Ithomo Rĩa 10
Ũrĩa Ũngĩhota Kũmenya Ndini ya Ma
Ũngĩenda gũtuĩka mũrata wa Ngai, no mũhaka wĩmenyerie ndini ĩrĩa ĩtĩkĩrĩkĩte nĩ Ngai. Jesu oigire atĩ “ahoi kũna” mangĩhoyaga Ngai kũringana na “ma.” (Johana 4:23, 24) Kũrĩ na njĩra o ĩmwe tu njagĩrĩru ya kũhoya Ngai. (Aefeso 4:4-6) Ndini ya ma ĩtongoragia muoyo-inĩ wa tene na tene, na ndini ĩtarĩ ya ma ĩtongoragia rĩanangĩro-inĩ.—Mathayo 7:13, 14.
No ũhote gũkũũrana ndini ya ma na ũndũ wa kũrorania andũ arĩa mamĩĩmenyeragia. Kuona atĩ Jehova nĩ mwega-rĩ, arĩa marĩ o athathayia ake a ma no mũhaka makorũo marĩ andũ ega. O ta ũrĩa mũcungwa mwega ũciaraga macungwa mega, ndini ya ma ĩtuaga andũ ega.—Mathayo 7:15-20.
Arata a Jehova nĩ matĩĩte Bibilia mũno. Nĩmoĩ atĩ Bibilia yumĩte kwĩ Ngai. Metĩkagĩria ũrĩa yugaga ũtongorie mĩtũũrĩre yao, ĩniine mathĩna mao, na ĩmateithie kwĩruta ũhoro ũkoniĩ Ngai. (2 Timotheo 3:16) Nĩmageragia kwĩmenyeria ũrĩa mahunjagia.
Arata a Jehova nĩmonanagia wendo gatagatĩ-inĩ kao. Jesu nĩonirie andũ wendo na ũndũ wa kũmaruta ũhoro ũkoniĩ Ngai, na ũndũ wa kũhonia arĩa maarĩ arũaru. Arĩa memenyeragia ndini ya ma nĩmonagia arĩa angĩ wendo. O ta Jesu, matinyararaga arĩa athĩni kana arĩa a kabira ingĩ. Jesu oigire atĩ andũ mangĩkaamenya arutwo ake na ũndũ wa wendo ũrĩa monanagia gatagatĩ-inĩ kao.—Johana 13:35.
Arata a Ngai nĩmatĩĩaga rĩĩtwa Rĩake, Jehova. Mũndũ angĩrega kũhũthĩra rĩĩtwa rĩaku-rĩ, mũndũ ũcio no atuĩke mũrata waku mũnene? Aca! Rĩrĩa twagĩa na mũrata-rĩ, tũhũthagĩra rĩĩtwa rĩake na nĩtwaragia maũndũ mega makoniĩ mũrata ũcio kũrĩ andũ arĩa angĩ. Kwoguo arĩa mangĩenda gũtuĩka arata a Ngai nĩmaagĩrĩirũo nĩ kũhũthĩra rĩĩtwa rĩake na meere arĩa angĩ ũhoro wake. Jehova nĩendaga twĩke ũguo.—Mathayo 6:9; Aroma 10:13, 14.
O ta Jesu-rĩ, arata a Ngai nĩmarutaga andũ ũhoro ũkoniĩ Ũthamaki wa Ngai. Ũthamaki wa Ngai nĩ thirikari ya igũrũ ĩrĩa ĩrĩtua thĩ paradaisi. Arata a Ngai nĩmagayagĩra andũ arĩa angĩ ũhoro ũyũ mwega wa Ũthamaki wa Ngai.—Mathayo 24:14.
Aira a Jehova nĩ arata a Ngai. Nĩmatĩĩte Bibilia na nĩmakoragwo na wendo gatagatĩ-inĩ kao. O na ningĩ nĩmahũthagĩra na magatĩĩa rĩĩtwa rĩa Ngai na nĩmarutaga arĩa angĩ ũhoro wa Ũthamaki wa Ngai. Aira a Jehova nĩo andũ arĩa memenyeragia ndini ya ma thĩinĩ wa thĩ ũmũthĩ.