Ithomo Rĩa 12

Gũtuĩkaga Atĩa Hingo ya Gũkua?

Gĩkuũ nĩ kwaga gũkorũo muoyo. Gĩkuũ nĩ ta toro mũnene. (Johana 11:11-14) Akuũ matingĩhota kũigua, kuona, kwaria, kana gwĩciria ũndũ. (Kohelethu 9:5, 10) Ndini ĩtarĩ ya ma ĩrutanaga atĩ akuũ mathiaga thĩinĩ wa thĩ ya kĩĩroho magatũũrage na maguka arĩa akuũ. Ũguo tiguo Bibilia ĩrutanaga.

Arĩa makuĩte matingĩhota gũtũteithia, na matingĩhota gũtũthũkia. Andũ nĩmakoragwo na mũtugo wa kũruta magongona kana mahaki marĩa metĩkĩtie atĩ nĩmegũkenia akuũ. Ũguo ndũkenagia Ngai tondũ wĩhocetie thĩinĩ wa rĩmwe rĩa maheeni ma Shaitani. O na ndũngĩhota gũkenia akuũ tondũ matirĩ muoyo. Tũtiagĩrĩirũo nĩ gwĩtigĩra kana gũthathayia akuũ. Twagĩrĩirũo nĩ gũthathayia Ngai o we wiki tu.—Mathayo 4:10.

Akuũ nĩmagaatũũra muoyo rĩngĩ. Jehova nĩagokĩria akuũ magĩe na muoyo thĩinĩ wa thĩ ĩtuĩkĩte paradaisi. (Johana 5:28, 29; Atũmwo 24:15) Ngai no ahote gũũkĩria akuũ hatarĩ nganja o ta ũrĩa ũngĩhota gũũkĩria mũndũ ũrĩ toro. (Mariko 5:22, 23, 41, 42) Hingo ĩo nĩ gũũka ĩrĩũka.

Rĩĩciria rĩa atĩ tũtikuaga nĩ iheeni rĩhunjagio nĩ Shaitani Mũcukani. Shaitani na ndaimono ciake itũmaga andũ mecirie atĩ maroho ma arĩa akuũ me muoyo na marehage mĩrimũ na mathĩna mangĩ. Shaitani aheenagia andũ rĩmwe na rĩmwe kũgerera iroto na cioneki. Jehova nĩonaga andũ arĩa maaragia na akuũ mahĩtĩtie.—Gũcokerithia Maathani 18:10-12.