Mabuku Marĩa Magwetetwo Thĩinĩ wa “Kabuku ka Mũcemanio wa Ũtũũro na Ũtungata”

Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata

JANŨARĨ 6-12

MŨTHITHŨ KUUMA KIUGO-INĨ KĨA NGAI THABURI 127-134

Kũmaatha Maũndũ ma Bata Maandĩko-inĩ

it-1 543

Mĩmera Ĩrĩa Ĩgwetetwo Bibilia-inĩ

Mwandĩki wa Thaburi aaragĩrĩria maũndũ mamwe megiĩ mũtĩ wa mũtamaiyũ rĩrĩa aaugire ũũ igũrũ rĩgiĩ andũ arĩa metigĩrĩte Jehova: “Ariũ aku [magaakorũo] matariĩ ta thuuna cia mũtĩ wa mũtamaiyũ gũthiũrũrũkĩria metha yaku.” (Thb 128:1-3) Kaingĩ thuuna iria itinĩtio kuuma harĩ mũtĩ mũgima wa mũtamaiyũ nĩcio ihandagwo nĩguo kũgĩe mĩtĩ ĩngĩ. Hamwe na ũguo, mĩtĩ mĩkũrũ ya mĩtamaiyũ no ĩrute thuuna kuuma mĩri-inĩ, na njĩra ĩyo mĩtĩ ĩyo ĩgatherema. O ta thuuna icio, ariũ nĩ mangĩathiũrũrũkĩirie baba wao, ũndũ ũrĩa warehaga gĩkeno famĩlĩ-inĩ.

JANŨARĨ 13-19

MŨTHITHŨ KUUMA KIUGO-INĨ KĨA NGAI THABURI 135-137

“Mwathani Witũ nĩ Mũnene Gũkĩra Ngai Iria Ingĩ Ciothe”

it-2 661 kĩb. 4-5

Hinya, Mawĩko ma Hinya

Ũhoti wa Ngai wa gwatha mahinya ma ndũire nĩ wa mwanya. Nĩgetha Jehova onanie atĩ nĩwe Ngai ũrĩa wa ma, no erĩgĩrĩrũo onanie atĩ arĩ na wathani igũrũ rĩa mahinya ma ndũire, na eke ũguo na njĩra ĩkuonania ũrĩa rĩĩtwa rĩake riugĩte. (Thb 135:5, 6) Tondũ riũa, mweri, thĩ ingĩ, na njata ithiagĩra njĩra iria imenyerete, mahinya marĩa matũmaga kũgĩe rũhuho, mbura, na maũndũ mangĩ marũmagĩrĩra mawatho marĩa mamatongoragia, na ngigĩ na nyoni nĩ ithaamaga, maũndũ macio no moneke ta marĩ ma kawainda na no mage gũtheria rĩĩtwa rĩa Ngai rĩrĩa kwaumĩra ũkararia na ũthathaiya wa maheeni.

O na kũrĩ ũguo, Jehova Ngai no ahũthĩre ũũmbi na mahinya ma ndũire kuonania Ũngai wake na njĩra ya gũcihũthĩra gwĩka maũndũ matarĩ ma kawainda, ihinda-inĩ rĩrĩa we angĩtua. O na rĩrĩa maũndũ ta ngʼaragu, mbura nene, kana maũndũ mangĩ ta macio moonagwo marĩ ma kawainda, mangĩekĩkire nĩguo ũrathi wa Jehova ũhinge, ũndũ ũcio watũmaga makorũo marĩ ma mwanya. (Ringithania 1Ath 17:1; 18:1, 2, 41-45.) No kaingĩ maũndũ macio maakoragwo marĩ ma mwanya nĩ ũndũ wa gwĩkĩka na gĩkĩro kĩnene (Tham 9:24) kana gwĩkĩka na njĩra ĩtaarĩ ya kawainda na ĩtaaiguĩkĩte rĩngĩ mbere ĩyo, kana gwĩkĩka ihinda andũ mataamenyerete.—Tham 34:10; 1Sa 12:16-18.

