Ithomo Rĩa 3

Nĩ Ũbataire Kwĩruta Ũhoro Ũkoniĩ Ngai

Nĩguo ũtuĩke mũrata wa Ngai, nĩ ũbataire kwĩruta ũhoro ũmũkoniĩ. Arata aku nĩmoĩ rĩĩtwa rĩaku na hihi nĩmarĩhũthagĩra? Nĩmarĩũĩ, nĩmarĩhũthagĩra. Ngai o nake nĩendaga ũmenye na ũhũthagĩre rĩĩtwa rĩake. Rĩĩtwa rĩa Ngai nĩ Jehova. (Thaburi 83:18; Mathayo 6:9) O na ningĩ no mũhaka wĩrute ũrĩa endete na ũrĩa atendete. Nĩ ũbataire kũmenya arata ake nĩa na thũ ciake nĩ irĩkũ. Kũmenya mũndũ nĩ gũkuaga ihinda. Bibilia yugaga atĩ nĩ ũndũ wa ũũgĩ kũgĩa na ihinda rĩa kwĩruta ũhoro ũkoniĩ Jehova.—Aefeso 5:15, 16.

Arata a Ngai mekaga maũndũ marĩa mamũkenagia. Ta wĩcirie ũhoro wa arata aku. Ũngĩmeeka ũũru na wĩke maũndũ marĩa mathũire-rĩ, hihi no mathiĩ na mbere gũtuĩka arata aku? Hatirĩ nganja aca! No taguo, ũngĩenda gũtuĩka mũrata wa Ngai-rĩ, nĩ ũbataire nĩ gwĩka maũndũ marĩa mamũkenagia.—Johana 4:24.

Ti ndini ciothe itongoragia mũndũ agĩe na ũrata na Ngai. Jesu, ũrĩa arĩ we mũrata ũrĩa mũnene mũno wa Ngai, nĩ aaririe ũhoro wa njĩra igĩrĩ. Njĩra ĩmwe nĩ njariĩ na ĩiyũire andũ. Njĩra ĩo ĩtongoragia rĩanangĩro-inĩ. Njĩra ĩrĩa ĩngĩ nĩ ngunderu na nĩ andũ anyinyi mageragĩra yo. Njĩra ĩo ĩtongoragia muoyo-inĩ wa tene na tene. Ũguo nĩ ta kuuga atĩ angĩkorũo nĩũkwenda kũgĩa na ũrata wa Ngai-rĩ, no mũhaka wĩrute njĩra ĩrĩa yagĩrĩire ya kũmũthathayia.—Mathayo 7:13, 14.