Ihinda Rĩega Mũno Rĩũkĩte
Ica ikuhĩ, Shaitani na ndaimono nĩ mekũhingĩrũo matige kũhĩtithia andũ
Shaitani na ndaimono ciake matigũtũũra maheenagia andũ. Jehova nĩ aamaingatire kuuma igũrũ. (Kũguũrĩrio 12:9) Ica ikuhĩ, Ngai nĩ ekuoera Shaitani na ndaimono ciake ikinya o rĩngĩ. Mũtũmwo Johana ooigire ũũ thutha wa kuona kĩoneki kuuma kũrĩ Ngai: “Na ngĩona mũraika agĩikũrũka kuuma igũrũ arĩ na cabi ya irima rĩrĩa rĩtarĩ gĩturi na guoko-inĩ gwake anyitĩte mũnyororo mũnene. Akĩnyita ndamathia ĩrĩa, na noyo nyoka ĩrĩa ya tene, o we wĩtagwo Mũcukani na Shaitani, akĩmuoha ihinda rĩa mĩaka 1,000. Akĩmũikia irima rĩrĩa rĩtarĩ gĩturi, akĩrĩhinga na akĩrĩĩkĩra mũhũũri, nĩguo ndagacoke kũhĩtithia ndũrĩrĩ rĩngĩ o nginya mĩaka ĩyo 1,000 ĩthire.” (Kũguũrĩrio 20:1-3) Thutha ũcio, Mũcukani na ndaimono ciake makaanangwo tene na tene.— Kũguũrĩrio 20:10.
Andũ arĩa oru thĩinĩ wa thĩ o nao nĩ makaaniinwo.—Thaburi 37:9, 10; Luka 13:5.
Andũ Arĩa Makuĩte nĩ Magaacoka Muoyo!
Andũ arĩa makuĩte nĩ magaacokio muoyo gũkũ thĩ
Thutha wa Shaitani na ndaimono kweherio, Jehova nĩ akaarehera andũ irathimo nyingĩ. Ririkana atĩ andũ arĩa makuĩte matikoragwo muoyo. Jesu aaringithanirie gĩkuũ na toro—toro mũritũ ũtarĩ na iroto. (Johana 11:11-14) Eekire ũguo tondũ nĩ aamenyaga atĩ nĩ kũrĩ hingo ĩngĩgooka rĩrĩa andũ arĩa makuĩte mangĩgaacokio muoyo. Ooigire ũũ: “Ihinda nĩ rĩroka, rĩrĩa arĩa othe marĩ thĩinĩ wa mbĩrĩra . . . [makoima] kuo.”—Johana 5:28, 29; ringithania na Atũmwo 24:15.
Magaacokio muoyo gũkũ thĩ. Ithenya rĩa imenyithia cia ikuũ, tũkaaiguaga ũhoro wa gĩkeno wa andũ arĩa macoketio muoyo! Gĩgaakorũo kĩrĩ gĩkeno kĩnene mũno kũnyita ũgeni endwa aitũ arĩa makooima mbĩrĩra-inĩ!