1925—MĨAKA IGANA RĨMWE MĨTHIRU

MATANYA KWAGA KŨHINGA

Arutwo a Bibilia aingĩ meerĩgagĩrĩra atĩ thĩ nĩ ĩngĩatuĩkire Paradiso mwaka-inĩ wa 1925. Nĩkĩ? Mũrũ wa Ithe Witũ Albert Schroeder, ũrĩa wacokire gũtungata Kĩama-inĩ Kĩrĩa Gĩtongoragia, aaugire ũũ agĩtaarĩria ũndũ ũcio: “Kwerĩgagĩrĩrũo atĩ arũmĩrĩri a Kristo aitĩrĩrie maguta arĩa maatigarĩte nĩ mangĩathiire igũrũ nĩguo maingĩre Ũthamaki-inĩ, na atĩ arũme ehokeku ta Iburahimu, Daudi, na angĩ, nĩ mangĩariũkirio nĩguo matongorie maũndũ gũkũ thĩ rungu rwa ũthamaki wa Ngai.” Kwoguo rĩrĩa ũndũ ũcio waagire kũhinga, andũ amwe nĩ maakuire ngoro mũno.—Thim. 13:12.

O na gũtuĩka nĩ maakuĩte ngoro, Arutwo aingĩ a Bibilia no maathiire na mbere kũhunjia na kĩyo, na magĩtaũkĩrũo wega makĩria atĩ kũhunjia ũhoro wĩgiĩ Jehova nĩguo ũndũ ũrĩa wa bata makĩria. Reke tuone ũrĩa meekire nĩguo mahunjĩrie andũ aingĩ ũhoro ũrĩa wa ma.

KUONGERERA CECENI CIA REDIO

Nĩ ũndũ wa ũrĩa ũmemerekia wa redio ya WBBR wagaacĩrire mwaka-inĩ ũrĩa wahĩtũkĩte, Arutwo a Bibilia nĩ maathondekire ceceni ĩngĩ hakuhĩ na taũni ya Chicago, Illinois. Ceceni ĩyo yetagwo WORD (KIUGO). Bundi ũmwe wateithĩrĩirie gũthondeka ceceni ĩyo wetagwo Ralph Leffler aaugire atĩ andũ a icigo nyingĩ nginya cia kũraihu nĩ maathikagĩrĩria ceceni ĩyo hwaĩ-inĩ mahinda ma heho.” Kwa ngerekano, famĩlĩ ĩmwe yaikaraga taũni-inĩ ya Pilot Station, Alaska, ĩrĩa yarĩ makĩria ma kilomita 5,000 kuuma harĩa ceceni ĩyo yarĩ nĩ maathikĩrĩirie tabarĩra ĩmwe harĩ iria ciarĩ cia mbere. Thutha wa kũmĩthikĩrĩria, makĩandĩkĩra arĩa maarutaga wĩra ceceni-inĩ ĩyo marũa ma kũmacokeria ngatho nĩ ũndũ wa kũhaarĩria tabarĩra ta ĩyo ya kũmaaka kĩĩroho.

Ngathĩti ya The Watch Tower ya Dicemba 1, 1925, yaugire ũũ ĩkĩonania ũrĩa ceceni ĩyo yagaacĩrĩte: “Ceceni ya WORD nĩ ĩmwe ya ceceni iria ihotaga gũkinyia ũhoro nginya icigo-inĩ cia kũraihu thĩinĩ wa Amerika (US). Ĩthikagĩrĩrio nĩ nginya andũ arĩa maikaraga hũgũrũrũ-inĩ cia iria rĩa Atlantic na rĩa Pacific, bũrũri wa Cuba, na icigo cia mwena wa rũgongo biũ wa Alaska. Andũ aingĩ arĩa matarĩ maigua ũhoro ũrĩa wa ma mbere ĩyo rĩu nĩ marenda kũũmenya thutha wa gũthikĩrĩria ceceni ĩyo.”

