Kwaranĩria na Njĩra ya Marũa

MARŨA nĩ matũmĩte mĩikarĩre na mĩtũũrĩre ya andũ milioni nyingĩ yagĩre. Kĩambĩrĩria-inĩ mabuku maingĩ thĩinĩ wa Maandĩko ma Kĩgiriki ma Gĩkristiano maarĩ marũa. Mahinda-inĩ maya no twandĩke marũa nĩguo twĩkĩre hinya arĩa maratuĩkire Akristiano ica ikuhĩ, twaranĩrie na arata, twĩkĩre ngoro aarĩ na ariũ a Ithe witũ arĩa maheetwo mawĩra ma mwanya ma ũtungata, arĩa magũmĩirũo nĩ mathĩna, na tũkinyie ndũmĩrĩri iria ibataranagia harĩ gũtabarĩra maũndũ ma kĩũngano.—1 Thes. 1:1-7; 5:27; 2 Pet. 3:1, 2.

Ningĩ kwandĩka marũa nĩ njĩra njega ya kũhunjia. Kũndũ kũmwe, andũ aingĩ maikaraga nyũmba irĩ na ũgitĩri mũnene, kana mĩkawa-inĩ kũndũ gũtaingĩragwo nĩ mũndũ o wothe. Angĩ matikoragwo mũciĩ maita marĩa maingĩ, kwoguo tũtimakoraga rĩrĩa tũrahunjia nyũmba kwa nyũmba. Angĩ nao matũũraga kũndũ gũtarĩ na Aira a Jehova.

Rĩmwe na rĩmwe ndwari, rĩera gũthũka, kana watho wĩgiĩ kwaga kuuma nja nĩ maũndũ mangĩtũma wage kuumagara. Hihi no wandĩke marũa nĩguo ũtwarithie ndeereti na mũndũ wa mbarĩ cianyu kana na mũndũ ũngĩ wahunjĩirie? Hihi nĩ kũrĩ mũrutwo waku wa Bibilia ũthamĩte? No gũkorũo ũngĩmwandĩkĩra marũa no mamũrurumũre athiĩ na mbere kĩĩroho. Kana hihi no wandĩke ndũmĩrĩri njega ya Kĩĩmandĩko kũrĩ andũ marahikanirie, maragĩire kaana, kana marakuĩrĩirũo nĩ endwa ao.

Kũhunjia na Njĩra ya Marũa

Ũkĩandĩka marũa ma kũhunjĩria mũndũ mũtarĩ mwacemania, amba wĩmenyithanie. No ũmũtaarĩrie atĩ ũraruta wĩra wa kwĩrutĩra ũrĩa ũrutagwo thĩinĩ wa thĩ yothe. Ũngĩona kwagĩrĩire, no ũgwete atĩ ũrĩ ũmwe wa Aira a Jehova. Mwĩre kĩrĩa kĩratũma ũmwandĩkĩre handũ ha kũmũcerera. Andĩka ta arĩ kwaranĩria ũraranĩria nake maitho kwa maitho. O na kũrĩ ũguo, ũkĩrũmĩrĩra ũtaaro wa gũkorũo ‘na ũũgĩ ta nyamũ ya thĩ na kwaga ũũru ta ndutura,’ wĩcirie na ũritũ nĩ ũhoro ũigana atĩa waku kĩũmbe wagĩrĩirũo nĩ kũmũmenyithia.—Mat. 10:16.

Andĩka marũa-inĩ macio ũhoro ũrĩa ũngĩmũheire korũo ũgũthiĩte gwake. No ũhũthĩre njĩra ĩmwe kuuma ibuku-inĩ rĩa Kutoa Sababu kana njĩra ĩmwe ya Kĩĩmaandĩko kuuma thĩinĩ wa Ũtungata Witũ wa Ũthamaki wa ica ikuhĩ. No ũmũũrie kĩũria ũcoke ũmwĩkĩre ngoro ecirie ũhoro wakĩo. Ahunjia amwe nĩ mataaragĩria atĩ nĩ tũkoragwo na mũbango wa gũcokia ciũria cia Bibilia magacoka makagweta ciongo cia icunjĩ imwe thĩinĩ wa ibuku rĩmwe rĩa marĩa tũhũthagĩra tũkĩruta andũ Bibilia. Thĩinĩ wa karatathi ka 73 harĩ na marũa ma kĩonereria ma kũhunjia. No magũteithie ũrĩa ũngĩandĩka, o na kũrĩ ũguo no wandĩke ũhoro ngũrani na ũcio. Gĩtũmi nĩ tondũ andũ mahota kwamũkagĩra marũa mahanaine maita maingĩ.

Andũ amwe matiendete gũthoma marũa maraihu kuuma kũrĩ mũndũ matoĩ. Kwoguo nĩ ũndũ wa ũũgĩ kwandĩka marũa makuhĩ. Tirihĩra marũa maku handũ mũthomi atangĩnogio nĩmo agĩthoma. Nĩ wega gwĩkĩra thĩinĩ wa marũa macio karatathi ga kũmũnyita ũgeni mĩcemanio thĩinĩ wa Nyũmba ya Ũthamaki. No wĩkĩre trakti, broshua, kana ngathĩti ya Mũrangĩri kana Amkeni! na ũmũtaarĩrie atĩ angĩenda ngathĩti icio no acionage o mweri. Kana ũmũũrie kana no etĩkĩre gũceererũo gwake mũciĩ nĩguo mwarĩrĩrie makĩria ũhoro ũrĩa wamwandĩkĩra.