Kũmaatha Maũndũ ma Bata Maandĩko-inĩ

it-1 1248

Kaingĩ kiugo Ja kĩhũthagĩrũo ciugo-inĩ irario kuuma ngoro cia kũgooca na nyĩmbo-inĩ, mahoya-inĩ, na mathaithana. Kũndũ kũingĩ kũrĩa kĩonekaga nĩ kũrĩa ũndũ ũrĩa ũrarĩrĩrio wonanagia gĩkeno nĩ ũndũ wa ũhootani na ũhonokio, kana kũrĩa kũronania hinya wa guoko kwa Ngai na ũhoti wake. Ngerekano cia ũrĩa kĩhũthĩrĩtwo na njĩra ĩyo ya mwanya nĩ nyingĩ. Ciugo “Goocai Ja!” ihũthĩrĩtwo irĩ cia kũgooca Ngai thĩinĩ wa ibuku rĩa Thaburi, na riita rĩa mbere harĩa igwetetwo nĩ thĩinĩ wa Thaburi 104:35. Thaburi-inĩ ingĩ ciugo icio cionekaga kĩambĩrĩria-inĩ tu (Thb 111, 112), ingĩ gatagatĩ-inĩ (Thb 135:3), na ingĩ mũico-inĩ tu (Thb 104; 105; 115-117), no kũingĩ cionekaga kĩambĩrĩria-inĩ na mũico-inĩ. (Thb 106; 113; 135; 146-150). Thĩinĩ wa ibuku rĩa Kũguũrĩrio, ciũmbe cia igũrũ nĩ igwetete ciugo icio maita maigana ũna ikĩgooca Jehova.—Kũg 19:1-6.

Kũndũ kũu kũngĩ kũrĩa kiugo “Ja” kĩgwetetwo nĩ ciugo-inĩ cia kũgooca Jehova nyĩmbo-inĩ na mahoya-inĩ. Kwa ngerekano, rwĩmbo-inĩ rwa ũhonokio rũrĩa rwainirũo nĩ Musa. (Tham 15:2) Isaia aahũthĩrire ciugo “Ja, o we Jehova” ĩrĩ njĩra ya gũtĩtĩrithia rĩĩtwa rĩa Ngai maita merĩ. (Isa 12:2; 26:4) Thutha wa Hezekia kũhonio na njĩra ya kĩama rĩrĩa aakuhĩrĩirie gũkua, nĩ aagwetire ciugo cioonanirie gĩkeno kĩrĩa aarĩ nakĩo, na agĩcokera kiugo Ja. (Isa 38:9, 11) Thaburi imwe nĩ cionanagia ngũrani gatagatĩ ka andũ akuũ, arĩa matangĩhota kũgooca Ja, na arĩa matuĩte itua rĩa kũmũgooca ũtũũro-inĩ wao. (Thb 115:17, 18; 118:17-19) Nacio ingĩ nĩ cionanagia ngatho nĩ ũndũ wa ũhonokio, ũgitĩri, na kũrũngwo nĩ Jehova.—Thb 94:12; 118:5, 14.

JANŨARĨ 20-26

MŨTHITHŨ KUUMA KIUGO-INĨ KĨA NGAI THABURI 138-139

Kũmaatha Maũndũ ma Bata Maandĩko-inĩ

it-1 862 kĩb. 4

Kuohanĩra

Makĩria ma ũguo, kuohera andũ arĩa matũhĩtĩirie, gũtekũmakania nĩ maita maigana, nĩ ũndũ Mũkristiano erĩgagĩrĩrũo eke. (Lu 17:3, 4; Ef 4:32; Kol 3:13) Ngai ndohagĩra andũ arĩa maregaga kuohera arĩa angĩ. (Mat 6:14, 15) No o na ‘mũndũ mwaganu’ angĩeherio kĩũngano-inĩ nĩ ũndũ wa gwĩka mehia maritũ, no oherũo thutha wa ihinda angĩonania atĩ nĩ erirĩte biũ. Hĩndĩ ĩyo andũ othe thĩinĩ wa kĩũngano no mamuonie atĩ nĩ mamwendete. (1Ko 5:13; 2Ko 2:6-11) No Akristiano matiĩrĩgagĩrĩrũo mohere andũ arĩa mekaga mehia makĩendaga na matirerira. Andũ ta acio matuĩkaga thũ cia Ngai.—Ahi 10:26-31; Thb 139:21, 22.

