Ciũria Kuuma Kũrĩ Athomi
Hihi Daudi eendaga kuonania atĩ ndangĩgaakua rĩrĩa aandĩkire atĩ egũtũũra agoocaga rĩĩtwa rĩa Ngai “tene na tene” thĩinĩ wa Thaburi 61:8?
Aca tiguo eendaga kuonania. No ciugo icio aandĩkire itiarĩ na mahĩtia.
Ta rora ũrĩa aandĩkire mũhari-inĩ ũcio na mĩhari-inĩ ĩngĩ ĩhaanaine na ũcio. “Niĩ ngũtũũra nyinaga nyĩmbo cia kũgooca rĩĩtwa rĩaku tene na tene, o ngĩhingagia mĩĩhĩtwa yakwa mũthenya o mũthenya.” “Nĩ ndĩrakũgooca na ngoro yakwa yothe, wee Jehova Ngai wakwa, na ngũtũũra ngoocaga rĩĩtwa rĩaku tene na tene.”—Thab. 61:8; 86:12; 145:1, 2.
Daudi akĩandĩka ciugo icio ndeeciragia atĩ ndagaakua. Nĩ ooĩ ũrĩa Jehova aaugĩte atĩ andũ nĩ mangĩakuire nĩ ũndũ wa mehia, na Daudi nĩ eetĩkagĩra atĩ aarĩ mwĩhia. (Kĩam. 3:3, 17-19; Thab. 51:4, 5) Nĩ aamenyaga atĩ o na andũ arĩa meetĩkĩrĩkĩte harĩ Ngai ta Iburahimu, Isaaka, na Jakubu, nĩ maakuĩte. Kwoguo Daudi nĩ aamenyaga atĩ o nake nĩ angĩakuire. (Thab. 37:25; 39:4) No ciugo ciake iria irĩ thĩinĩ wa Thaburi 61:8 cioonanagia wendi wake na itua rĩake rĩa kũgoocaga Ngai tene na tene, kana ihinda rĩrĩa rĩothe Daudi angĩatũũrire.—2 Sam. 7:12.
Rĩmwe na rĩmwe Daudi nĩ aandĩkaga ũhoro wĩgiĩ maũndũ marĩa aageragĩra ũtũũro-inĩ, o ta ũrĩa tũũhoro twa gũtaarĩria twa Thaburi 18, 51, na 52 tuonanagia. Thĩinĩ wa Thaburi 23 Daudi, ũrĩa o nake warĩ mũrĩithi, ataarĩirie Jehova arĩ ta mũrĩithi ũtongoragia rũũru rwake, akarũcanjamũra, na akarũgitĩra. Ũndũ ũcio nĩ watũmaga Daudi ende gũtungatĩra Ngai ‘matukũ mothe ma ũtũũro wake.’—Thab. 23:6.
Ningĩ ririkana atĩ Jehova nĩwe watongoririe Daudi kwandĩka maũndũ marĩa mothe aandĩkire. Maũndũ mamwe aandĩkire maarĩ morathi mangĩahingire thutha ũcio. Kwa ngerekano, thĩinĩ wa Thaburi 110, Daudi nĩ aandĩkire ũhoro wĩgiĩ ihinda rĩna rĩrĩa Mwathani wake ‘angĩgaikara thĩ guoko-inĩ kwa ũrĩo kwa Ngai’ na aheo hinya mũnene kũrĩa igũrũ. Angĩkaaheo hinya wa gwĩka atĩa? Hinya wa gũtooria thũ cia Ngai na ‘kũhingia ituĩro harĩ ndũrĩrĩ’ cia thĩ. Daudi aarĩ gukawe wa tene wa Mesia, ũrĩa ũngĩgaathana kuuma igũrũ na atuĩke “mũthĩnjĩri-Ngai tene na tene.” (Thab. 110:1-6) Jesu nĩ oonanirie atĩ ũrathi ũcio ũrĩ thĩinĩ wa Thaburi 110 waaragia igũrũ rĩmwĩgiĩ na atĩ ũngĩkaahinga ihinda-inĩ rĩũkĩte.—Mat. 22:41-45.
Jehova aatongoririe Daudi kwandĩka ũhoro wĩgiĩ ihinda-inĩ rĩu aatũũraga, na ũhoro wĩgiĩ ihinda rĩũkĩte rĩrĩa angĩkariũkio na akenere kũgoocaga Jehova tene na tene. Kwoguo Thaburi 37:10, 11, 29 no ĩhũthĩrũo kwarĩrĩria ũhoro wĩgiĩ ihinda-inĩ rĩrĩa yaandĩkirũo na ihinda rĩũkĩte. Mĩhari ĩyo nĩ yahingire mahinda-inĩ ma tene bũrũri-inĩ wa Isiraeli na nĩ ĩkaahinga ihinda-inĩ rĩũkĩte rĩrĩa Ngai akaahingia ciĩranĩro ciake.—Rora kĩbungo gĩa 8 gĩcunjĩ-inĩ kĩrĩ na kĩongo “Nĩ Ũgaakorũo Hamwe na Niĩ Thĩinĩ wa Paradiso,” thĩinĩ wa ngathĩti ĩno.
Kwoguo Thaburi 61:8 na mĩhari ĩngĩ ĩrĩa ĩhaanaine na mũhari ũcio yonanagia atĩ Daudi eendaga kũgooca Jehova hĩndĩ ĩyo nginya hĩndĩ ĩrĩa angĩakuire. Na nĩ ĩronania wega ũrĩa Daudi ageeka ihinda-inĩ rĩũkĩte rĩrĩa Jehova akaamũriũkia.