Ithomo rĩa 11

Wĩtĩkio na Mĩtugo Ĩtakenagia Ngai

Nĩ Mĩthemba ĩrĩkũ ya wĩtĩkio na mĩtugo mĩũru? (1)

Hihi Akristiano nĩmaagĩrĩirũo nĩ gwĩtĩkia atĩ Ngai nĩ Ũtatũ? (2)

Nĩũndũ kĩ Akristiano a ma matikũngũyagĩra Krismasi, Ista, kana mĩthenya ya gũciarũo? (3, 4)

Hihi akuũ maahota gwĩka ũũru arĩa me muoyo? (5)

Hihi Jesu aakuĩrĩire mũtharaba-inĩ? (6) Nĩ ũndũ wa bata ta atĩa gũkenia Ngai? (7)

1. Ti wĩtĩkio na mĩtugo o yothe mĩũru. No Ngai ndamĩtĩkagĩra angĩkorũo yumanĩte na ndini itarĩ cia ma kana ĩngĩkararania na morutani ma Bibilia.—Mathayo 15:6.

2. Ũtatũ: Hihi Jehova nĩ Ũtatũ—andũ atatũ thĩinĩ wa Ngai ũmwe? Aca! Jehova, Ithe witũ, nĩ “Ngai ũrĩa ũmwe wa ma.” (Johana 17:3; Mariko 12:29) Jesu nĩ Mũriũ Wake wa irigithathi, na nĩaathĩkagĩra Ngai. (1 Akorintho 11:3) Ithe nĩ mũnene kũrĩ Mũriũ. (Johana 14:28) Roho mũtheru ti mũndũ; nĩ hinya wa wĩki wa Ngai.—Kĩambĩrĩria 1:2; Atũmwo 2:18.

3. Krismasi na Ista: Jesu ndaaciarirũo Disemba 25. Aaciarirũo ta Okutomba 1 ũguo, hingo ya mwaka rĩrĩa arĩithi maaigaga ndũũru ciao nja ũtukũ. (Luka 2:8-12) Jesu ndaigana o na rĩ gwatha Akristiano makũngũĩre gũaciarũo gwake. Handũ ha ũguo-rĩ, eerire arutwo ake makũngũyagĩre, kana maririkanage, gĩkuũ gĩake. (Luka 22:19, 20) Krismasi na mĩtugo yayo yumanaga na ndini itarĩ cia ma cia tene. Na no taguo mĩtugo ya Ista, ta ĩrĩa ya kũhũthĩra matumbĩ na mbũkũ. Akristiano a mbere matiakũngũyagĩra Krismasi kana Ista, na o na Akristiano a ma a rĩu maticikũngũyagĩra.

4. Mĩthenya ya Gũciarũo: Gũkũngũĩrwo kwa mĩthenya ya gũaciarũo ĩĩrĩ ĩrĩa o yo iiki tu ĩgwetagwo thĩinĩ wa Bibilia gwekirũo nĩ andũ mataathathayagia Jehova. (Kĩambĩrĩria 40:20-22; Mariko 6:21, 22, 24-27) Akristiano a mbere matiakũngũyagĩra mĩthenya ya gũciarũo. Mĩtugo ya gũkũngũĩra mĩthenya ya gũciarũo yumanaga na ndini itarĩ cia ma cia tene. Akristiano a ma maheanaga iheo na magakorũo na mahinda ma gwĩkenia hamwe mahinda mangĩ mwaka-inĩ.

5. Gwĩtigĩra Akuũ: Akuũ gũtirĩ ũndũ mangĩhota gwĩka o na kana kũigua ũndũ o na ũrĩkũ. Ithuĩ tũtingĩhota kũmateithia, nao matingĩhota gũtwĩka naĩ. (Thaburi 146:4; Kohelethu 9:5, 10) Muoyo nĩũkuaga; ndũthiaga na mbere gũtũũra thutha wa gũkua. (Ezekieli 18:4) Ĩndĩ mahinda mangĩ araika arĩa oru, metagwo ndaimono, nĩmetuaga maroho ma arĩa akuũ. Mĩtugo o yothe ĩkonainie na gwĩtigĩra kana kũrongoreria akuũ nĩ mĩũru.—Isaia 8:19.

6. Mũtharaba: Jesu ndaakuĩrĩire mũtharaba-inĩ. Aakuĩrĩire gĩtugĩ-inĩ, kana mũtĩ-inĩ. Kiugo gĩa Kĩngiriki kĩrĩa gĩtaũragwo “mũtharaba” thĩinĩ wa Bibilia nyingĩ kiugaga gĩcunjĩ kĩmwe tu kĩa rũbaũ. Rũũri rwa mũtharaba ruumanaga na ndini itarĩ cia ma cia tene. Akristiano a mbere  matiahũthagĩra kana magathathayia mũtharaba. Kwoguo-rĩ, hihi wee nĩũgwĩciria nĩkwagĩrĩire kũhũthĩra mũtharaba ũthathayia-inĩ?—Gũcokerithia Maathani 7:26; 1 Akorintho 10:14.

7. Hihi wahota gũkorũo ũrĩ ũndũ mũritũ mũno gũtiga wĩtĩkio na mĩtugo ĩmwe ya ĩo. Hihi andũ anyu na arata maahota kũgeria gũkũigwithia ndũkagarũrĩre wĩtĩkio waku. Ĩndĩ gũkenia Ngai nĩ ũndũ wa bata makĩria ya gũkenia andũ.—Thimo 29:25; Mathayo 10:36, 37.

[Mbica karatathi ka 22]

Ngai ti Ũtatũ

[Mbica karatathi ka 23]

Krismasi na Ista ciumanaga na ndini itarĩ cia ma cia tene

[Mbica karatathi ka 23]

Hatirĩ gĩtũmi gĩa kũrongoreria akuũ kana kũmetigĩra