Gwaka Rĩngĩ Ũrata Waku na Jehova

O MWAKA andũ aingĩ nĩ macokagio thĩinĩ wa kĩũngano gĩa Gĩkristiano. Ta wĩcirie “gĩkeno kĩnene” kĩrĩa gĩkoragwo igũrũ rĩrĩa mũndũ acokio. (Luk. 15:7, 10) Angĩkorũo nĩ ũcoketio kĩũngano-inĩ, koragwo na ma atĩ Jesu, araika, na Jehova we mwene nĩ makenaga mũno kuona ũcokete ũhoro-inĩ wa ma rĩngĩ. O na kũrĩ ũguo, harĩ moritũ ũngĩcemania namo ũkĩgeria gwaka rĩngĩ ũrata waku na Jehova. Moritũ mamwe nĩ marĩkũ, na nĩ kĩĩ kĩngĩgũteithia?

MORITŨ MAMWE NĨ MARĨKŨ?

Aarĩ na ariũ a Ithe witũ aingĩ nĩ maiguaga makuĩte ngoro o na thutha wa gũcokio kĩũngano-inĩ. No gũkorũo no ũtaũkĩrũo nĩ ũrĩa Mũthamaki Daudi aaiguaga. O na thutha wa kuoherũo mahĩtia make, aaugire: “Mahĩtia makwa nĩ . . . manditũhĩire.” (Thab. 40:12; 65:3) O na thutha wa mũndũ gũcokerera Jehova, no athiĩ na mbere kũigua ahĩtĩtie na aconokete kwa ihinda rĩa mĩaka mĩingĩ. Isabelle eeheretio kĩũngano-inĩ makĩria ma mĩaka 20.a Aaugire: “Ndonaga arĩ ũndũ mũritũ mũno gwĩtĩkia atĩ Jehova nĩ anjoheire.” Gũkua ngoro no gũtũme ũrata waku hamwe na Jehova ũthũke rĩngĩ. (Thim. 24:10) Ndũgetĩkĩre ũndũ ta ũcio wĩkĩke harĩ we.

Angĩ nao nĩ maritũhagĩrũo, meciria maũndũ maingĩ marĩa marabatara gwĩka nĩguo mathondeke rĩngĩ ũrata wao na Jehova. Thutha wa gũcokio, Antoine aaugire ũũ: “Ndonaga ta ndiganĩirũo nĩ maũndũ mothe nderutĩte megiĩ ũtũũro wa Mũkristiano.” Nĩ ũndũ wa andũ amwe kũigua ũguo, nĩ magaga gwĩka ũrĩa wothe mangĩhota maũndũ-inĩ ma kĩĩroho.

Ta wĩcirie ũhoro wa ngerekano ĩno: Nyũmba ya mũndũ ĩngĩthũkangio nĩ kĩhuhũkanio, mũndũ ũcio no aigue aritũhĩirũo eciria ũhoro wa mahinda na wĩra ũrĩa arabatara kũruta nĩguo athondeke nyũmba yake rĩngĩ. Na njĩra o ta ĩyo, angĩkorũo nĩ wekĩte mehia maritũ marĩa maatũmire ũrata waku hamwe na Jehova ũthũke, no ũigue ũritũhĩirũo gũthondeka ũrata ũcio rĩngĩ weciria kĩyo kĩrĩa kĩrabatarania. No ndũkamake tondũ nĩ ũkwamũkĩra ũteithio.

Jehova atwĩraga ũũ: “Rĩu ũkai, rekei tũrũnge maũndũ.” (Isa. 1:18) Gũkinyĩria rĩu nĩ wĩrutanĩirie mũno ‘kũrũnga maũndũ.’ Jehova nĩ akwendete tondũ wa kĩyo kĩrĩa wĩkĩrĩte. Ta wĩcirie ũndũ ũyũ: Gũcoka gwaku nĩ gũteithĩtie Jehova kuona macokio mega ma gũcokeria Shaitani, ũrĩa ũmũnyũrũragia.—Thim. 27:11.

Gũcokerera Jehova nĩ gũtũmĩte ũmũkuhĩrĩrie, na o nake nĩ eranĩire atĩ nĩ egũgũkuhĩrĩria. (Jak. 4:8) Ĩndĩ o na gũtuĩka andũ arĩa angĩ nĩ marĩkenaga kuona ũcoketio thĩinĩ wa kĩũngano, ũndũ ũcio ti mũiganu. Nĩ ũrabatara gũthiĩ na mbere gwĩkĩra hinya ũrata waku hamwe na Jehova, o we Ithe witũ na Mũrata witũ. Ũngĩka ũguo atĩa?

WĨIGĨRE MĨOROTO ŨNGĨHOTA GŨKINYĨRA

Geria kwĩigĩra mĩoroto ũngĩhota gũkinyĩra. No kũhoteke no ũririkanaga morutani ma mũthingi marĩa werutĩte megiĩ Jehova na kĩĩranĩro gĩake gĩa Paradiso. No nĩ ũrabatara gũkorũo na mũtaratara mwega wa maũndũ ma kĩĩroho, ta mũtaratara wa gũthiĩ kũhunjia, gũthiĩ mĩcemanio, na kũhũthĩra mahinda hamwe na aarĩ na ariũ a Ithe witũ. Ta wĩcirie ũhoro wa mĩoroto ĩno.