Ihinda-inĩ o rĩu, Arutwo a Bibilia ningĩ nĩ meendaga kũhũthagĩra ũmemerekia wa redio kũhunjia bũrũri-inĩ wa Canada. Kwoguo mwaka-inĩ wa 1924 nĩ maathondekire ceceni ya redio yetagwo CHUC taũni-inĩ ya Saskatoon, Saskatchewan. Yarĩ ĩmwe ya ceceni cia mbere biũ cia kũmemerekia maũndũ ma kĩĩndini bũrũri-inĩ wa Canada. Gũkinyĩria mwaka wa 1925, ceceni ĩyo nĩ yabataraga gũthamĩrio handũ hangĩ hanenanene. Kwoguo thutha wa ceceni ĩyo gũtuĩka ya wabici ya Watch Tower Society, nĩ yathamĩirio nyũmba-inĩ yaakĩtwo tene yetagwo Regent Building, ĩrĩa maagũrire taũni-inĩ gĩa Saskatoon na ĩgĩthondekwo nĩguo ĩhũthĩrũo wĩra-inĩ ũcio.

Ceceni ĩyo yarĩ ũteithio mũnene tondũ andũ aingĩ arĩa maaikaraga tũtaũni-inĩ na icagi-inĩ cia Saskatchewan nĩ maagĩire na mweke wa kũigua ũhoro ũrĩa mwega rĩa mbere. Kwa ngerekano, taũni-inĩ ĩmwe ĩrĩ kũndũ thĩinĩ, mũtumia ũmwe nĩ aandĩkire marũa akĩhoya atũmĩrũo mabuku maitũ thutha wa gũthikĩrĩria tabarĩra ĩmwe. Mũrũ wa Ithe witũ George Naish agĩtaarĩria ũndũ ũcio aaugire: “Mũtumia ũcio aaiguĩkire ta arabatara ũteithio na ihenya, na kwoguo tũkĩmũtũmĩra mbuku cia Studies in the Scriptures.” Thutha wa ihinda inini, mũtumia ũcio nĩ aambĩrĩirie gũtheremia ndũmĩrĩri ya Ũthamaki nginya icigo cia kũraihu.

ŨTAŨKU MWERŨ WĨGIĨ WĨTĨKIO WITŨ

Ngathĩti ya The Watch Tower ya Machi 1, 1925, yarĩ na gĩcunjĩ kĩa mwanya kĩarĩ na kĩongo “Gũciarũo kwa Rũrĩrĩ.” Hihi gĩcunjĩ kĩu kĩarĩ kĩa bata nĩkĩ? Tondũ kwa ihinda rĩigana ũna, Arutwo a Bibilia nĩ mooĩ atĩ Shaitani nĩ arĩ na ithondeka, na arĩa marĩ ithondeka-inĩ rĩu nĩ maroho moru kũrĩa igũrũ o hamwe na ikundi cia kĩĩndini, kĩbiacara, na cia gĩũteti gũkũ thĩ. No gĩcunjĩ-inĩ kĩu, “ngombo ĩrĩa njĩhokeku na njũgĩ” nĩ yateithirie Akristiano gũtaũkĩrũo atĩ o na Jehova nĩ arĩ ithondeka rĩrĩa rĩkoragwo rĩrĩ ngũrani biũ na rĩkaregana na ithondeka rĩa Shaitani. (Mat. 24:45) Ningĩ ngombo ĩyo nĩ yataarĩirie atĩ Ũthamaki wa Ngai nĩ wambĩrĩirie gwathana mwaka-inĩ wa 1914, na atĩ mwaka-inĩ ũcio ‘nĩ kwaumĩrire mbaara kũrĩa igũrũʼ na Shaitani na ndaimono ciake makĩingatwo igũrũ na makĩharũrũkio gũkũ thĩ.—Kũg. 12:​7-9.

Andũ amwe nĩ maaritũhĩirũo gwĩtĩkania na ũtaũku ũcio mwerũ. Nĩ ũndũ ũcio, gĩcunjĩ kĩu nĩ kĩaheanĩte ũtaaro ũyũ: “Angĩkorũo harĩ athomi a ngathĩti ya Watch Tower mategwĩtĩkania na ũtaũku ũyũ mwerũ, tũkũmoria magĩe na wetereri na mehoke Mwathani, o makĩmũtungatagĩra na ngoro yao yothe.”

