Hulda nĩ Aahingirie Muoroto Wake
ŨNGĨACEERIRE gĩcigĩrĩra-inĩ kĩnini gĩa Sangir Besar bũrũri-inĩ wa Indonesia mĩaka ĩigana ũna mĩhĩtũku, nĩ ũngĩonire aarĩ a Ithe witũ atatũ rũteere-inĩ rwa iria. Nĩ moĩkaine wega gĩcigĩrĩra-inĩ kĩu nĩ ũndũ wa kũhunjĩria andũ na kũmateithia gũtaũkĩrũo nĩ Bibilia. No hĩndĩ ĩyo maarutaga wĩra ũngĩ ngũrani.
Gĩcigĩrĩra gĩa Sangir Besar mwena wa rũgongo wa Indonesia
Atumia acio maaingĩraga iria-inĩ, makoya mahiga manene makamatwara rũteere-inĩ rwa iria. Mahiga mamwe maarĩ manene ta mũbira. Thutha ũcio magaikarĩra tũtĩ twa mbaũ makahũũrahũũra mahiga macio na nyundo magathondeka kagoto. Magacoka magekĩra kagoto kau ndoo-inĩ, magagakuua magakaambatia nginya kũrĩa maaikaraga. Thutha-inĩ magagekĩra makũnia-inĩ, gagakuuo nĩ marori, gagathiĩ kũhũthĩrũo gwaka barabara.
Hulda akĩũngania mahiga rũteere-inĩ rwa iria
Ũmwe wa aarĩ a Ithe witũ acio nĩ Hulda. Maũndũ make nĩ maamwĩtĩkagĩria kũruta wĩra ũcio mathaa maingĩ gũkĩra acio angĩ. Aahũthagĩra mbeca iria aathũkũmaga wĩra-inĩ ũcio kũhingĩria famĩlĩ yake mabataro ma o mũthenya. No rĩu nĩ aarĩ na muoroto ũngĩ eendaga kũhingia. Eendaga kũgũra tablet nĩgetha ahote kũhũthagĩra JW Library®. Hulda nĩ aamenyaga atĩ video na indo ingĩ iria irĩ thĩinĩ wa JW Library no imũteithie kwagagĩria ũtungata wake na gũtaũkĩrũo nĩ Bibilia makĩria.
Hulda aahũthagĩra mathaa merĩ o rũcinĩ ihinda rĩa mweri ũmwe na nuthu, akĩhũũra kagoto kangĩiyũra karori kanini. Mũthia-inĩ, akĩigania mbeca cia kũgũra tablet.
Hulda anyitĩte tablet yake
Hulda aaugire ũũ: “O na gũtuĩka ndaarĩ na mĩnoga na ngatuurũo nĩ marũngo nĩ kũhũũra kagoto, ruo rũu ruothe nĩ rwariganĩire rĩrĩa ndonire atĩ rĩu ndĩ na tablet ya kũndeithia kwagagĩria ũtungata wakwa na kũhaarĩria mĩcemanio ya Gĩkristiano na njĩra hũthũ.” Ningĩ aaugire atĩ tablet ĩyo nĩ yamũteithirie hĩndĩ ya kĩngʼũki, tondũ maũndũ mothe ma kĩũngano meekagwo kũgerera mĩtambo. Tũrĩ na gĩkeno kuona atĩ Hulda nĩ aahotire kũhingia muoroto wake.