Ithomo rĩa 2
Ngai Nũũ?
Ngai wa ma nũũ, na rĩĩtwa rĩake nĩ rĩrĩkũ? (1, 2)
We arĩ mwĩrĩ wa mũthemba ũrĩkũ? (3)
Ngumo ciake iria cia mwanya makĩria nĩ irĩkũ? (4)
Hihi no tũhũthĩre mĩhaano na mĩhianano kũmũthathayia? (5)
Nĩ kũgerera njĩra irĩkũ igĩrĩ tũngĩĩruta ũhoro ũkoniĩ Ngai? (6)
1. Andũ mathathayagia indo nyingĩ. No Bibilia ĩtwĩraga atĩ kũrĩ Ngai o ũmwe tu wa MA. We nĩwe wombire indo ciothe igũrũ na thĩ. Tondũ nĩwe watũheire muoyo-rĩ, nowe wiki tu Ũrĩa twagĩrĩirũo nĩ gũthathayia.—1 Akorintho 8:5, 6; Kũguũrĩrio 4:11.
2. Ngai arĩ marĩĩtwa maingĩ ma ũnene. Ĩndĩ arĩ rĩĩtwa o rĩmwe tu. Rĩĩtwa rĩu nĩ JEHOVA. Thĩinĩ wa Bibilia nyingĩ, rĩĩtwa rĩa Ngai nĩrĩeheretio na handũ harĩo hagacokio marĩĩtwa ma ũnene MWATHANI kana NGAI. No rĩrĩa Bibilia yaandĩkirũo-rĩ, rĩĩtwa Jehova rĩonekanaga thĩinĩ wayo hakuhĩ maita 7,000!—Thama 3:15; Thaburi 83:18.
3. Jehova nĩ arĩ mwĩrĩ, no ti ta witũ. “Ngai nĩ roho,” nĩguo Bibilia yugaga. (Johana 4:24) Roho nĩ mũthemba wa muoyo wa igũrũ makĩria ya witũ. Gũtirĩ mũndũ ũrĩ ona Ngai hingo o na ĩrĩkũ. Jehova atũũraga igũrũ, ĩndĩ no ahote kuona indo ciothe. (Thaburi 11:4, 5; Johana 1:18) No roho mũtheru nĩ kĩĩ? Ũcio ti mũndũ ta ũrĩa Ngai arĩ mũndũ. Handũ ha ũguo-rĩ, ũcio nĩ hinya wa Ngai wa wĩki.—Thaburi 104:30.
4. Bibilia nĩ ĩtũguũragĩria ũ-mũndũ wa Jehova. Ĩtuonagia atĩ ngumo ciake irĩa cia mwanya makĩria nĩ wendani, kĩhooto, ũũgĩ, na hinya. (Gũcokerithia Maathani 32:4; Ayubu 12:13; Isaia 40:26; 1 Johana 4:8) Bibilia ĩtwĩraga atĩ o na ningĩ we nĩ mũigua-tha, mũtugi, mwohanĩri, mũtaana, na mũkirĩrĩria. Ithuĩ, tũrĩ ta ciana ciake njathĩki, twagĩrĩirũo tũgerie kwĩgerekania nake.—Aefeso 5:1, 2.
5. Hihi no tũinamĩrĩre kana tũhoe mĩhianano, mbica, kana mĩhiano ũthathayia-inĩ witũ? Aca! (Thama 20:4, 5) Jehova oigĩte atĩ no mũhaka tũmũthathayie o we wiki tu. We ndangĩgwatanĩra riri wake na ũngĩ o na ũrĩkũ kana na kĩndũ kĩngĩ o na kĩrĩkũ. Mĩhianano ndĩrĩ hinya wa gũtũteithia.—Thaburi 115:4-8; Isaia 42:8.
6. Nĩ atĩa tũngĩhota kũmenya Ngai wega makĩria? Njĩra ĩmwe nĩ ya gũtuĩria indo iria ombĩte na gwĩciria mũno ũrĩa indo icio itwĩraga. Ũũmbi wa Ngai ũtuonagia atĩ we arĩ na hinya na ũũgĩ mũingĩ. Tuonaga wendani wake thĩinĩ wa indo ciothe iria we ombĩte. (Thaburi 19:1-6; Aroma 1:20) Njĩra ĩngĩ ĩrĩa tũngĩhota kwĩruta ũhoro ũkoniĩ Ngai nĩ kwĩruta Bibilia. Thĩinĩ wayo we atwĩraga maũndũ maingĩ makĩria igũrũ rĩa we nĩ Ngai wa mũthemba ũrĩkũ. O na ningĩ we nĩatwĩraga ũhoro wa muoroto wake na maũndũ marĩa endaga twĩke.—Amosi 3:7; 2 Timotheo 3:16, 17.
[Pictures on page 5]
Twĩrutaga ũhoro ũkoniĩ Ngai kuumanagia na ũũmbi na kuuma thĩinĩ wa Bibilia