Mũthia Ũgooka Rĩ? Ũrĩa Jesu Aaugire

TA WĨCIRIE MAŨNDŨ MERĨ JESU AAUGIRE MEGIĨ MŨTHIA:

“Nĩ ũndũ ũcio, ikaragai mwĩhũgĩte, nĩ gũkorũo mũtiũĩ mũthenya kana thaa.”—MATHAYO 25:13.

“Ikaragai mwĩhũgĩte na mwĩiguĩte, tondũ mũtiũĩ ihinda rĩrĩa rĩtuĩtwo nĩ rĩrĩkũ.”—MARIKO 13:33.

Gũtirĩ mũndũ o ũmwe thĩinĩ wa thĩ ũĩ rĩrĩa mũthia ũgaakinya. O na kũrĩ ũguo, Ngai nĩ atuĩte “mũthenya” na “thaa” rĩrĩa mũthia ũgooka. (Mathayo 24:36) Hihi ũguo nĩ kuuga atĩ gũtirĩ ũndũ tũngĩmenya atĩ mũthia nĩ ũkuhĩrĩirie? Aca. Jesu nĩ eerire arutwo ake maũndũ maigana ũna mangĩgekĩka marĩa mangĩkonania atĩ mũthia ũrĩ hakuhĩ.

MAŨNDŨ MARĨA JESU AAUGIRE MANGĨGEKĨKA

Maũndũ macio mangĩgekĩka nĩmo mangĩgaakorũo marĩ kĩmenyithia kĩa “ithirĩro rĩa mũtabarĩre wa maũndũ.” Jesu aaugire ũũ: “Rũrĩrĩ nĩ rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ, na nĩ gũkaagĩa ngʼaragu na ithingithia kũndũ na kũndũ.” (Mathayo 24:3, 7) Ningĩ aaugire atĩ nĩ kũngĩgaakorũo na “mĩrimũ mĩũru.” (Luka 21:11) Hihi nĩ ũrona maũndũ macio Jesu aarathĩte ta marahinga?

Matukũ-inĩ maya maitũ gũkoretwo na mbaara nyingĩ, ngʼaragu, ithingithia, na mĩrimũ ĩtiganĩte. Kwa ngerekano, mwaka wa 2004, gĩthingithia kĩnene kĩrĩa kĩaumĩrire Indian Ocean nĩ gĩatũmire kũgĩe na tsunami ĩrĩa yoragire andũ ta 225,000. Na ihinda-inĩ rĩa mĩaka ĩtatũ, mũrimũ wa Korona woragire andũ ta milioni 6.9 thĩinĩ wa thĩ yothe. Jesu aaugire atĩ maũndũ ta macio mangĩkonania atĩ mũthia wa thĩ ĩno njũru ũrĩ hakuhĩ.

‘MATUKŨ MA KŨRIGĨRĨRIA’

Kũringana na Bibilia, ihinda inini mbere ya mũico gũkinya rĩtagwo ‘matukũ ma kũrigĩrĩria.’ (2 Petero 3:3, 4) Rĩandĩko rĩa 2 Timotheo 3:1-5 rĩonanagia atĩ mĩtugo ya andũ nĩ ĩngĩgaathũka mũno matukũ-inĩ ma kũrigĩrĩria. (Rora gathandũkũ “Ihinda Inini Mbere ya Mũico wa Thĩ.”) Hihi nĩ wĩyoneire andũ marĩ na mwĩyendo, akoroku, mendete ngũĩ, na matarĩ na wendo? Ũcio nĩ ũira ũngĩ ũronania atĩ mũthia wa thĩ ũrĩ hakuhĩ mũno.

Matukũ ma kũrigĩrĩria megũikara ihinda rĩigana atĩa? Bibilia yonanagia atĩ nĩ “ihinda inini.” Ihinda rĩu rĩakinya, Ngai nĩ akaananga “arĩa manangaga thĩ.”—Kũguũrĩrio 11:15-18; 12:12.

THĨ NJERŨ ĨRĨ HAKUHĨ!

Ngai nĩ aigĩte mũthenya na thaa rĩrĩa akaaniina thĩ ĩno njũru. (Mathayo 24:36) O na kũrĩ ũguo, ũhoro mwega nĩ atĩ Ngai “ndendaga mũndũ o na ũmwe akaaniinwo.” (2 Petero 3:9) Nĩ arahe andũ mweke wa kwĩruta wendi wake na kũmwathĩkĩra. Nĩkĩ? Tondũ nĩ endaga tũkaahonoka mũthia wa thĩ ĩno njũru na tũingĩre thĩinĩ wa thĩ yake njerũ rĩrĩa thĩ ĩgatuĩka paradiso.

Ngai nĩ aigĩte mĩbango nĩguo andũ othe marutwo ũrĩa mangĩagĩrĩra gũgaatũũra thĩinĩ wa thĩ njerũ rungu rwa Ũthamaki wake. Jesu aaugire atĩ ũhoro mwega wĩgiĩ Ũthamaki wa Ngai ũngĩkaahunjio thĩinĩ wa “thĩ yothe ĩrĩa ĩikaragwo.” (Mathayo 24:14) Aira a Jehova thĩinĩ wa thĩ yothe nĩ mahũthagĩra mathaa bilioni nyingĩ, kũhunjia na kũruta andũ ũhoro wa kĩĩrĩgĩrĩro ũrĩa ũkoragwo Bibilia-inĩ. Jesu aaugire atĩ wĩra ũcio wa kũhunjia ũngĩkaarutwo thĩinĩ wa thĩ yothe mũico ũtanakinya.

Wathani wa andũ ũrĩ hakuhĩ gũkinya mũthia. No ũhoro mwega nĩ atĩ no ũhonoke mũthia wa thĩ ĩno na ũtũũre thĩinĩ wa thĩ njerũ ĩrĩa ĩgaakorũo ĩrĩ Paradiso ĩrĩa Ngai eranĩire. Gĩcunjĩ kĩrĩa kĩrũmĩrĩire nĩ kĩarĩrĩirie ũrĩa ũngĩka nĩguo ũgaatũũra thĩinĩ wa thĩ ĩyo njerũ.