O na kũrĩ ũguo, mũrũ wa Ithe witũ Tom Eyre kuuma Britain, ũrĩa warĩ kolpota (ũrĩa rĩu wĩtagwo painia) aaugire ũũ agĩtaarĩria ũrĩa Arutwo Aingĩ a Bibilia maahutirio nĩ gĩcunjĩ kĩu: “Aarĩ na ariũ a Ithe witũ nĩ maacanjamũrirũo mũno nĩ ũtaũku ũcio mwerũ wĩgiĩ Kũguũrĩrio 12. Thutha wa gũtaũkĩrũo atĩ Ũthamaki nĩ wahandĩtwo kũrĩa igũrũ, twaiguire tũkĩhĩahĩa kũhunjĩria andũ arĩa angĩ ũhoro ũcio mwega. Ũndũ ũcio watũmire twandandũre ũtungata witũ, na ũgĩtũteithia kuona ũrĩa Jehova aatongoragia andũ ake nĩguo mahingie maũndũ manene o na makĩria.”

KŨRUTA ŨIRA WĨGIĨ JEHOVA

Ũmũthĩ ũyũ Aira a Jehova nĩ makoragwo mataũkĩirũo wega nĩ ciugo ici cia Isaia 43:10: “‘Inyuĩ nĩ inyuĩ aira akwa,’ ũguo nĩguo Jehova ekuuga, ‘Ĩni, ndungata yakwa ĩrĩa thuurĩte.’” No mbere ya mwaka wa 1925, rĩandĩko rĩu rĩtiahũthagĩrũo kaingĩ mabuku-inĩ maitũ. No nĩ gwacenjirie tondũ mwaka-inĩ wa 1925, ngathĩti 11 cia The Watch Tower nĩ ciaarĩrĩirie rĩandĩko rĩa Isaia 43:10 na 12.

Mũthia-inĩ wa Agosti 1925, Arutwo a Bibilia nĩ maathiire kĩgomano taũni-inĩ ya Indianapolis, Indiana. Mũrũ wa Ithe Witũ Joseph F. Rutherford aaugire ũũ ndũmĩrĩri-inĩ ya kũmanyita ũgeni ĩrĩa yaandĩkĩtwo programu-inĩ ya kĩgomano kĩu: “Tũkĩte kĩgomano gĩkĩ nĩguo twĩkĩrũo . . . hinya nĩ Mwathani, nĩgetha twacoka ũtungata-inĩ tũkorũo na kĩyo makĩria gĩa kũruta ũira ũmwĩgiĩ.” Na ihinda rĩu rĩothe rĩa thikũ inyanya cia kĩgomano, arĩa mookĩte nĩ meekĩrirũo ngoro kũruta ũira wĩgiĩ Jehova rĩrĩa rĩothe magĩa na mweke.

Mũthenya wa Njuuma Agosti 29, Mũrũ wa Ithe Witũ Rutherford nĩ aarutire mĩario yarĩ na kĩongo, “Rĩĩtana rĩa Kũhunjia.” Aaugire ũũ akĩonania bata wa kũhunjia: “Jehova arera andũ ake . . . : ‘Inyuĩ nĩ inyuĩ aira akwa . . . na niĩ nĩ niĩ Ngai.’ Agacoka akameera ciugo ici atĩtĩrithĩtie: ‘Handai kĩmenyithia nĩ ũndũ wa ikundi cia andũ.’ Gũtirĩ andũ angĩ thĩinĩ wa thĩ mangĩheana kĩmenyithia tiga andũ arĩa Mwathani aheete roho wake, tondũ nĩo aira ake.”—Isa. 43:12; 62:10.

Thutha wa kũruta mĩario, Mũrũ wa Ithe Witũ Rutherford nĩ aathomeire athikĩrĩria ũhoro warĩ na kĩongo, “Ndũmĩrĩri ya Mwĩhoko.” Athikĩrĩria acio othe nĩ meetĩkanirie na ndũmĩrĩri ĩyo ĩrĩa yoonanagia atĩ Ũthamaki wa Ngai noguo tu mwĩhoko ũrĩa ũngĩrehera andũ “thayũ, ũgaacĩru, ũgima mwega wa mwĩrĩ, muoyo wa tene na tene, wĩyathi na gĩkeno gĩa gũtũũra.” Ũhoro ũcio nĩ wacokire ũgĩtaũrũo na thiomi cigana ũna na ũgĩcabwo trakti-inĩ, na kobĩ ta milioni 40 ikĩheanwo kũrĩ andũ.

