Hihi Ũrĩ Wamenya?
Nĩ kĩĩ gĩtũmaga Bibilia ĩĩcokere?
RĨMWE andĩki a Bibilia nĩ maacokagĩra ũhoro kiugo gwa kiugo. Reke tũthuthurie maũndũ matatũ marĩa hihi maatũmaga meke ũguo:
Ihinda rĩrĩa ũhoro ũcio waandĩkirũo. Thĩinĩ wa Isiraeli ya tene, andũ aingĩ matiarĩ na kobĩ ciao ene cia Watho. Kaingĩ maathikagĩrĩria Watho ũgĩthomwo rĩrĩa monganĩte gĩikaro-inĩ kĩrĩa kĩamũre. (Gũcok. 31:10-12) No kũhoteke nĩ kwarĩ na maũndũ mangĩamahĩngĩcire magĩthikĩrĩria marũgamĩte mathaa maingĩ marĩ hamwe. (Neh. 8:2, 3, 7) Mahinda-inĩ ta macio, gũcokera maũndũ marĩa ma bata nĩ kũngĩateithirie andũ kũririkana maandĩko na kũmahũthĩra. Gũcokera ciugo imwe nĩ kũngĩamateithirie kũririkana maũndũ maingĩ megiĩ mawatho ma Ngai na matuĩro ma ciira.—Alaw. 18:4-22; Gũcok. 5:1.
Njĩra ĩrĩa yahũthĩrirũo kwandĩka. Icunjĩ imwe cia Bibilia ikoragwo irĩ nyĩmbo—ta ibuku rĩa Thaburi, Rwĩmbo Rwa Suleimani, na Macakaya. Rĩmwe nyĩmbo nĩ ciakoragwo na ciugo irecokera, na ũndũ ũcio nĩ watĩtĩrithagia ũhoro mũnene wa rwĩmbo na ũgateithia athikĩrĩria kũririkana ciugo ciaruo. Kwa ngerekano, ta rora ciugo ici cia Thaburi 115:9-11: “Atĩrĩrĩ wee Isiraeli, wĩhokage Jehova—Nĩwe ũmateithagia na nĩwe ngo yao. Atĩrĩrĩ inyuĩ nyũmba ya Haruni, mwĩhokagei Jehova—Nĩwe ũmateithagia na nĩwe ngo yao. Inyuĩ mwĩtigĩrĩte Jehova, mwĩhokagei Jehova—Nĩwe ũmateithagia na nĩwe ngo yao.” Gũcokera ciugo icio nĩ kũngĩateithirie aini kũririkana ũndũ ũcio wa bata na kũũiga ngoro-inĩ.
Gũtĩtĩrithia maũndũ ma bata. Rĩmwe andĩki a Bibilia nĩ maacokagĩra ciugo iria ikuuĩte ũhoro ũrĩa mũnene. Kwa ngerekano, rĩrĩa Jehova eerire Aisiraeli matikarĩe thakame, nĩ eerire Musa acokere maita maigana ũna gĩtũmi gĩa kwaga gwĩka ũguo. Ngai eendaga gũtĩtĩrithia atĩ muoyo wa kĩndũ ũkoragwo thĩinĩ wa thakame, na kwoguo thakame ĩrũgamĩrĩire muoyo. (Alaw. 17:11, 14) Thutha-inĩ rĩrĩa atũmwo na athuri thĩinĩ wa Jerusalemu maandĩkire maũndũ marĩa Mũkristiano agĩrĩirũo gwĩthema nĩguo akenie Ngai, nĩ maatĩtĩrithirie o rĩngĩ bata wa gwĩthema thakame.—Atũm. 15:20, 29.
O na gũtuĩka Bibilia nĩ ĩĩcokagĩra, ũguo ti kuuga atĩ Jehova endaga tũkorũo na mũtugo wa gũcokacokera ciugo irĩ thĩinĩ wa Bibilia. O na Jesu aaugire ũũ: “Rĩrĩa ũkũhoya ndũgacokagĩre maũndũ o marĩa marĩa.” (Mat. 6:7) Aacokire akĩgweta maũndũ marĩa tũngĩhoya igũrũ rĩamo. (Mat. 6:9-13) O na gũtuĩka nĩ twĩthemaga gũcokera ciugo o iria iria mahoya-inĩ maitũ, no tũhoe igũrũ rĩgiĩ ũndũ o ũrĩa rĩngĩ na rĩngĩ.—Mat. 7:7-11.
Kwoguo, Bibilia nĩ ĩkoragwo na gĩtũmi kĩiganu gĩa gũcokera ciugo imwe kana ũhoro ũmwe. Nĩ njĩra ĩmwe ĩrĩa Jehova, Mũrutani Witũ Ũrĩa Mũnene atũrutaga nayo nĩguo tũgunĩke.—Isa. 48:17, 18.