Aragia na Jehova kaingĩ. Ithe witũ wa igũrũ nĩ ataũkagĩrũo atĩ gũthiĩ na mbere kũigua ũhĩtĩtie no gũtũme ũremwo nĩ kũmũhoya. (Rom. 8:26) O na kũrĩ ũguo, ‘hoyaga ũtegũtigithĩria,’ ũkera Jehova nĩ ũrenda mũno gũtuĩka mũrata wake. (Rom. 12:12) Andrej aaugire: “Nĩ ndaiguaga hĩtĩtie mũno na njonokete. No thutha wa kũhoya, nĩ ndaiguaga wegega. Nĩ ndaiguaga ndĩ na thayũ wa meciria.” Angĩkorũo ndũramenya wega nĩ maũndũ marĩkũ ũngiuga ũkĩhoya, no ũthome mahoya ya Mũthamaki Daudi marĩa aahoire thutha wake kwĩrira, thĩinĩ wa Thaburi ya 51 na 65.

Wĩrutage Bibilia hingo ciothe. Gwĩka ũguo nĩ kũrĩgũteithagia gũkũra kĩĩroho na gũgatũma wendo waku harĩ Jehova wongerereke. (Thab. 19:7-11) Felipe aaugire ũũ: “Gũkorũo itarĩ na mũtaratara mwega wa maũndũ ma kĩĩroho nĩkuo gwatũmĩte ngorũo itarĩ na hinya kĩĩroho na ngĩhĩtĩria Jehova. Ndieendaga kũhĩtĩria Jehova rĩngĩ, kwoguo nĩ ndaatigagĩrĩra nĩ nderuta Bibilia hingo ciothe.” O nawe no wĩke ũguo. Ũngĩbatara kũmenya nĩ maũndũ marĩkũ ũngĩĩruta igũrũ rĩamo, no ũhoe ũteithio kũrĩ mũrata ũrĩ na ũmenyeru.

Thondeka rĩngĩ ũrata waku hamwe na aarĩ na ariũ a Ithe witũ. Andũ amwe arĩa macokagio kĩũngano-inĩ nĩ metigagĩra nĩ ũndũ wa kuona ta andũ arĩa angĩ mategũkenio nĩo. Larissa aaugire ũũ: “Ndaiguaga njonokete mũno. Ndonaga hĩtĩirie na ngaconorithia aarĩ na ariũ a Ithe witũ. Nĩ ndaikarire ihinda iraihu ingĩgaatiga kũigua ũguo.” Koragwo na ma atĩ athuri a kĩũngano na andũ angĩ agimaru kĩĩroho nĩ makoragwo mehaarĩirie gũgũteithia ũgĩthondeka rĩngĩ ũrata waku na Jehova. (Rora gathandũkũ “Athuri a Kĩũngano Mangĩka atĩa?”) Nĩ makenaga nĩ ũndũ waku gũcokio kĩũngano-inĩ, na mendaga ũkorũo na gĩkeno.—Thim. 17:17.

Nĩ kĩĩ kĩngĩgũteithia gũkorũo na ũrata wa hakuhĩ na Akristiano arĩa angĩ? Nyitanagĩra biũ hamwe na aarĩ na ariũ a Ithe witũ maũndũ-inĩ ma kĩĩroho, ta gũthiĩ mĩcemanio na kũhunjia ũtegũtĩrĩria. Gwĩka ũguo kũngĩgũteithia atĩa? Felix aaugire ũũ: “Kĩũngano nĩ kĩeriragĩria mũno njokerere Jehova. Othe nĩ mandeithirie kũigua ndĩ wa bata kĩũngano-inĩ, gwĩtĩkia atĩ Jehova nĩ anjoheire, na atĩ no hote gũthiĩ na mbere gũtungatĩra Jehova.”—Rora gathandũkũ “Ũngĩka Atĩa?”

NDŨGAKUE NGORO!

Shaitani no egũthiĩ na mbere gũkũrehera moritũ nĩguo ũremwo gwaka rĩngĩ ũrata waku hamwe na Jehova. (Luk. 4:13) Nĩguo ũhote gwĩtiiria, ĩkagĩra wĩtĩkio waku hinya.

Jehova akĩaria ũhoro wĩgiĩ ngʼondu ciake eranĩire ũũ: “Nĩ ngaacaria ĩrĩa yũrĩte, njokie ĩrĩa yeherete rũũru-inĩ, njohe ĩrĩa ĩgurarĩtio, nayo ĩrĩa ĩtarĩ hinya ndĩmĩĩkĩre hinya.” (Ezek. 34:16) Jehova anateithia andũ angĩ aingĩ gũthondeka ũrata wao hamwe nake. Koragwo na ma atĩ nĩ endaga gũgũteithia nĩguo ũthiĩ na mbere gwaka ũrata mũrũmu hamwe nake.