Ũrĩa Mabatiĩ Gũkorũo Matariĩ

Rĩu rora marũa macio ma kĩonereria. Nĩ ũkuona maũndũ maya: (1) Maroneka marĩ matheru, ti magũnyagũnyĩku. (2) O na mbahaca ĩngĩũra, ũrĩa ũtũmĩirũo marũa macio no ekuona rĩtwa na andĩrĩthi cia mũtũmi. (3) Muoroto wamo ũgwetetwo na njĩra hũthũ na ya ĩmwe kwa ĩmwe kĩbungo-inĩ kĩa mbere. (4) Ũndũ o wothe wa bata makĩria wonanĩtio thĩinĩ wa kĩbungo mwanya. (5) Ũngĩbaara marũa macio, nĩ ũkuona atĩ ti ma kĩũrata mũno na ti ma kĩĩwabici mũno.

Marũa-inĩ ma kĩĩwabici, ta marĩa mwandĩki wa kĩũngano angĩtũmĩra wabici ya rũhonge, rĩĩtwa rĩa kĩũngano rĩagĩrĩirũo gũkorũo ho, o hamwe na rĩĩtwa rĩa mwandĩki ũcio, andĩrĩthi ciake na tarĩki. Ningĩ rĩĩtwa na andĩrĩthi cia mũndũ kana ithondeka rĩrĩa rĩratũmĩrũo marũa macio ciagĩrĩirũo gũkorũo marũa-inĩ macio. Ũndũ ũcio wagĩrĩirũo kũrũmĩrĩrũo nĩ ngeithi iria ciagĩrĩire. Thĩinĩ wa thiomi imwe mũndũ agĩtiriha marũa nĩ andĩkaga ciugo ta “Nĩ niĩ.” Thaĩri yagĩrĩirũo kwandĩkwo na guoko.

Tigĩrĩra atĩ marũa o mothe nĩ wandĩka ũrĩa kwagĩrĩire, warũmĩrĩra mũbangĩre wa ciugo, wekĩra marũũri ma rũthiomi, na nĩ matheru. Gwĩka ũguo nĩ gũgũtĩithia marũa maku na ndũmĩrĩri ĩrĩa marĩ nayo.

Hingo ciothe andĩka mbahaca igũrũ andĩrĩthi iria ũngĩcokerio marũa nacio, na kũngĩhoteka ikorũo nĩ ciaku kĩũmbe. Ũngĩona atĩ ti ũndũ wa ũũgĩ kũhũthĩra andĩrĩthi ciaku kĩũmbe rĩrĩa ũrahunjĩria mũndũ mũtarĩ mwacemania, ũria athuri a kĩũngano kana no magwĩtĩkĩrie ũhũthĩre andĩrĩthi cia Nyũmba ya Ũthamaki ya kwanyu. Andĩrĩthi cia wabici ya rũhonge itiagĩrĩirũo kũhũthĩrũo o na rĩ kwandĩka marũa ma kũhunjia, tondũ ũndũ ũcio no ũtũme mũndũ ecirie atĩ andĩkĩirũo nĩ wabici ya rũhonge na ũndũ ũcio no ũrehe kĩhĩngĩca. Ũngĩkĩra mabuku maitũ thĩinĩ wa marũa macio na wage kwandĩka andĩrĩthi ciaku, ũndũ ũcio o naguo no ũrehe mbica ĩrĩa ĩtarĩ yo, atĩ mũndũ ũcio atũmĩirũo marũa nĩ wabici ya rũhonge.

Tigĩrĩra atĩ wekĩra thitembũ ya mbeca iria ciagĩrĩire, makĩria angĩkorũo nĩ wekĩra ibuku thĩinĩ wa mbahaca. Angĩkorũo thitembũ ti ya mbeca njiganu, mũndũ ũrĩa ũratũmĩra ahota kũrĩhio mbeca iria itigarĩte, na ũndũ ũcio no ũtũme arege ndũmĩrĩri yaku. Ririkana atĩ thĩinĩ wa mabũrũri maingĩ marĩhi ma bothita ma gũtũma marũa marĩ na broshua kana ngathĩti, nĩ manene gũkĩra ma marũa matheri.

Mũcamo Ũrĩa Wagĩrĩire

Warĩkia kwandĩka marũa, mathome ũigue ũrĩa matariĩ. Maraiguĩka matariĩ atĩa? Nĩ maronania ũrata na ũtaũku? Wendo na ũtugi nĩ imwe cia ngumo iria twĩrutanagĩria mũno kuonania tũkĩhiũrania na andũ. (Gal. 5:22, 23) Ũngĩona marũa maku ta marĩ na mũcamo ũtagĩrĩire, cenjia ciugo.

Marũa no makinye kũndũ ũtangĩhota. Ũndũ ũcio ũtũmaga matuĩke njĩra ya mwanya mũno ya kũhunjia. Tondũ marũa maku nĩ monanagia ũrĩa ũtariĩ-rĩ, wĩcirie wega ũrĩa maroiga, ũrĩa mahaana, na mũcamo wamo. Ciugo ciamo ciahota gũkorũo na kĩrĩa kĩrabatarania harĩ kwarahũra, gwĩkĩra hinya, kana kũũmĩrĩria mũndũ njĩra-inĩ ya muoyo.