Ithomo rĩa 4
Mũcukani Nũũ?
Shaitani Mũcukani—oimire kũ? (1, 2)
Shaitani ahĩtithagia andũ atĩa? (3-7)
Nĩũndũ kĩ waagĩrĩirũo ũkararie Mũcukani? (7)
1. Kiugo “mũcukani” kiugaga mũndũ waragia maheeni moru mũno igũrũ rĩa mũndũ ũngĩ. Kiugo “shaitani” kiugaga thũ kana mũkararia. Macio nĩ marĩĩtwa maaheirũo thũ ĩrĩa nene ya Ngai. Kĩambĩrĩria-inĩ, aarĩ mũraika mũkinyanĩru kũu igũrũ e hamwe na Ngai. O na kũrĩ ũguo-rĩ, thutha-inĩ, nĩetĩĩire mũno akĩenda ũthathayia ũrĩa ũrĩ kĩhooto kĩa Ngai.—Mathayo 4:8-10.
2. Mũraika ũcio, Shaitani, aaririe na Hawa kũgerera nyoka. Aamwĩrire maheeni, agĩtũma aremere Ngai. Kwoguo Shaitani aatharĩkĩire kĩrĩa gĩĩtagwo “wathani mũnene” wa Ngai, kana ũnene arĩ We Ũrĩa wĩ Igũrũ Mũno. Shaitani ekĩrire nganja kana Ngai aathanaga na njĩra yaagĩrĩire na ya kũguna biũ raiya Ake. O na ningĩ Shaitani nĩekĩrire nganja kana mũndũ o na ũrĩkũ no ahote gũikara arĩ mwĩhokeku ũthingu-inĩ harĩ Ngai. Nĩũndũ wa gwĩka ũguo-rĩ, Shaitani etuire thũ ya Ngai. Nĩkĩo aatuĩkire wa gwĩtagwo Shaitani Mũcukani.—Kĩambĩrĩria 3:1-5; Ayubu 1:8-11; Kũguũrĩrio 12:9.
3. Shaitani ageragia kũheenia andũ nĩguo mamũthathayie arĩ we. (2 Akorintho 11:3, 14) Njĩra ĩmwe ĩrĩa ahĩtithagia andũ nayo nĩ kũgerera ndini ĩtarĩ ya ma. Ndini ĩngĩrutana maheeni igũrũ rĩa Ngai, ĩo kũna kũna ĩtũmĩkagĩra muoroto wa Shaitani. (Johana 8:44) Andũ arĩa marĩ a ndini itarĩ cia ma no metĩkie me na ngoro theru atĩ mathathayagia Ngai wa ma. Ĩndĩ ma nĩ atĩ o matungatagĩra Shaitani. We nĩwe ‘ngai ya thĩ ĩno.’—2 Akorintho 4:4.
4. Kũrongoreria ngoma nĩ njĩra ĩngĩ ĩrĩa Shaitani ahũthagĩra kũrehe andũ ruungu rwa ũhoti wake. Hihi maahota kũhoya ngoma icio imagitĩre, ithũkie andũ arĩa angĩ, irathe ũhoro wa mahinda marĩa mokĩte, kana iringe ciama. Shaitani nĩwe hinya mũũru ũrĩa ũhotithagia maũndũ macio memenyeretio. Nĩguo tũkenie Ngai, no mũhaka twage kũhutania o na hanini na ũrongoreria ngoma.—Gũcokerithia Maathani 18:10-12; Atũmwo 19:18, 19.
5. O na ningĩ Shaitani nĩahĩtithagia andũ kũgerera mwĩtĩo mũkĩru wa mũndũ gũkorũo arĩ wa rũruka rũna na ũthathayia wa mathondeka ma ũteti. Amwe meiguaga atĩ rũũrĩrĩ kana rũruka rwao nĩ rwa bata gũkĩra rwa arĩa angĩ. No ũguo ti ma. (Atũmwo 10:34, 35) Andũ angĩ mehokaga mathondeka ma ũteti maniine mathĩna ma andũ. Nĩũndũ wa gwĩka ũguo, makarega Ũthamaki wa Ngai. Nĩguo kĩhonia o kĩo giiki tu kĩa mathĩna maitũ.—Danieli 2:44.
6. Njĩra ĩngĩ Shaitani ahũthagĩra kũhĩtithia andũ nĩ kũmaguucĩrĩria na merirĩria ma mehia. Jehova atwĩraga tũtheme kwĩmenyeria mehia tondũ we nĩoĩ nĩmatũthũkagia. (Agalatia 6:7, 8) Hihi andũ angĩ maahota kwenda ũnyitanĩre nao maũndũ-inĩ macio memenyeretie. No, ririkana atĩ ma nĩ atĩ Shaitani nĩwe wendaga wĩke maũndũ macio.—1 Akorintho 6:9, 10; 15:33.
7. Hihi Shaitani aahota kũhũthĩra kĩnyariro kana ũkararia nĩguo atũme ũtige Jehova. Hihi kwahoteka amwe a endwa aku makaarakara mũno nĩũndũ nĩũreruta Bibilia. Hihi kwahoteka angĩ makũnyũrũrie. No nũũ ũkũheete muoyo? Shaitani endaga wĩtigĩre nĩguo ũtige kwĩruta ũhoro wa Jehova. Ndũgetĩkĩrie Shaitani akũhoote! (Mathayo 10:34-39; 1 Petero 5:8, 9) Ũngĩkararia Mũcukani-rĩ, wahota gũkenia Jehova na wonanie atĩ wee ũnyitaga mbaru wathani Wake mũnene.—Thimo 27:11.
[Pictures on page 9]
Ndini ĩtarĩ ya ma, kũrongoreria ngoma, na gũtũũgĩria rũũrĩrĩ, kũhĩtithagia andũ
[Mbica karatathi ka 9]
Kararia Shaitani na ũndũ wa gũthiĩ na mbere kwĩruta ũhoro wa Jehova