Ithomo rĩa 5

Muoroto wa Ngai Harĩ Thĩ Nĩ Ũrĩkũ?

Jehova ombire thĩ nĩũndũ kĩ? (1, 2)

Nĩũndũ kĩ thĩ ti paradiso rĩu? (3)

Andũ arĩa oru magekwo atĩa? (4) Nĩ atĩa Jesu agekĩra andũ arĩa arũaru? arĩa akũrũ? arĩa akuũ? (5, 6)

Nĩguo ũgwatanĩre thĩinĩ wa irathimo cia mahinda marĩa mokĩte-rĩ, wee waagĩrĩirũo nĩ gwĩka atĩa? (7)

1. Jehova ombire thĩ ĩno nĩguo andũ makenere gũtũũra thĩinĩ wayo tene na tene. Endaga thĩ ĩikaragwo hingo ciothe nĩ andũ athingu, me na gĩkeno. (Thaburi 115:16; Isaia 45:18) Thĩ ndĩkaanangwo o na rĩ; ĩgũtũũra tene na tene.—Thaburi 104:5; Kohelethu 1:4.

2. Mbere ya Ngai gũthondeka mũndũ-rĩ, We aacagũrire gacunjĩ kamwe ga thĩ agĩgatua paradiso thaka. Aamĩĩtire mũgũnda wa Edeni. Hau nĩho aigire mũndũ-mũrũme na mũndũ-wa-nja a mbere, Adamu na Hawa. Ngai orotete atĩ magĩe na ciana na maiyũre thĩ yothe. Nĩmaangĩatuire thĩ yothe paradiso kahora kahora.—Kĩambĩrĩria 1:28; 2:8, 15.

3. Adamu na Hawa nĩmehirie na ũndũ wa kuuna watho wa Ngai na rũtũrĩko. Kwoguo Jehova akĩmaingata kuuma mũgũnda wa Edeni. Paradiso ĩgĩteo. (Kĩambĩrĩria 3:1-6, 23) No Jehova ndaariganĩirũo nĩ muoroto wake ũkoniĩ thĩ ĩno. We eranagĩra atĩ nĩarĩmĩtua paradiso, andũ mamĩtũũre tene na tene. We arĩĩka ũguo atĩa?—Thaburi 37:29.

4. Mbere ya thĩ ĩno gũtuĩka paradiso, no mũhaka andũ oru meherio. (Thaburi 37:38) Ũguo ũgekĩka hĩndĩ ya Hari–Magedoni, ĩrĩa arĩ mbaara ya Ngai ya kũniina waganu. Thutha ũcio, Shaitani ohwo mĩaka 1,000. Ũguo ũkuonania atĩ gũtirĩ andũ oru magatigio a gũthũkia thĩ. Andũ a Ngai oiki tu nĩo makahonoka.—Kũguũrĩrio 16:14, 16; 20:1-3.

5. Nĩguo Jesu Kristo agaathana arĩ Mũthamaki igũrũ rĩa thĩ ĩno mĩaka 1,000. (Kũguũrĩrio 20:6) We akeheria mehia kuuma thĩinĩ wa meciiria na mĩĩrĩ iitũ kahora kahora. Tũgatuĩka andũ akinyanĩru ta ũrĩa Adamu na Hawa maarĩ matanehia. Tũtigacoka rĩngĩ kũrũara, gũkũra, kana gũkua. Andũ arũaru nĩmakahonio, na arĩa akũrũ methĩhe rĩngĩ.—Ayubu 33:25; Isaia 33:24; Kũguũrĩrio 21:3, 4.

6. Hingo ya Wathani wa Mĩaka Ngiri wa Jesu, andũ akinyanĩru magekĩra kĩo magarũre thĩ yothe ĩtuĩke paradiso. (Luka 23:43) Ningĩ, mamilioni ma arĩa akuũ nĩmakariũkio magĩe na muoyo wa kĩĩmũndũ gũkũ thĩ. (Atũmwo 24:15) Mangĩĩka ũrĩa Ngai endaga meke-rĩ, o magaathiĩ na mbere gũtũũra gũkũ thĩ tene na tene. Mangĩaga gwĩka ũguo, makaanangwo tene na tene.—Johana 5:28, 29; Kũguũrĩrio 20:11-15.

7. Ũguo nĩguo muoroto wa mbere wa Ngai harĩ thĩ ũkaagacĩra. Hihi wee no wende kũgwatanĩra thĩinĩ wa irathimo icio cia mahinda marĩa mokĩte? Aakorũo nĩguo-rĩ, wee ũbataire ũthiĩ na mbere kwĩruta ũhoro wa Jehova na gwathĩkĩra wendi wake. Gũkorũo mĩcemanio-inĩ thĩinĩ wa Nyũmba ya Ũthamaki ya Aira a Jehova ya kwanyu nĩgũgũgũteithia wĩke ũguo.—Isaia 11:9; Ahibirania 10:24, 25.

[Mbica karatathi ka 10]

Paradiso ĩrĩa yateirũo

[Pictures on page 11]

Thutha wa Hari–Magedoni, thĩ nĩĩgatuo paradiso