Mũgũnda wa Gĩkeno (Paradiso) Ũrĩa Ũgwetetwo Thĩinĩ wa Bibilia Ũgaakorũo Kũ?

Athomi Aitũ Maroria Atĩrĩ . . .

Mũgũnda wa Gĩkeno (Paradiso) Ũrĩa Ũgwetetwo Thĩinĩ wa Bibilia Ũgaakorũo Kũ?

▪ Jesu eerire mũndũ ũrĩa maambanĩirio hamwe na wamwĩtĩkirie ategwĩtigĩra ũũ: “Nĩũrĩkorũo ũrĩ hamwe na niĩ [mũgũnda-inĩ wa Ngai wĩ gĩkeno].” (Luka 23:43; kohoro ka magũrũ-inĩ) Mũndũ ũcio angĩgaakorũo kũ? Hihi Paradiso ĩngĩgaakorũo igũrũ, gũkũ thĩ, kana kũndũ kũngĩ kũrĩa andũ makoragwo metereire gũcirithio?

Aciari aitũ a mbere kwĩ hĩndĩ maaikaraga Paradiso. Bibilia ĩtwĩraga ũũ: “Naguo mwena ũrĩa riũa rĩrathagĩra, Jehova Ngai agĩthondeka mũgũnda mũirigĩre, o kũrĩa gwetagwo Edeni, na akĩũhanda; na nĩho aaigire mũndũ ũcio ombĩte. . . . Nake Jehova Ngai agĩtwara mũndũ ũcio ombĩte akĩmũiga mũgũnda ũcio warĩ kũu Edeni, aũrutage wĩra, na aũikaragie.” (Kĩambĩrĩria 2:⁠8, 15) Rĩrĩa ciugo icio ciataũrirũo na Kĩgiriki-rĩ, kiugo “mũgũnda” gĩataũrirũo pa·raʹdei·sos, na hau nĩho kiugo gĩa Gĩkũyũ “paradiso” kĩoimire.

O ta ũrĩa andũ mahikanĩtie mangĩararamia nyũmba yao magĩa na ciana nyingĩ-rĩ, noguo o na aciari aitũ a mbere meerĩgĩrĩirũo maramie Paradiso ya mũgũnda ũcio wa Edeni o ũrĩa mangĩathire makĩingĩhaga. Ngai aameerire ũũ: “Mũiyũre thĩ, na mũmĩtorie.”—⁠Kĩambĩrĩria 1:⁠28.

Muoroto wa Mũũmbi hĩndĩ ĩyo warĩ andũ matũũre thĩinĩ wa Paradiso gũkũ thĩ na maciare ciana marĩ kuo. Mangĩatũũrire gũkũ thĩ mũgũnda-inĩ mũthaka na matekũbatara mbĩrĩra. Thĩ yarĩ ĩtuĩke mũciĩ wa tene na tene wa andũ othe. Na nĩkĩo tũkenagio mũno nĩ maũndũ ma ndũire marĩa makoragwo gũkũ thĩ! Twombirũo tũtũũre thĩinĩ wa thĩ thaka.

Hihi muoroto wa Ngai nĩ wagarũrũkire? Aca. Tondũ Jehova atwĩraga na ma ũũ: “Ũguo noguo ũhoro ũrĩa ũkoima kanua gakwa ũgaikara; ũhoro ũcio ndũkanjokerera o ro ũguo tũhũ, no nĩ kũhingia ũkahingia ũndũ ũrĩa nyendete wĩkwo, na ũrute wĩra ũrĩa ndaũrekeirie, wagĩre wega.” (Isaia 55:11) Makĩria ma mĩaka 3,000 thutha wa mũndũ kũũmbwo-rĩ, Bibilia nĩ yoigire ũhoro wa ũrĩa “wathondekire thĩ, agĩtũma ĩgĩe,” atĩ “ndaamĩũmbire hatarĩ ũrĩa yatariĩ” no “aamĩũmbire ĩtũũragwo nĩ andũ.” (Isaia 45:18) Wendi wa Ngai ndũgarũrũkĩte. Thĩ no ĩgaatuĩka paradiso.

Maita maingĩ rĩrĩa Bibilia ĩkũgweta ũhoro wa Paradiso, ĩkoragwo ĩgĩtaarĩria ũtũũro wa gũkũ thĩ. Kwa ngerekano-rĩ, ũrathi ũmwe wa Isaia ugaga ũũ: “Nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo.” (Isaia 65:21) Nyũmba ciakagwo kũ, na mĩthabibũ ĩhandagwo kũ? Ĩ maciaro marĩagĩrũo kũ? Gũkũ thĩ. Thimo 2:21 yugaga ũũ: “Andũ arĩa arũngĩrĩru nĩo a gũtũũra bũrũri [kana thĩ].”

Jesu o nake nĩ aaririe ũhoro wa paradiso ĩrĩa ĩgaakorũo gũkũ thĩ. Nĩ ma, ningĩ no eeranĩire paradiso ĩrĩa ĩngĩgaakorũo igũrũ, no ĩyo no ya gũgaatũũrũo nĩ andũ anini arĩa mathuurĩtwo. (Luka 12:32) Thutha wa gũkua, acio mariũkagio magathiĩ Paradiso ĩyo ya igũrũ magathamake hamwe na Kristo igũrũ rĩa Paradiso ya gũkũ thĩ. (Kũguũrĩrio 5:10; 14:⁠1-3) Acio magaathamaka hamwe na Kristo magaatigĩrĩra atĩ Paradiso ya gũkũ thĩ nĩ ĩrarũgamĩrĩrũo wega na kũmenyererũo kũringana na ithimi cia Ngai.

Jesu nĩ aamenyaga atĩ ũcio nĩguo wendi wa Ngai harĩ thĩ. Ningĩ aarĩ igũrũ hamwe na Ithe rĩrĩa mũgũnda wa Edeni wombirũo. Andũ arĩa othe monanagia wĩtĩkio ũmũthĩ marĩ na mweke wa gũgaatũũra thĩinĩ wa paradiso ĩrĩa igaakorũo gũkũ thĩ. (Johana 3:16) Harĩ mũndũ ta ũcio-rĩ, Jesu aramwĩra ũũ: “Nĩũrĩkorũo ũrĩ hamwe na niĩ [mũgũnda-inĩ wa Ngai wĩ gĩkeno].”—⁠Luka 23:43; kohoro ka magũrũ-inĩ.

[Mbica karatathi ka 10]