JANŨARĨ 27–FEBRUARĨ 2

MŨTHITHŨ KUUMA KIUGO-INĨ KĨA NGAI THABURI 140–143

Ĩka Kũringana na Mahoya Maku ma Kũhoya Ũteithio

w10 3/15 32 kĩb. 4

Tũũria “Ngoro Theru” Mahinda-inĩ Maya ma Ũgwati

Kũhatĩkwo nĩ andũ arĩa matũkararagia, moritũ ma kĩĩmbeca, na ndwari nene nĩ maũndũ matũmaga ndungata imwe cia Jehova ihinyĩrĩrĩke. Rĩmwe no maigue makuĩte ngoro mũno. O na Mũthamaki Daudi nĩ aageragĩra maũndũ ta macio. Augire ũũ: “Hinya wakwa nĩ gũthira ũrathira; ngoro yakwa nĩ ĩgandĩte thĩinĩ wakwa.” (Thab. 143:4) Nĩ kĩĩ kĩamũteithagia kũhiũrania na maũndũ macio? Daudi nĩ eecũranagia ũrĩa Ngai aarũmbũyagia ndungata ciake na ũrĩa we mwene aahonoketio. Nĩ eecũranagia maũndũ marĩa Jehova eekĩte nĩ ũndũ wa rĩĩtwa rĩake inene. Aigaga meciria make harĩ kũruta wĩra wa Ngai. (Thab. 143:5) O ũndũ ũmwe na ũcio, gwĩcũrania ũhoro wa Mũũmbi witũ na maũndũ marĩa mothe ekĩte na arathiĩ na mbere gũtwĩkĩra no gũtũteithie rĩrĩa tũragerera moritũ.

Kũmaatha Maũndũ ma Bata Maandĩko-inĩ

it-2 1151

Thumu

Ũrĩa Kĩhũthĩrĩtwo na Njĩra ya Mũhaano. Ciugo cia andũ aganu arĩa maheenanagia, magacambania, na magathũkĩria andũ arĩa angĩ rĩĩtwa, ciringithanĩtio na thumu mũũru wa nyoka. (Thb 58:3, 4) Bibilia ĩkĩaria ũhoro wa andũ arĩa macambanagia, yugaga atĩ “mĩromo yao ĩkoragwo na thumu wa nyoka,” o ta ũrĩa thumu wa nyoka ũkoragwo mĩromo-inĩ, na mwena wa igũrũ wa rũthĩa rwayo. (Thb 140:3; Ro 3:13) Rũrĩmĩ rũngĩhũthĩrũo gũcambania, gũthũkĩria andũ arĩa angĩ rĩĩtwa, kũrutana maheeni, kana kwaria mĩario ĩngĩ ta ĩyo mĩũru, no rũĩrwo “rũiyũire thumu wa kũũragana.”—Jak 3:8.

FEBRUARĨ 17-23

MŨTHITHŨ KUUMA KIUGO-INĨ KĨA NGAI THIMO 1

Andũ Ethĩ—Nũũ Mũrĩthikagĩrĩria?

w05 2/15 19-20 kĩb. 11-12

Kũgitĩra Rũũri Rwitũ rwa Gĩkristiano

¹¹ Wĩrutanagĩrie gũkenia Ngai, no ti andũ. Nĩ ũndũ wa ndũire mũndũ kwenda kwĩmenyithania nĩ wa gĩkundi kĩna. Ithuothe nĩ twendete kũgĩa na arata, na rĩrĩa twetĩkĩrĩka harĩ o nĩ tũiguaga wega. Rĩrĩa mũndũ arĩ tinĩnja, o na thutha ũtũũro-inĩ, hatĩka cia riika no ikorũo na ũgucania mũnene harĩ we, nginya akenda kwĩgerekania na andũ kana kũmakenia. No arata na andũ a riika ritũ ti hingo ciothe matwendagĩra maũndũ mega. Rĩmwe mendaga o andũ a kũnyitanĩra nao magĩka maũndũ moru. (Thimo 1:11-19) Mũkristiano angĩtĩkĩra kũhatĩkwo nĩ riika, akoragwo akĩĩhitha ũrĩa atariĩ. (Thaburi 26:4) Mũtũmwo Paulo aheanire mũkaana ũyũ: ‘Tigai kwĩgerekanagia na mũtabarĩre ũyũ wa maũndũ.’ (Aroma 12:2) Jehova nĩ atũheaga hinya ũrĩa tũrabatara nĩguo tũhote kũhiũrania na hatĩka o ciothe tũngĩcemania nacio.—Ahibirania 13:6.

