Ciũria Kuuma Kũrĩ Athomi
Wĩra wa Kũhunjia Ũhoro Ũrĩa Mwega Ũgaathira rĩ?
Jesu aaugire ũũ: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.” (Mat. 24:14) Kiugo gĩa Kĩngiriki teʹlos kĩrĩa gĩtaũrĩtwo “mũico” mũhari-inĩ ũyũ na mũhari-inĩ wa 6 na wa 13, kĩaragia ũhoro wa mũthia wa thĩ ĩno ya Shaitani hĩndĩ ya Hari–Magedoni. (Kũg. 16:14, 16) Kwoguo tũgũthiĩ na mbere kũhunjia ũhoro ũrĩa mwega o nginya mũthia, rĩrĩa mbaara ya Hari–Magedoni ĩgaakorũo ĩtigĩtie hanini kwambĩrĩria. Ũndũ ũcio nĩ ũtũmĩte tũgarũrĩre ũtaũku witũ wa na hau kabere.
Tũrataũkagĩrũo atĩ tũgaatiga kũhunjia ũhoro ũrĩa mwega thĩna ũrĩa mũnene wambĩrĩria, rĩrĩa Babuloni Ũrĩa Mũnene akaaniinwo. (Kũg. 17:3, 5, 15, 16) Tũretĩkĩtie atĩ rĩrĩa thĩna ũrĩa mũnene ũkaambĩrĩria, nĩrĩo na njĩra ya mũhaano “mwaka wa wendi mwega wa Jehova” ũgaakinya mũico. (Isa. 61:2) Ningĩ kũrĩ hĩndĩ tweciragia atĩ arĩa makaahonoka thĩna ũrĩa mũnene, magaakorũo monanĩtie wĩhokeku wao harĩ Jehova mbere ya thĩna ũcio kwambĩrĩria. Twamaringithanagia na Ayahudi arĩa maahonokire rĩrĩa Jerusalemu yanangirũo mwaka-inĩ wa 607 M.M.M. Ayahudi acio nĩ meekĩrĩtwo rũũri rwa kũhonokio kabere tondũ nĩ maathathayagia Jehova na magathũũra maũndũ moru. (Ezek. 5:11; 9:4) O na kũrĩ ũguo, kũringithania maũndũ na njĩra ĩyo gũtiratwarana na ciugo cia Jesu thĩinĩ wa Mathayo 24:14, iria cionanagia atĩ no kũhoteke andũ mekũheo mweke wa gwĩtĩkĩra ũhoro ũrĩa mwega o nginya mũthia, rĩrĩa mbaara ya Hari–Magedoni ĩgaakorũo ĩtigĩtie hanini kwambĩrĩria.
Ũtaũku ũcio mwerũ wĩgiĩ Mathayo 24:14 ningĩ nĩ ũronania atĩ nĩ tũrabatara kũgarũrĩra ũtaũku witũ wĩgiĩ Kũguũrĩrio 16:21, ĩrĩa yaragia ũhoro wa ndũmĩrĩri ĩtariĩ ta mbura ya mbembe. Thutha wa gũthuthuria makĩria nĩ tuonete atĩ maandĩko macio merĩ nĩ maratwarana. Na njĩra ĩrĩkũ? Na njĩra ya ũrĩa andũ maiyũkagia ndũmĩrĩri ya Ũthamaki. Mũtũmwo Paulo aaugire atĩ ndũmĩrĩri itũ nĩ ũhoro mwega ũtariĩ ta “mũtararĩko wa muoyo” harĩ andũ “arĩa marahonokio.” No ndũmĩrĩri ĩyo ti njega harĩ thũ cia Ngai, tondũ ĩtariĩ ta “mũnungo wa gĩkuũ” harĩ o. (2 Kor. 2:15, 16) Nĩ mathũire ndũmĩrĩri ya Ũthamaki tondũ nĩ yonanagia ũrĩa thĩ ĩno mendete ĩhaana, atĩ ĩiyũire waganu, ĩtongoragio nĩ Shaitani, na atĩ ica ikuhĩ nĩ ĩkwanangwo.—Joh. 7:7; 1 Joh. 2:17; 5:19.
Ũndũ ũngĩ nĩ atĩ mbura ĩyo ya mbembe ya mũhaano ĩgaakorũo ĩrĩ ‘nene mũno.’ Ũndũ ũcio ũronania atĩ no kũhoteke hĩndĩ ya thĩna ũrĩa mũnene, wĩra wa kũhunjia nĩ ũkaahutia andũ na njĩra nene makĩria, na ũguo nĩ kuuga rĩĩtwa rĩa Jehova nĩ rĩkaamenyithanio na gĩkĩro kĩnene gũkĩra hĩndĩ ĩngĩ o yothe. (Ezek. 39:7) Thutha wa Babuloni Ũrĩa Mũnene kũniinwo, no kũhoteke kũrĩ andũ makaagucĩrĩrio nĩ ndũmĩrĩri itũ hĩndĩ ĩyo, maigue ĩtariĩ ta mũtararĩko mwega. No gũkorũo nĩ makaaririkana kana mamenye atĩ kwa ihinda rĩa mĩaka mĩingĩ Aira a Jehova nĩ maakoretwo makiuga atĩ ndini cia maheeni nĩ ikaaniinwo.
No tũringithanie ũndũ ũcio na ũrĩa gwekĩkire Misiri thutha wa Mahũũra Marĩa Ikũmi. Thutha wa Jehova gũtuĩra “ngai ciothe cia Misiri ciira,” “andũ aingĩ matukanĩte” mataarĩ Aisiraeli nĩ maathiire hamwe na andũ a Jehova. (Tham. 12:12, 37, 38) No kũhoteke andũ acio mataarĩ Aisiraeli maathiire mwena wa Jehova thutha wa kuona Mahũũra Marĩa Ikũmi Musa aarĩtie ũhoro wamo makĩhinga.
Arĩa magaatua itua rĩa gũthiĩ mwena wa Jehova thutha wa Babuloni Ũrĩa Mũnene kũniinwo, nĩ makaagĩa na mweke wa kũnyita mbaru ariũ a Ithe na Kristo arĩa magaakorũo matigarĩte gũkũ thĩ. (Mat. 25:34-36, 40) No ũrĩa kũrĩ nĩ atĩ, mweke wa mũndũ gũtuĩrũo kana nĩ wa mũhaano wa ngʼondu ũgaathira ihinda inini mbere ya Hari–Magedoni kwambĩrĩria, rĩrĩa aitĩrĩrie maguta arĩa magaakorũo matigarĩte magaathiĩ igũrũ.
Ũtaũku ũcio mwerũ nĩ ũratĩtĩrithia na gĩkĩro kĩnene wendo mũnene wa Jehova o hamwe na tha ciake nyingĩ. Hatarĩ nganja, Jehova “ndendaga mũndũ o na ũmwe akaaniinwo no endaga othe merire.”—2 Pet. 3:9.