Joseph Ooimagaririo nĩ Thigari
Angĩkorũo ũrĩ Mũira wa Jehova-rĩ, hihi no ũhũũre mbica ũkiumagario nĩ thigari ũkĩhunjia ũhoro mwega nyũmba kwa nyũmba? Ũguo nĩguo gwathiire harĩ Joseph gĩcigo-inĩ kĩa Micronesia mwaka wa 2017. We na Aira a Jehova angĩ atatũ maarĩ na kambĩini ya mwanya ya gũkinyĩra andũ arĩa maaikaraga icigĩrĩra-inĩ cia kũraihu.
Kĩndũ ta thaa thita, Aira a Jehova acio ana magĩkinya gĩcigĩrĩra-inĩ kĩnini kĩarĩ na andũ ta 600. Marĩ hũgũrũrũ-inĩ cia iria, nĩ maageithirio nĩ mũnene wa gĩcigĩrĩra kĩu. Joseph aataarĩirie ũrĩa gwacokire gũgĩthiĩ akiuga: “Mũnene ũcio aatwĩrire atĩ ngaari ya thigari nĩ ĩngĩatũtwarire mĩciĩ-inĩ yothe. Nĩ twagegirio nĩ ũndũ ũcio, no tũkĩrega na njĩra ya gĩtĩo. Tweendaga gũceerera andũ na njĩra ĩrĩa tũmenyerete tũgĩthiĩ nyũmba kwa nyũmba.”
Ahunjia acio makĩambĩrĩria gũthiĩ, mehotorete kũhunjĩria andũ aingĩ o ũrĩa kwahoteka. Mooigire ũũ: “Andũ acio maarĩ anyitani ũgeni na nĩ maakenirio nĩ ndũmĩrĩri itũ. Nĩ ũndũ ũcio, twahũthĩrire ihinda iraihu gũkĩra rĩrĩa twerĩgĩrĩire kũhũthĩra harĩ o nyũmba.”
Thutha-inĩ mũthenya ũcio, ngaari ya thigari yahĩtũkire Joseph maita merĩ ĩgĩcoka ĩkĩrũgama rĩrĩa yahĩtũkaga riita rĩa gatatũ. Thigari icio ikĩũria Joseph kana no imũtware mĩciĩ ĩrĩa aatigĩtie gũceerera. Joseph ooigire ũũ: “Ndameerire aca. No riita rĩrĩ magĩthingata mũno makĩnjĩra, ‘Wĩ na ihinda inini rĩtigarĩte, kwoguo nĩ tũgũgũtwara mĩciĩ ĩrĩa ũtigĩtie.’ Ndingĩaregire rĩngĩ tondũ nĩ ndatigĩtie mĩciĩ mĩingĩ. Tũgĩthiĩ o mũciĩ, thigari icio cianjĩraga rĩĩtwa rĩa famĩlĩ ĩyo na ikanjĩĩra atĩ kwaga mũndũ wa kũhingũra mũrango ndaringaringa, nĩ cingĩahũũrire honi nĩguo ciĩte mwene nyũmba.”
Tũrĩ na ũteithio ũcio, nĩ twahotire gũceerera mĩciĩ yothe mũthenya ũcio. Nĩ twaheanire mabuku maingĩ na tũkĩbanga ũrĩa tũngĩgacokera andũ arĩa maakenetio nĩ ndũmĩrĩri itũ.
Thigari icio cierire Joseph atĩ nĩ ciakeneire mũno “kũnyita itemi harĩ gũtheremia ũhoro mwega.” Rĩrĩa Aira a Jehova acio mooimaga kũu riũa rĩgĩthũa, thigari iria ciarĩ hũgũrũrũ-inĩ cia iria ciamoigĩire ũhoro ikenete na inyitĩte mabuku maaragĩrĩria ũhoro wa Bibilia.