Ithomo Rĩa 11
Regana Na Ndini Ĩtarĩ ya Ma!
Shaitani na ndaimono ciake matikwenda ũtungatĩre Ngai. Korũo maahota mendaga kũgarũra mũndũ o wothe atigane na Ngai. Mageragia gwĩka ũguo atĩa? Njĩra ĩmwe nĩ kũgerera ndini ĩtarĩ ya ma. (2 Akorintho 11:13-15) Ndini ti ya ma ĩngĩkorũo ndĩrarutana ma kuuma Bibilia-inĩ. Ndini ĩtarĩ ya ma ĩhaana mbia itarĩ cia ma—yahota kũhaanana na ĩrĩa ya ma, no nĩ ya tũhũ. No ĩkũrehere thĩna mũnene.
Maheeni ma kĩĩndini matirĩ hingo o na rĩ mangĩkenia Jehova, Ngai ũrĩa wa ma. Hingo ĩrĩa Jesu aarĩ gũkũ thĩ, nĩ kwarĩ gĩkundi kĩa ndini kĩendaga kũmũũraga. Meciragia atĩ njĩra yao ya ũthathayia nĩyo njĩra ĩrĩa yaagĩrĩire. Moigire: “Twĩ na Ithe witũ o ũmwe, nĩwe Ngai.” Hihi Jesu nĩetĩkĩrire? Aca! Aamerire: “Inyuĩ-rĩ, mũrĩ a ithe wanyu mũcukani.” (Johana 8:41, 44) Ũmũthĩ andũ aingĩ meciragia atĩ mathathayagia Ngai, no ma nĩ atĩ matungatagĩra Shaitani na ndaimono ciake!—1 Akorintho 10:20.
O ta ũrĩa mũtĩ mũthũku ũciaraga matunda moru, ndini ĩtarĩ ya ma ĩciaraga andũ mekaga maũndũ moru. Thĩ ĩiyũirũo nĩ thĩna nĩũndũ wa maũndũ moru marĩa andũ mekaga. Kũrĩ na mĩtugo mĩũru ya gũkomania, kũrũa, ũici, kũhinyanĩrĩria, ũũragani, na kũgwata andũ-a-nja na hinya. Aingĩ arĩa mekaga maũndũ macio nĩ marĩ ndini, ĩndĩ ndini yao ndĩtũmaga memenyerie maũndũ mega. Matingĩhota gũtuĩka arata a Ngai o tiga matigire gwĩka maũndũ moru.—Mathayo 7:17, 18.
Ndini ĩtarĩ ya ma ĩrutaga andũ kũhoya mĩhianano. Ngai oigaga mĩhianano ndĩkahoyo. Ũcio nĩ ũndũ wa kĩhooto. Hihi wee no wende angĩkorũo mũndũ ndarĩ hingo o na rĩ aaragia nawe no aaragia tu na mbica yaku? Hihi mũndũ ũcio no atuĩke mũrata waku? Aca, ndangĩtuĩka. Jehova endaga andũ mamwarĩrie, ti maarĩrie mwacũhio kana mbica, ĩrĩa ĩtarĩ muoyo.—Thama 20:4, 5.
Ndini ĩtarĩ ya ma ĩrutanaga atĩ no wega kũũraga andũ arĩa angĩ hingo ya mbaara. Jesu oigire atĩ arata a Ngai mangĩkorũo na wendo gatagatĩ-inĩ kao. Tũtiũragaga andũ arĩa twendete. (Johana 13:35) Nĩ mahĩtia kũũraga o na andũ arĩa oru. Rĩrĩa thũ cia Jesu ciokire kũmũnyita-rĩ, we ndetĩkĩririe arutwo ake marũe nĩguo mamũgitĩre.—Mathayo 26:51, 52.
Ndini ĩtarĩ ya ma ĩrutanaga atĩ arĩa aaganu makaanyamaragio icua-inĩ rĩa mwaki. Ĩndĩ-rĩ, Bibilia ĩrutanaga atĩ mehia marehage gĩkuũ. (Aroma 6:23) Jehova nĩ Ngai wa wendo. Hihi Ngai mwendani no anyamarie andũ tene na tene? Hatarĩ nganja aca! Thĩinĩ wa Paradaisi, gũgakoragwo ndini o ro ĩmwe, ĩrĩa Jehova etĩkagĩra. (Kũguũrĩrio 15:4) Ndini ciothe iria mũthingi wacio nĩ maheeni ma Shaitani igaakorũo ithirĩte.