Kwagagĩria Ũtungata Witũ​—Kwandĩka Marũa Mega

ŨNDŨ ŨCIO NĨ WA BATA NĨKĨ?: Ibuku rĩa 1 Akorintho nĩ rĩmwe rĩa marũa 14 marĩa mũtũmwo Paulo aandĩkire ma gwĩkĩra Akristiano arĩa angĩ ngoro. Mũndũ akĩandĩka marũa nĩ akoragwo na ihinda rĩa gũthuura wega ciugo iria ekũhũthĩra, na ũrĩa wandĩkĩrũo no amathomage kaingĩ. Kwandĩka marũa nĩ njĩra njega ya kũhunjĩria andũ arĩa twĩtainwo nao na arĩa tũyaine nao. Ningĩ nĩ njĩra njega ya kũhunjĩria arĩa tũtahotaga kwaria nao. Kwa ngerekano, mũndũ no akorũo nĩ aakenirio nĩ ũhoro no ti ũndũ mũhũthũ kũmũkora mũciĩ. Ningĩ no ũkorũo ũrĩ ũndũ mũritũ gũkinyĩra andũ amwe gĩcigo-inĩ gitũ tondũ maikaraga nyũmba-inĩ irĩ na ũgitĩri mũnene, ingĩ itetĩkagĩrio kũingĩrũo, kana irĩ kũndũ kũraihu mũno. Nĩ maũndũ marĩkũ wagĩrĩirũo kũririkana, makĩria rĩrĩa ũrandĩkĩra mũndũ ũtoĩ marũa?

ŨRĨA ŨNGĨKA ŨGUO:

• 

  Hũthĩra ciugo iria ũngĩhũthĩra ũkĩaria nake. Ambĩrĩria na kwĩmenyithania, na ũmũtaarĩrie wega kĩrĩa gĩatũma ũmwandĩkĩre marũa. No ũmũrie kĩũria angĩciria ũhoro wakĩo, na ũmwĩrĩre website itũ. Ũcoke ũmũtaarĩrie ũhoro wĩgiĩ programu ya kwĩruta Bibilia ĩrĩa ĩkoragwo thĩinĩ wa website itũ ya rũthiomi rwa Gĩthũngũ, kana mũbango witũ wa kwĩruta na andũ Bibilia mĩciĩ-inĩ yao, kana ũmũgwetere ciongo imwe kuuma ibuku-inĩ rĩmwe rĩa marĩa tũhũthagĩra kũrutana Bibilia. No ũmũikĩrie gakandi ka jw.org, karatathi ga kũmũnyita ũgeni, kana trakti mbahaca-inĩ.

• Ndũkandĩke ũhoro mũingĩ. Marũa maku mangĩkorũo marĩ maraihu mũno, ũrĩa ũrandĩkĩra no anoge kũmathoma.​—Rora kĩonereria kĩa ũrĩa ũngĩandĩka marũa

• Mathome nĩguo ũrore kana marĩ na mahĩtia na nĩ marathomeka wega. Tigĩrĩra nĩ maragucĩrĩria, marĩ na ciugo cia gĩtĩo, na marĩ na ũhoro wa gwĩkĩra ngoro. Ĩkĩra stampu cia kũigana.