Mbaara ya Ukraine Ĩtũmĩte Mathĩna ma Irio Mongerereke

Kũrĩ Mĩĩ 19, 2022, Rũhonge rwa Ũgitĩri rwa Kĩama kĩa Ũrũmwe wa Mabũrũri (United Nations Security Council) nĩ rwamenyithirio nĩ anene a gĩkĩro kĩa igũrũ makĩrĩa ma 75 atĩ “mathĩna ma irio thĩinĩ wa thĩ yothe, marĩa marehetwo nĩ kĩngʼũki gĩa Korona na ũgarũrũku wa rĩera, nĩ mongererekete mũno nĩ ũndũ wa mbaara ĩrĩa ĩrĩ Ukraine ũũ atĩ kũndũ kũmwe thĩinĩ wa thĩ no kũgĩe na ngʼaragu.” Ihinda inini thutha ũcio, ngathĩti ya The Economist nĩ yoigire atĩ “mbaara ĩyo nĩ ĩhatĩrĩirie thĩ o na kũrĩ na mathĩna mangĩ maingĩ, nginya andũ aingĩ makĩria makaaga irio.” Bibilia nĩ yarathĩte atĩ nĩ kũngĩkagĩa mathĩna ta macio ma irio mahinda-inĩ maya maitũ, no nĩ ĩtũteithagia kũmenya ũrĩa tũngĩhiũrania namo.

Bibilia nĩ yarathĩte ũhoro wĩgiĩ mathĩna ma irio

•  Jesu aarathĩte ũũ: “Rũrĩrĩ nĩ rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ, na nĩ gũkaagĩa ngʼaragu.”—Mathayo 24:7.

•  Ibuku rĩa Kũguũrĩrio nĩ rĩtaarĩirie atwarithia ana a mbarathi a mũhaano. Ũmwe wao arũgamĩrĩire mbaara. Ũrĩa ũmũrũmĩrĩire arũgamĩrĩire ngʼaragu, ihinda rĩrĩa kũngĩgakorũo arĩ hinya kuona irio na ningĩ nĩ ikendio goro mũno. Ũrathi ũcio ugaga ũũ: “Ngĩona mbarathi njirũ, na ũrĩa wamĩikarĩire aarĩ na ratiri ya gũthima guoko-inĩ gwake. Ngĩigua kĩndũ ta mũgambo . . . woiga ũũ: ‘Kĩbaba kĩa ngano kiumage dinari ĩmwe na ibaba ithatũ cia cairi ciumage dinari ĩmwe.’”—Kũguũrĩrio 6:5, 6.

Morathi macio ma Bibilia megiĩ mathĩna ma irio nĩ marahinga mahinda maya, marĩa Bibilia ĩtaga ‘matukũ ma kũrigĩrĩria.’ (2 Timotheo 3:1) Nĩguo wĩrute makĩria ũhoro wĩgiĩ ‘matukũ ma kũrigĩrĩria’ na atwarithia acio ana a mbarathi marĩrĩirio ibuku-inĩ rĩa Kũguũrĩrio, wĩrorere video ĩrĩ na kĩongo Thĩ nĩ Ĩcenjetie Kuuma Mwaka wa 1914 na ũthome gĩcunjĩ kĩrĩ na kĩongo “Atwarithia Arĩa ana a Mbarathi nĩ A?”

Ũrĩa Bibilia ĩngĩtũteithia

•  Bibilia nĩ ĩkoragwo na ũtaaro ũngĩhũthĩka ũrĩa ũngĩtũteithia kũhiũrania na moritũ, nginya moritũ megiĩ kwambatĩra kwa mbei ya irio na wagi wa irio. No ũthome motaaro ta macio thĩinĩ wa gĩcunjĩ kĩa “Jinsi ya Kuishi Ukiwa na Pesa Kidogo.”

•  Ningĩ Bibilia nĩ ĩtũheaga kĩĩrĩgĩrĩro atĩ maũndũ nĩ mekwagĩra. Nĩ ĩtwĩrĩire ihinda “gũgaakorũo na ngano nyingĩ thĩinĩ wa thĩ” na andũ othe nĩ magaakorũo na irio nyingĩ cia kũrĩa. (Thaburi 72:16) Nĩguo wĩrute makĩria ũhoro wĩgiĩ kĩĩrĩgĩrĩro kĩrĩa Bibilia ĩtũheaga kĩa ihinda rĩũkĩte, na kĩrĩa kĩngĩtũma twĩhoke kĩĩrĩgĩrĩro kĩu, thoma gĩcunjĩ kĩrĩ na kĩongo “Tumaini Bora la Wakati Ujao.”