O na gũtuĩka Arutwo a Bibilia nĩ maaikarire mĩaka ĩngĩ ĩigana ũna magĩkambĩrĩria gwĩtwo Aira a Jehova, nĩ maathiire o magĩtaũkagĩrũo wega nĩ itemi rĩao rĩa kũruta ũira wĩgiĩ Jehova.

GŨCOKERA ARĨA MAKENIO NĨ NDŨMĨRĨRI

O ũrĩa Arutwo a Bibilia maathiiaga makĩongererekaga, noguo meekagĩrũo ngoro gũcokera andũ arĩa marakenio nĩ ũhoro ũrĩa mwega. Thutha wa kambĩini ya kũheana trakti ya Message of Hope, kabuku ka Bulletina kaaugire: “Bangai gũcoka rĩngĩ mĩciĩ-inĩ ya andũ arĩa mwatigĩire trakti ya Message of Hope.”

Kabuku ka Bulletin ka Janũarĩ 1925 kaarĩ na riboti ĩno kuuma kũrĩ Mũrutwo wa Bibilia taũni-inĩ ya Plano, Texas: “Nĩ ũndũ wa kũgegania kuona atĩ icigo-inĩ iria tũcokete maita maigana ũna irĩ na maumĩrĩro mega gũkĩra iria tũrahunjia riita rĩa mbere. Harĩ gataũni kamwe gĩcigo-inĩ gitũ kahunjĩtio maita matano ihinda-inĩ rĩa mĩaka ikũmi mĩhĩtũku. . . . Mwarĩ wa Ithe Witũ Hendrix marĩ na mami nĩ merĩga gũcoka kuo na makĩheana mabuku maingĩ gũkĩra hĩndĩ ĩngĩ o yothe.”

Nakuo bũrũri-inĩ wa Panama, kolpota ũmwe aaugire: “Andũ aingĩ arĩa maaregire gũthikĩrĩria ngĩmahunjĩria rĩa mbere nĩ marakorũo magarũrĩire mawoni mao ndacoka riita rĩa kerĩ kana rĩa gatatũ. O na mwaka ũyũ ũndũ ũrĩa ndĩrekĩrĩire mũno nĩ gũcokera andũ arĩa ndahunjĩirie na hau kabere, na nĩ ngoretwo na maumĩrĩra mega mũno.”

KŨIGA MECIRIA HARĨ IHINDA RĨŨKĨTE

Marũa-inĩ ma o mwaka kũrĩ makolpota othe, Mũrũ wa Ithe Witũ Rutherford nĩ aagwetire na njĩra nguhĩ maũndũ marĩa maahingĩtio mwaka-inĩ ũcio wa 1925, o hamwe na wĩra ũrĩa warĩ mbere. Aaugire: “Mwaka ũcio ũrathirire nĩ mũragĩire na mweke wa kũũmĩrĩria andũ aingĩ arĩa marakuĩte ngoro. Wĩra ũyũ nĩ ũtũmĩte mũgĩe na gĩkeno ngoro-inĩ . . . Mwaka ũyũ ũkĩte mwĩna mĩeke mĩingĩ ya kũhunjia ũhoro wĩgiĩ Ngai na ũthamaki wake na kuonania nĩa kũna mamũthathayagia. . . . Rekei ithuothe tũthiĩ na mbere kũhũthĩra mĩgambo itũ kũgoocithia Ngai witũ na Mũthamaki witũ.”

Mũthia-inĩ wa mwaka wa 1925, ariũ a Ithe witũ nĩ maabangaga ũrĩa mekwandandũra Betheli ĩrĩa yarĩ Brooklyn. Kwoguo mwaka-inĩ wa 1926 nĩ kũngĩakorirũo na wĩra mũnene wa mwako wa ithondeka ũkĩrĩte ĩrĩa ĩngĩ manaaka.