Uhoro wa Uthamaki Na. 37

Ndũmĩrĩri ya Thĩ Yothe

Mũthia wa Ndini Ĩtarĩ ya Ma Ũrĩ Hakuhĩ!

▪ Ndini ĩtarĩ ya ma nĩ ĩrĩkũ?

▪ Ĩrĩthira atĩa?

▪ Ũndũ ũcio-rĩ, ũrĩkũhutia atĩa?

Ndini ĩtarĩ ya ma-rĩ, nĩ ĩrĩkũ?

Wee-rĩ, nĩũnyamaragio nĩ uuni watho ũrĩa wĩkagwo na rĩĩtwa rĩa ndini? Ĩ mbaara-rĩ, ũtoi, na uungumania iria irehagwo nĩ arĩa metuaga atĩ nĩ atungatĩri Ngai-rĩ, nĩ itũmaga ũrakare nĩ ũndũ wa wagi kĩhooto? Nĩkĩ gĩtũmaga ndini ĩtuĩke nĩyo kĩhumo kĩa mathĩna maingĩ mũno?

Mahĩtia matikoragwo marĩ ma ndini ciothe, no nĩ ma ndini ĩrĩa ĩtarĩ ya ma. Jesu Kristo, mũndũ wa ndini watĩĩtwo mũno, onanirie atĩ ndini ĩtarĩ ya ma ĩrutaga mawĩra moru, o ta ũrĩa “mũtĩ ũrĩa mũthũku ũciaraga maciaro moru.” (Mathayo 7:​15-17) Ndini ĩtarĩ ya ma iciaraga matunda ma mũthemba ũrĩkũ?

Ndini Ĩtarĩ ya Ma . . .

◼ GWĨTONYIA MBAARA-INĨ NA ŨTETI-INĨ: Ngathĩti ya Asiaweek yugĩĩte, “Gũtuĩkania Asia na mũrĩmo ũũrĩa ũngĩ, atongoria akoroku nĩ ũnene manyũrũragia wĩtĩkio wa andũ a ndini nĩguo megune o ene.” Nĩ ũndũ wa gĩtũmi kĩu, ngathĩti ĩyo ĩheeanĩte mũkaana ũũ: “Thĩ ĩcũũnĩirie gũtonyerera ũgũrũki-inĩ.” Mũtongoria wa ndini wĩ igweta thĩinĩ wa United States oigire ũũ: “Mbere ya kũnina ũũragani-rĩ, ambai mũrage itoi.” Itua rĩake rĩarĩ rĩrĩkũ? “Ũragai othe thĩinĩ wa rĩĩtwa rĩa Mwathani.” No na njĩra ĩngĩ-rĩ, Biblia yuugĩte ũũ: “Mũndũ angĩkorũo oigaga ũũ, Niĩ nĩnyendete Ngai, na nĩathũire mũrũ wa ithe-rĩ, ũcio nĩ wa maheni.” (1 Johana 4:​20) Ningĩ Jesu oigire ũũ: “Endagai andũ arĩa marĩ muku na inyuĩ.” (Mathayo 5:​44) Wee-rĩ, ũgwĩciria nĩ ndini ciigana arũmĩrĩri acio meetonyagia mbaara-inĩ?

◼ GŨTHEREMIA ŨRUTANI WA MAHENI: Ndini nyingĩ irutanaga atĩ muoyo kana roho nĩ gĩcunjĩ kĩa mũndũ gĩtonekanaga kĩrĩa gĩtigaraga thutha wa gĩkuũ kĩa mwĩrĩ ũyũ twĩ naguo. Na njĩra ya ũrutani ũyũ-rĩ, nyingĩ cia ndini icio ituunyaga arũmĩrĩri aacio na ũndũ wa kũmetia mbeca mahoere mĩoyo ĩrĩa ĩrĩkĩtie kũmatiga. O na kũrĩ ũguo-rĩ, Biblia ĩrutanaga ũrutani wa mwanya. “Roho ũrĩa wĩhagia nĩguo ũgakua.” (Ezekieli 18:4) “Nĩ ũndũ arĩa me muoyo no moĩ atĩ nĩmagakua: no arĩa makuĩte-rĩ, matirĩ ũndũ moĩ.” (Kohelethu 9:5) Jesu aarutanire atĩ arĩa akuũ nĩ makariũkio​—⁠gĩko kĩu gĩtingĩkorũo na bata o na hanini angĩkorũo andũ me muoyo ũtakuaga. (Johana 11:11-25) Ndini yaku-rĩ, nĩĩrutanaga atĩ muoyo ndũngĩhota gũkua?

