Hihi Macokio nĩ ma Bata?

“Ndaambĩrĩirie gũtuma ndũgũ na tũmwana ndĩ na mĩaka ikũmi. Kĩambĩrĩria-inĩ, nĩ tũngĩanyitanire moko na tũmumunyane. Thutha wa ihinda inyinyi tũkĩambĩrĩria kũhutania ciĩga ciitũ cia hitho na kũgeria njĩra itiganĩte cia gũkomania. Ndĩ wa mĩaka 15, nĩ ndambĩrĩirie kũruta wĩra, na wĩra-inĩ kũrĩ arũme maanjũragia tũkomanie nao. Ndaarĩ mwĩgereri na kwoguo ndeekaga o ũrĩa arĩa angĩ wĩra-inĩ meekaga. Ndeendaga gwĩtĩkĩrĩka nĩ aruna akwa, ũndũ ũcio ũgĩtũma nyingĩre mũno mĩtugo-inĩ ya ngomanio.”—SARAH,a AUSTRALIA.

NO ŨGEGE mũno ũngĩmenya atĩ Sarah aarereirũo thĩinĩ wa famĩlĩ yerutagĩra mũno maũndũ-inĩ megiĩ Ngai! Aciari ake nĩ maageretie kũmũteithia atũũre kũringana na ithimi cia Bibilia cia mĩtugo. Ĩndĩ Sarah agĩthuura kũrũmĩrĩra mĩthiĩre ĩngĩ.

Andũ aingĩ no moige atĩ Sarah nĩ eekire wega. Arĩa metĩkĩtie atĩ mawoni ma Bibilia megiĩ ngomanio nĩ mahĩtũke biũ nĩ mahinda. Angĩ nao mationaga arĩ ũũru gũkorũo mũndũ akiuga nĩ wa ndini o agĩthingataga mĩtugo ya ngomanio itagĩrĩire.

Hihi nĩ kũramakania kana nĩ ũĩ na kana nĩ ũratũũra kũringana na ũrĩa Bibilia ĩrutanaga ũhoro-inĩ wĩgiĩ ngomanio? Bibilia yugaga atĩ ũhoro ũrĩa ũrĩ thĩinĩ wayo ‘wekĩrirũo nĩ Ngai ngoro-inĩ ya mũwandĩki, na wĩ na kĩguni ũhoro-inĩ wa kũrutana.’ (2 Timotheo 3:16) Angĩkorũo nĩ wĩtĩkĩtie atĩ Ngai nĩwe wombire andũ na atĩ Bibilia nĩ Kiugo gĩake kĩrĩa gĩtongoretio na roho-rĩ, hakĩrĩ bata kũmenya ũrĩa yugaga igũrũ rĩgiĩ ngomanio.

Ũndũ wa kĩeha nĩ atĩ, andũ aingĩ matimenyaga wega ũrĩa Bibilia ĩrutanaga igũrũ rĩgiĩ ngomanio. Atongoria a ndini arĩa moigaga nĩ matĩĩte Bibilia marutanaga maũndũ mahĩngĩcanu. Ma nĩ atĩ, ũndũ ũcio nĩ ũtũmĩte makanitha maingĩ marĩa manene magayũkane.

Handũ ha kwĩhoka o maũndũ marĩa ũiguaga kuuma kũrĩ andũ-rĩ, ũkuona atĩa korũo no woe ndagĩka nyinyi wĩthuthurĩrie ũndũ ũcio? Gĩcunjĩ kĩrĩa kĩrũmĩrĩire nĩ kĩarĩrĩirie ciũria ikũmi iria andũ moragia kaingĩ ciĩgiĩ mawoni ma Bibilia megiĩ ngomanio. Thĩinĩ wa gĩcunjĩ kĩu nĩ ũkuona macokio meyumĩrĩtie marĩa monanĩtie ũrĩa Bibilia ĩrutanaga kũna. Gĩcunjĩ kĩa mũico gĩa icunjĩ ici nĩ gĩkwarĩrĩria bata wa maũndũ marĩa tũthuuraga.

[Kohoro ka Magũrũ-in]ĩ