩ. Thutha wa kũmĩiyũria, bomu ĩyo no ĩneanwo rũhonge-inĩ rwa Nyũmba ya Mabuku kana wacoka kĩũngano-inĩ ũnengere mwandĩki wa kĩũngano kĩanyu.—Rora Ũtungata Witũ wa Ũthamaki wa Mĩĩ 2011, karatathi ga 3.

◼ Mĩkawa: Goocithia rĩĩtwa rĩa Jehova na njĩra ya mĩthiĩre yaku mĩega ũrĩ mĩkawa-inĩ. Tigĩra aruti wĩra kĩndũ kĩnini nĩ ũndũ wa ũtungata wao angĩkorũo kwanyu nĩ gwĩkagwo ũguo.

◼ Hoteli:

(1) Ũkũũrio ndũkaigithie rumu makĩria ma iria ũkũhũthĩra, na thĩinĩ wa rumu ĩyo mũtigaikare mũrĩ aingĩ makĩria ma ũrĩa gwĩtĩkĩrĩtio.

(2) Ndũgakanje mĩbango ya kũrĩa ũgaakoma tiga o kumĩrire ũndũ ũterĩgĩrĩirũo, na ũmenyithie arũgamĩrĩri a hoteli na ihenya o ũrĩa kũngĩhoteka.—Mat. 5:37.

(3) Ririkana atĩ angĩkorũo ũrahũthĩra kadi ya mbeca ũkĩĩyandĩkithia hoteli-inĩ, hoteli imwe nĩ irĩ hũthĩra wa “gũtinia” mbeca nyingĩ makĩria cia kũrĩhĩra rumu hamwe na indo iria ũngĩthũkia na maũndũ mangĩ. Ndũngĩhũthĩra mbeca icio nginya rĩrĩa makarĩkia kũrutithania mahũthĩro maku matukũ manini thutha waku kuuma kuo.

(4) Hũthĩra gakari ga gũkuua mĩrigo o rĩrĩa ũrakabatara, na ũgacokie na narua warĩkia nĩguo andũ arĩa angĩ o nao no makahũthĩre.

(5) Tigĩra aruti wĩra a hoteli kĩndũ kĩnini magũkuuĩra mĩrigo, na ũtigagĩre ũrĩa ũgũthondekagĩra rumu kĩndũ kĩnini.

(6) Rugagĩra tu rumu-inĩ iria ciĩtĩkĩrĩtio.

(7) Ndũkahũthĩre ũũru indo iria iheanagwo hoteli-inĩ, ta irio cia rũcinĩ, kahũa, kana indo cia mbarabu.

(8) Onania maciaro ma roho harĩ aruti wĩra a hoteli. Maratungatĩra ageni aingĩ na no makene mũno tũngĩonania ũtugi, ũkirĩrĩria, na gũthikĩrĩria ihooto.

(9) Aciari magĩrĩirũo kũrora ciana ciao mahinda mothe rĩrĩa marĩ hoteli-inĩ, hamwe na kũndũ gwa gũtubĩra, tũcĩra-inĩ, na kũndũ kũngĩ.

(10) Kũngiumĩra mathĩna megiĩ rumu yaku ya hoteli, menyithia Rũhonge rwa Handũ ha Gũkoma kĩrũrũngano-inĩ nĩguo ũteithio.

◼ Ũtungata wa Kwĩrutĩra: Mũndũ o wothe ũngĩenda gũteithĩrĩria no athiĩ Rũhonge-inĩ rwa Ũtungata wa Kwĩrutĩra kĩrũrũngano-inĩ. Ciana iria itakĩrĩtie mĩaka 16 no iteithĩrĩrie kũruta wĩra igĩtongorio nĩ mũciari kana mũndũ ũngĩ mũgima wĩtĩkĩrĩtio nĩ mũciari wa cio.