◼ KŨREKERERIA WAGANU WA NGOMANIO: Thĩinĩ wa mabũrũri ma ithũĩro, ikundi cia makanitha maigagĩrĩra moko arĩa makomanagia arũme kwa arũme na atumia gwa atumia matuĩke atungatĩri na makoria thirikari yandĩkithie mohiki ma mũthemba ũcio. O na makanitha marĩa mamenagĩrĩria ngomanio-rĩ, nĩmareekereirie atongoria a ndini arĩa makoretwo magwatĩte twana. O na kũrĩ ũguo-rĩ, Biblia ĩrutanaga atĩa? Yuugĩte wega ũũ: “Menyai mũkanaheneka: ahũri maraya-rĩ, kana ahoi-mĩhianano, kana itharia, kana arĩa metuaga ta aka, kana arũme arĩa magwataga arũme arĩa angĩ-rĩ, . . . gũtirĩ ũkagaya ũthamaki wa Ngai.” (1 Akorintho 6:9, 10) Wee-rĩ, nĩ ũũĩ ndini iria irekagĩrĩria ngomanio cia ũrathoni?

Ndini iria iciaraga matunda moru-rĩ, mũthia wacio nĩ atĩa ihinda rĩrĩa rĩũkĩte? Jesu aaheanire mũkaana ũũ: “O mũtĩ ũrĩa ũtaciaraga maciaro mega nĩ gũtemwo ũtemagwo ũgaikio mwaki-inĩ.” (Mathayo 7:19) Ĩĩni, ndini ĩrĩa ĩtarĩ ya ma nĩ kũngʼũrio ĩkaangʼũrio! No nĩ na njĩra ĩrĩkũ na nĩrĩ ũndũ ũcio ũgekĩka? Woni wa ũnabii ũrĩa waandĩkĩtwo thĩinĩ wa ibuku rĩa Kũguũrĩrio, gĩcunjĩ gĩa 17 na 18 nĩ ũheanĩte icokio.

Ndini ĩrĩa ĩtarĩ ya ma ĩgathira atĩa?

Tahũra mbica. Mũmaraya aikarĩire mũgongo wa nyamũ ya gwĩtigĩrithia mũno. Nyamũ ĩyo ĩĩna ciongo mũgwanja na hĩa ikũmi. (Kũguũrĩrio 17:​1-4) Mũmaraya ũcio arũgamĩrĩire ũ? Ena hinya wa kũguucĩrĩria “athamaki a thĩ.” Ehumbĩte nguo cia rangi wa ndaathi, ena ũbumba, na nĩ mũtongu mũno. Ningĩ kuongerera-rĩ, na ũndũ wa maũndũ make ma ũgo, ‘ndũrĩrĩ ciothe ikahĩtithio.’ (Kũguũrĩrio 17:18; 18:​12, 13, 23) Biblia ĩtũteithagia na gũtuonia atĩ mũmaraya ũyũ nĩ ũthamaki wa thĩ yothe wa ndini. Mũmaraya ũyũ ndarũgamĩrĩire ndini ĩmwe tu, no nĩ ndini ciothe iria iciaraga matunda moru.

Nyamũ ĩrĩa ĩikarĩirũo nĩ mũmaraya ũyũ-rĩ, ĩhaananĩtie mothamaki ma ũteti ma thĩ.a (Kũguũrĩrio 17:​10-13) Ndini ĩrĩa ĩtarĩ ya ma ĩikarĩire mandangʼa mũgongo wa nyamũ ĩyo ya ũteti, ĩkĩgeria kũringĩrĩria matua mayo metĩkĩrĩke na kwerekeria ũrĩa ĩkwenda.

O ica ikuhĩ-rĩ, ũndũ wa magegania mũno nĩũrĩkĩka. “Nacio hĩa icio wona ikũmi, o na nyamũ nyene, acio nĩ gũthũũra magathũũra mũmaraya ũcio, mamũtige akirĩte ihooru na e njaga, na marĩe nyama cia mwĩrĩ wake, na mamũcine na mwaki athire biũ! ” (Kũguũrĩrio 17:16) Na njĩra ya mĩtũkĩ mũno na ya kũgegania-rĩ, wathani wothe wa ũteti wa thĩ ũrĩgarũrũkĩra ndini ya maheni ũmĩnine biũ! Nĩ kĩĩ kĩrĩtũma ũndũ ũyũ wĩkĩke? Ibuku rĩa Biblia rĩa Kũguũrĩrio rĩtũhete icokio rĩrĩ: “Ngai nĩamataarĩte ngoro-inĩ ciao meke ũrĩa we atuĩte.” (Kũguũrĩrio 17:17) Ĩĩni, Ngai nĩarĩtuĩra ndini ĩrĩa ĩtarĩ ya ma nĩ ũndũ wa ciĩko ciothe njũru iria ĩĩkĩte thĩinĩ wa rĩĩtwa rĩake. O na rua na ũndũ wa ituĩro rĩake rĩa kĩhooto-rĩ, arĩĩhũthĩra anyanyawe a ũteti matuĩke njũgũma ya kũmũnina.

