Hihi Aira a Jehova nĩ Gũcokanĩrĩria Macokanagĩrĩria Famĩlĩ Kana nĩ Gũciharagania?

Ithuĩ Aira a Jehova nĩ twĩrutanagĩria gũcokereria famĩlĩ citũ, o hamwe na famĩlĩ cia andũ arĩa angĩ. Nĩ tũtĩĩte Ngai arĩ we mwambĩrĩria wa famĩlĩ. (Kĩambĩrĩria 2:21-24; Aefeso 3:14, 15) Thĩinĩ wa Bibilia, nĩ andĩkithĩtie motaaro mateithĩtie andũ thĩinĩ wa thĩ yothe kũgĩa na ihiko irĩ na hinya na irĩ na gĩkeno.

Ũrĩa Aira a Jehova Mateithagia Famĩlĩ Gũkorũo na Hinya

Nĩ twĩrutanagĩria kũrũmĩrĩra motaaro ma Bibilia, marĩa matũteithagia gũtuĩka athuri, atumia, na aciari ega. (Thimo 31:10-31; Aefeso 5:22–6:4; 1 Timotheo 5:8) Ũũgĩ ũrĩa ũrĩ thĩinĩ wa Bibilia nĩ ũteithagia nginya famĩlĩ iria andũ marĩ na wĩtĩkio ngũrani igaacĩre. (1 Petero 3:1, 2) Reke tuone maũndũ mamwe maugĩtwo nĩ andũ matarĩ Aira a Jehova thutha wa arĩa mahikanĩtie nao gũtuĩka Aira a Jehova:

• “Mĩaka ĩtandatũ ya mbere nĩ twakararanagia mũno na ũndũ ũcio ũgatũma tũkue ngoro.No rĩrĩa Ivete aatuĩkire Mũira wa Jehova, nĩ aambĩrĩirie kũnyonia wendo o na makĩria na gũkorũo na wetereri. Mogarũrũku marĩa eekire nĩ maahonokirie kĩhiko gitũ.—Clauir, kuuma Brazil.

• “Rĩrĩa mũthuri wakwa Chansa aambĩrĩirie kwĩruta Bibilia na Aira a Jehova, ndiakenirio nĩ ũndũ ũcio tondũ ndeeciragia atĩ nĩ matũmaga famĩlĩ iharagane. No kuuma hĩndĩ ĩyo nĩ nyonete atĩ Bibilia nĩ ĩteithĩtie kĩhiko gitũ mũno.”—Agness, kuuma Zambia.

Rĩrĩa tũrahunjia, nĩ tũteithagia andũ angĩ kuona ũrĩa ũũgĩ ũrĩa ũrĩ thĩinĩ wa Bibilia ũngĩmateithia

• Gũthuura na njĩra ya ũũgĩ mũndũ wa kũhikania nake

• Kũhiũrania na mathĩna mwaka-inĩ wa mbere wa kĩhiko

• Kũrũmbũyania na andũ a famĩlĩ ya mũthuri kana ya mũtumia

• Kũhũthĩra mbeca na njĩra njega

• Gũtiga gũkararania

• Kwĩruta kuohanĩra

• Kũmenyeria ciana

Hihi gũcenjia ndini nĩ kũrehaga mathĩna thĩinĩ wa kĩhiko?

Rĩmwe na rĩmwe nĩ kũrehaga. Riboti ĩmwe ya ũthuthuria yekirũo nĩ kambuni ya Sofres mwaka wa 1998 yoonanirie atĩ nĩ kuumagĩra mathĩna kĩhiko-inĩ 1 harĩ ihiko 20 iria ũmwe wao atuĩkĩte Mũira wa Jehova.

Jesu aarathĩte atĩ andũ arĩa marũmagĩrĩra morutani make rĩmwe na rĩmwe nĩ marĩkoragwo na mathĩna ma famĩlĩ. (Mathayo 10:32-36) Mũthuthuria wa maũndũ ma historĩ wĩtagwo Will Durant aaugire atĩ rungu rwa wathani wa Roma, “Ũkristiano woonekanaga ũrĩ gĩtũmi kĩa famĩlĩ kũgayũkana,”a na Aira a Jehova amwe ũmũthĩ nĩ mathitangagwo nĩ ũndũ wa gĩtũmi o ta kĩu. Hihi ũguo nĩ kuuga atĩ mũndũ ũrĩa Mũira wa Jehova thĩinĩ wa famĩlĩ nĩwe ũtũmaga ĩkorũo na mathĩna?

Igooti Inene rĩa Rũraya rĩa Ihooto cia Andũ rĩgĩtua itua rĩgiĩ kana Aira a Jehova nĩ matũmaga famĩlĩ iharagane rĩaugire atĩ mũndũ ũrĩa ũtarĩ Mũira wa Jehova thĩinĩ wa famĩlĩ kaingĩ nĩwe ũtũmaga kũgĩe na mathĩna tondũ wa kũrega “gwĩtĩkĩra na kũhe gĩtĩo wĩyathi wa mũthuri kana wa mũtumia wa gũthathaiya kũringana na ndini yake.” Igooti rĩu rĩoongereire ũũ: “Mathĩna maya maumagĩra thĩinĩ wa famĩlĩ ciothe iria ikoragwo igayũkanĩte kĩndini to cia Aira a Jehova.”b O na rĩrĩa Aira a Jehova macemania na ũkararia thĩinĩ wa famĩlĩ ciao, nĩ merutanagĩria kũrũmĩrĩra ũtaaro ũyũ wa Bibilia: “Mũtikanarĩhe ũũru na ũũru harĩ mũndũ o na ũrĩkũ. . . . Kũngĩhoteka, ĩkagai o ũrĩa wothe mũngĩhota mũkoragwo na thayũ hamwe na andũ othe.”—Aroma 12:17, 18.

Kĩrĩa gĩtũmaga Aira a Jehova metĩkie atĩ magĩrĩirũo kũhika kana kũhikania na andũ a ndini yao

Aira a Jehova makoragwo magĩathĩkĩra ũtaaro wa Bibilia wa kũhika kana kũhikania “thĩinĩ wa Mwathani tu,” ũguo nĩ kuuga kũhika kana kũhikania na mũndũ mũrĩ na wĩtĩkio ũmwe. (1 Akorintho 7:39) Ũtaaro ũcio nĩ wa kĩĩmaandĩko na nĩ ũrĩ ũguni. Kwa ngerekano, gĩcunjĩ kĩmwe kĩandĩkirũo ibuku-inĩ rĩa Journal of Marriage and Family mwaka wa 2010 kĩaugire atĩ “ihiko iria andũ erĩ makoragwo marĩ a ndini ĩmwe na magakorũo na wĩtĩkio ũmwe” nĩ ikoragwo na gĩkeno makĩria.c

O na kũrĩ ũguo, Aira a Jehova matiĩkĩraga ngoro mũndũ atigane na ũrĩa mahikanĩtie nake angĩkorũo ti Mũira wa Jehova. Bibilia yugaga ũũ: “Mũrũ wa Ithe witũ o wothe angĩkorũo na mũtumia ũtarĩ mwĩtĩkia na mũtumia ũcio akorũo nĩ aretĩkĩra gũikarania nake, ndakamũtige; na mũtumia angĩkorũo na mũthuri ũtarĩ mwĩtĩkia na mũthuri ũcio akorũo nĩ aretĩkĩra gũikarania nake, ndagatige mũthuriwe.” (1 Akorintho 7:12, 13) Aira a Jehova nĩ mathĩkagĩra watho ũcio.