¹² Rĩrĩa twahatĩkwo tũthũkie rũũri rwitũ rwa Gĩkristiano, nĩ wega kũririkana atĩ wĩhokeku witũ harĩ Ngai, nĩguo ũndũ ũrĩa wa bata gũkĩra mawoni ma andũ. Ũtaaro wa Thama 23:2 no ũtũteithie. Yugaga: “Ndũkanarũmanĩrĩre na mũingĩ gwĩka ũũru.” Rĩrĩa Aisiraeli aingĩ meekĩrĩire nganja ũhoti wa Jehova wa kũhingia ciĩranĩro ciake, Kalebu arĩ na ũmĩrĩru nĩ aaregire kũrũmanĩrĩra na mũingĩ. Aarĩ na ma atĩ ciĩranĩro cia Ngai nĩ cia kwĩhokeka, na nĩ aarathimirũo mũno nĩ ũndũ wa mũrũgamo wake. (Ndari 13:30; Joshua 14:6-11) Hihi o nawe nĩ wĩhaarĩirie kũregana na hatĩka cia andũ nĩguo ũgitĩre ũrata waku na Ngai?

Kũmaatha Maũndũ ma Bata Maandĩko-inĩ

it-1 846

Kĩrimũ

Handũ ha kuonania mũndũ ũrĩ na thĩna wa meciria, kiugo “kĩrimũ” ta ũrĩa kĩhũthĩrĩtwo thĩinĩ wa Bibilia, kĩonanagia mũndũ ũregaga kũhũthĩra ihooto na wĩkaga maũndũ ma waganu marĩa mataratwarana na ithimi cia Ngai cia ũthingu. Ciugo cia Kĩhibirania iria itaaragĩria mũndũ ta ũcio nĩ kesilʹ, ʼewilʹ, na·valʹ (‘kĩrimũʼ; Thi 1:22; 12:15; 17:7), na lets (“mũndũ wa kĩnyũrũri”; Thi 13:1). Kiugo gĩa Kĩngiriki aʹphron kĩonanagia “kĩrimũ” (Lu 12:20), a·noʹe·tos gĩkonanaia mũndũ ‘ũtarĩ wĩcirio’(Ga 3:1), na mo·rosʹ gĩkonania andũ “irimũ” kana “akĩgu” (Mat 23:17; 25:2).

FEBRUARĨ 24–MACHI 2

Kũmaatha Maũndũ ma Bata Maandĩko-inĩ

it-1 1211 kĩb. 4

Wĩkindĩru

Gũtũũra mũtũũrĩre wa wĩkindĩru nĩ ũndũ ũngĩhoteka, no ti kũgerera hinya witũ ithuĩ ene, no nĩ kũgerera wĩtĩkio mũrũmu na kwĩhoka Jehova na hinya wake wa kũhonokania. (Thb 25:21) Ngai eranĩire atĩ arĩkoragwo arĩ “ngo” na “mwĩgitio,” na nĩ arĩgitagĩra njĩra ya arĩa mathiaga na wĩkindĩru. (Thi 2:6-8; 10:29; Thb 41:12) Tondũ nĩ meciragia mũno ũrĩa mangĩtĩkĩrĩka harĩ Jehova, nĩ makoragwo na ũtũũro mwega, ũrĩa ũmahotithagia gũkinyĩra mĩoroto yao. (Thb 26:1-3; Thi 11:5; 28:18) O ta ũrĩa Ayubu eeyoneire, mũndũ ũtarĩ ũcuke no athĩnĩke nĩ ũndũ wathani wa andũ arĩa aganu na akue hamwe nao. No Jehova eranĩire atĩ nĩ amenyaga maũndũ marĩa mũndũ ũcio acemanagia namo, na akeranĩra atĩ igai rĩake rĩgaatũũra tene na tene. Ũtũũro wake wa mahinda mokĩte ũgaakorũo ũrĩ wa thayũ, na nĩ akaagaya maũndũ mega. (Ayu 9:20-22; Thb 37:18, 19, 37; 84:11; Thi 28:10) O ta ũrĩa kwarĩ harĩ Ayubu, mũndũ gũkorũo arĩ na wĩkindĩru nĩkuo gũtũmaga akorũo arĩ wa bata na aheo gĩtĩo, no ti ũtonga. (Thi 19:1; 28:6) Ciana iria ikoragwo na mũciari ta ũcio nĩ ikenaga (Thi 20:7), ikagĩa na igweta nĩ ũndũ wa kĩonereria kĩega gĩa ithe, ĩgakena gwĩtanio nake na kũheo gĩtĩo.