Wee-rĩ, no mũhaka wĩke atĩa angĩkorũo ndũkwenda kũnyitanĩra matũhũhũ ma ndini ya maheni? Mũtũmwo wa Ngai araatwĩra “Umai kuo, andũ akwa.” (Kũguũrĩrio 18:4) Kũna kũna-rĩ, rĩrĩ nĩrĩo ihinda rĩa gwĩthara kuuma kwĩ ndini ya maheni! No ningĩ-rĩ, ũũgwĩtharĩra kũ? Ndũgatonye kwa andũ arĩa moigaga atĩ gũtirĩ Ngai, tondũ ihinda rĩao rĩrĩa rĩũkĩte nĩ itumanu. (2 Athesalonike 1:​6-9) Rĩũrĩro riitũ riki tu nĩ thĩinĩ wa ndini ya ma. Nĩ atĩa ũngĩhota gũkũũrana ndini ya ma?

Ũrĩa ũngĩhota gũkũũrana ndini ya ma

Nĩ matunda marĩkũ mega ndini ya ma yagĩrĩirũo nĩ gũciara?—Mathayo 7:17.

Ndini ya Ma . . .

◼ ĨMENYAGĨRIA WENDANI: Athathaiya a ma “o ti a gũkũ thĩ,” ningĩ matigayũkanĩtio nĩ rũrĩrĩ kana mĩtugo, no maikaraga ‘mendaine.’ (Johana 13:35; 17:16; Atũmwo 10:​34, 35) Handũ ha kũũragana o ene-rĩ, merutagĩra gũkuĩra mũndũ na ũrĩa ũngĩ.​—1 Johana 3:16.

◼ ĨNYITITHANAGIA FAMĨLĨ NA ĨKARŨMIA MĨTUGO ĨRĨA MĨTHERU: Ndini ya ma ĩrutaga athuri ‘mende atumia ao o ta arĩ mĩĩrĩ yao ene,’ na ĩgateithia atumia ‘matĩĩe athuri ao,’ ningĩ ĩkaruta ciana ‘ciathĩkagĩre aciari ao.’ (Aefeso 5:​28, 33; 6:1) Hamwe na ũguo, arĩa ahe tũturwa twa ũtongoria-rĩ, no mũhaka matuĩke kĩonereria kĩa mĩtugo mĩega.​—1 Timotheo 3:​1-​10.

Hihi-rĩ, he ndini o na ĩmwe ihingĩtie gĩthimo gĩkĩ? Ibuku rĩĩtagwo Holocaust Politics rĩrĩa rĩacabirwo 2001, riugĩte ũũ: “Korũo andũ aingĩ memenyeria ũrĩa Aira a Jehova mahunjagia na makemenyeria, Holocaust [kũninana kũnene kwa ũnyamũ ta kũrĩa kwa mbaara ya kerĩ ya thĩ] nĩ kũngĩagirĩrĩirio na ũũragani ta ũyũ ndũngĩnyarira thĩ rĩngĩ.”

Ũhoro wa ma nĩ atĩ, thĩinĩ wa mabũrũri 235, Aira a Jehova to kũhunjia mahunjagia mĩtugo mĩagĩrĩru ya Biblia—ĩndĩ matũũragĩra yo. Tũgũkũũria warĩrie Aira a Jehova magũteithie wĩrute ũrĩa Ngai eendaga wĩke nĩguo ũmũthathaiyie ũrĩa eendaga. Gaka nĩko kahinda. Ndũkagonderere. Mũthia wa ndini ĩtarĩ ya ma ũrĩ hakuhĩ!​—Zefania 2:​2, 3. 

Ũngĩenda kũmenya ũhoro makĩria ũkoniĩ ndũmĩrĩri ya Biblia ĩrĩa ĩhunjagio nĩ Aira a Jehova, wenda maandĩkĩre ũkĩhũthĩra andĩrĩthi ĩrĩa yagĩrĩire ya ici irĩ haha kĩanda.

□ Hatarĩ kũringĩrĩrio-rĩ, ndahoya ndũmĩrũo kabuku karĩa getagwo Ngai Endaga Twĩke Atĩa?

□ Nĩngwenda wĩruti wa Biblia wa mũciĩ ũtarĩ irĩhi.

[Kohoro ka magũrũ-inĩ]

[Kohoro karatathi ka 3]

Ndini ya maheni ĩkoragwo na ngucanio nene mũno “igũrũ rĩa athamaki a thĩ”

[Kohoro karatathi ka 3]

“Umai kuo, andũ akwa”