Ithomo Rĩa 6
Paradaisi Ĩrĩ Hakuhĩ!
Maũndũ moru marĩa marekĩka rĩu gũkũ thĩ maronania atĩ Paradaisi ĩrĩ hakuhĩ. Bibilia nĩyoigire atĩ nĩtũngĩkona mahinda moru mũno o mbere tu ya Paradaisi gũũka. Rĩu tũratũũra mahinda-inĩ macio! Haha harĩ na mamwe ma maũndũ marĩa Bibilia yoigire atĩ nĩmangĩgekĩka:
Mbaara nene. “Rũrĩrĩ o rũrĩrĩ rũgokĩrĩra rũrĩa rũngĩ, na o ũthamaki ũũkĩrĩre ũrĩa ũngĩ.” (Mathayo 24:7) Ũrathi ũcio nĩũhingĩte. Kuuma mwaka wa 1914, nĩgũkoretwo na mbaara cia thĩ igĩrĩ na mbaara ingĩ nyingĩ nini. Andũ milioni nyingĩ nĩmakuĩte thĩinĩ wacio.
Mĩrimũ ĩhunjĩte kũndũ kũingĩ. O na kũndũ na kũndũ “nĩgũkagĩa . . . mĩrimũ mĩũru ĩrĩa ĩrehage mũthiro.” (Luka 21:11) Hihi ũguo nĩũhingĩte? Ĩĩ-ni. Kansa, mũrimũ wa ngoro, mũrimũ wa gĩthũri, marĩria, Mũkingo, na mĩrimũ ĩngĩ nĩyũragĩte andũ milioni nyingĩ.
Wagi wa irio. Kũndũ guothe thĩinĩ wa thĩ kũrĩ na andũ matarĩ na irio cia kũigana cia kũrĩa. Andũ milioni nyingĩ nĩmakuaga nĩ ngʼaragu mwaka o mwaka. Kĩu nĩ kĩmenyithia kĩngĩ atĩ Paradaisi nĩĩgũũka o ica ikuhĩ. Bibilia yugaga ũũ: “Nĩgũkagĩa . . . ngʼaragu.”—Mariko 13:8.
Ithingithia cia thĩ. “Gũkagĩa . . . ithingithia cia thĩ kũndũ kũingĩ.” (Mathayo 24:7) Ũguo o naguo nĩũhingĩte ihinda-inĩ riitũ. Andũ makĩria ma milioni ĩmwe nĩmakuĩte ithingithia-inĩ cia thĩ kuuma 1914.
Andũ aaganu. Andũ magaatuĩka “endi mbia” na “eendi.” Mangĩgakorũo marĩ “arĩa mendaga gwĩkenia gũkĩra ũrĩa mendaga Ngai.” Ciana ingĩgaakorũo irĩ “andũ matangĩigua aciari ao.” (2 Timotheo 3:1-5) Wee githĩ to wĩtĩkie atĩ nĩ kũrĩ na andũ aingĩ mahaana ũguo ũmũthĩ? Matitĩĩte Ngai, na marehagĩra thĩna arĩa mageragia kwĩruta ũhoro ũkoniĩ Ngai.
Uuni wa watho. O na ningĩ “waganu nĩũgakorũo ũingĩhĩtio.” (Mathayo 24:12) Hihi no wĩtĩkanie na atĩ uuni wa watho nĩ mũũru makĩria ya ũrĩa warĩ mĩaka mĩingĩ mĩthiru. Andũ kũndũ guothe marĩ ũgwati-inĩ wa gũtunywo indo ciao na hinya, kũhenwo, kana gwĩkwo ũũru.
Maũndũ macio mothe maronania atĩ Ũthamaki wa Ngai wĩ hakuhĩ. Bibilia yugaga ũũ: “Mwona maũndũ macio magĩkinya, menyai atĩ ũthamaki wa Ngai wĩ hakuhĩ.” (Luka 21:31) Ũthamaki wa Ngai nĩ kĩĩ? Nĩ thirikari ya Ngai ya igũrũ na ĩrĩrehe Paradaisi gũkũ thĩ ĩno. Thirikari ya Ngai ĩgacoka ithenya rĩa thirikari cia andũ.—Danieli 2:44.