Ithandũkũ rĩa Kĩũria

◼ Twagĩrĩirũo gwĩka atĩa angĩkorũo no twende indo citũ imwe kana ciothe igaatuĩka cia ithondeka rĩa Jehova twakua?

Andũ makua, maticokaga gũkorũo na uuge igũrũ rĩgiĩ indo ciao cia kĩĩmwĩrĩ. (Koh. 9:5, 6) Nĩ ũndũ ũcio, andũ aingĩ nĩ mandĩkaga marũa ma kwĩgaya magĩtaarĩria ũrĩa mangĩenda indo ciao ikaagayanio. (2 Ath. 20:1) Marũa macio ma kĩĩwatho ningĩ nĩ monanagia mũndũ ũrĩa ũngĩenda agaatuĩka mũramati kana mũmenyereri wa indo ciaku. Mũndũ angĩkorũo atandĩkĩte marũa macio, thĩinĩ wa mabũrũri maingĩ, thirikari nĩyo ĩtuaga ũrĩa indo cia mũtigairĩ ikũgaywo. Kwoguo-rĩ, angĩkorũo tũrĩ na muoroto mũna wĩgiĩ indo citũ, ta imwe kana ciothe gũgaatuĩka cia ithondeka rĩa Jehova-rĩ, harĩ bata twandĩke marũa kũringana na watho ma kuuga ũguo na tũthuure wega mũndũ ũrĩa ũgaatuĩka mũramati kana mũmenyereri wa indo icio.

Mũramati kana mũmenyereri akoragwo na wĩra mũritũ. Kũringana na mũigana wa indo, gũcicokanĩrĩria na gũcigayania no gũkorũo na maũndũ maingĩ na kũhũthĩre mahinda maingĩ. Makĩria ma ũguo, kaingĩ thirikari nĩ ĩkoragwo na mawatho arĩ o mũhaka marũmĩrĩrũo. Gũkorũo mũndũ arĩ thĩinĩ wa kĩũngano-rĩ, ti kuuga atĩ no atuĩke mũramati kana mũmenyereri mwega. Twagĩrĩirũo gũthuura mũndũ tũĩ arĩ na ũhoti, mwĩhokeku, na mũndũ wĩhaarĩirie kũrũmĩrĩra wendi witũ.—Rora gĩcunjĩ “Hekima na Manufaa za Kupanga Urithi wa Mali,” ngathĩti-inĩ ya Amkeni! ya Dicemba 8, 1998.

Ũngĩũrio Ũtuĩke Mũramati Kana Mũmenyereri: Ũngĩũrio kana no wĩtĩkĩre gũtuĩka mũramati kana mũmenyereri wa indo cia mũndũ thutha wa gĩkuũ gĩake-rĩ, tigĩrĩra atĩ nĩ wamba gũtara ngarama na wĩcirie na njĩra ya mahoya kana nĩ ũkũhota kũhingia wĩra ũcio. (Luka 14:28-32) Thutha wa gĩkuũ kĩa mũndũ ũcio, nĩ ũkũbatara kũmenyithia agai othe arĩa mandĩkĩtwo marũa-inĩ make ma kwĩgaya. Warĩkia gwĩtĩkĩrio nĩ watho gwĩka ũguo, nĩ wĩra waku kũgayania indo icio kũringana na watho na kũringana biũ na ũrĩa handĩkĩtwo marũa-inĩ macio. Mũramati kana mũmenyereri wa indo icio agĩrĩirũo kũmenya atĩ o na angĩkorũo indo icio nĩ nyingĩ kana ti nyingĩ, ndarĩ na wĩyathi wa kũgarũra wendi wa mwene. Indo iria ciandĩkĩtwo atĩ nĩ iheanĩtwo kũrĩ rũhonge o ruothe rwa kĩĩwatho rũhũthagĩrũo nĩ Aira a Jehova nĩ mĩhothi mĩamũre ya ithondeka rĩa Jehova.—Luka 16:10; 21:1-4.