Hihi no Wende Kũmenya Makĩria Biblia?

Wagĩrĩirũo Gũthoma Biblia Nĩkĩ?

Biblia ndĩhaana mabuku marĩa mangĩ, ĩrĩ mawatho ma wendo kuuma kwa Ngai. (1 Athesalonike 2:13) Ũngĩgĩa na ũmenyo wa Biblia na wĩke ũrĩa ĩrutanaga-rĩ, nĩũkũgunĩka mũno. Na ningĩ nĩũkũongerera wendo waku kũrĩ Ngai, na ũmũkuhĩrĩrie, “ũheani o wothe wa maũndũ mega ona kĩheo o gĩothe kĩrĩa kĩagĩrĩire kũna.” (Jakubu 1:17) Nĩũrĩmenyaga ũrĩa ũrĩmũkuhagĩrĩria mahoya-inĩ. Hĩndĩ ya mathĩna nĩũrĩiguaga ũrĩ na ũteithio kuuma kũrĩ Ngai. Ũngĩringithania mĩikarĩre yaku na mawatho marĩa marĩ thĩinĩ wa Biblia-inĩ Ngai nĩagakũhee mũoyo wa tene na tene.—Aroma 6:23.

Biblia ĩrĩ na ma ĩrĩa ĩheanaga ũmenyi. Andũ arĩa magĩaga na ũũgĩ wa Biblia-rĩ, nĩmohoretwo kuuma kũrĩ wagi-ũmenyo ũrĩa wathĩte mamilioni. Kĩonereria-rĩ, kũmenya ma ũrĩa gũtuĩkaga rĩrĩa twakua gũtũohoraga kuuma guoya wa atĩ arĩa akuũ no matũĩke ũũru kana atĩ mbarĩ ciitũ iria nguũ hamwe na arata aitũ nĩmaratangĩka. (Ezekieli 18:4) Ũrutani wa Biblia ũkoniĩ kũriũka ũheaga ũhoreru arĩa makuĩrĩirũo nĩ endwa ao. (Johana 11:25) Tũmenyete ma ũhoro wa maroho moru, nĩũtũmaga tũkorũo twĩharĩirie kuuma ũũruinĩ wa ngoma ũgatũteithia kũmenya gĩtũmi gĩa gũkorũo kũrĩ na mathĩna thĩinĩ wa thĩ.

Mawatho ma Ngai kuuma Biblia matũonagĩrĩria mĩikarĩre ya gũtũguna. Kĩonereria-rĩ, gũkoragũo na “mĩthiĩre mĩagĩrĩru” nĩgũtũmaga mũndũ agĩe na ũgima wa mwĩrĩ. (1 Timotheo 3:2) ‘Tũũngĩtheragia na tũtiganage na ũndũ o wothe ũrĩa ũthũkagia mũndũ mwĩrĩ o na kana roho,’ nĩtũkũgirĩrĩria gũthũkia ũgima witũ. (2 Akorintho 7:1) Mataaro ma Ngai kuuma Biblia matũmaga mũndũ agĩe na gĩtĩo o na ningĩ gĩkeno mĩikarĩre-inĩ ya ũhiki.—1 Akorintho 6:18.

Watũmĩra Kiugo kĩa Ngai, nĩũrĩkoragũo ũrĩ mũndũ mũkenu makĩria. Ũmenyi wa Biblia ũtũmaga tũone thayũ mũrikĩru na kũigua tũiganĩire na gũtũhe mwĩhoko. Ũtũteithagĩrĩria kwagĩria ngumo cia gũkenerũo ta kũigua tha, wendani, gĩkeno, thayũ, gũtugana, na wĩtĩkio. (Agalatia 5:22, 23; Aefeso 4:24, 32) Mĩtugo teyo ĩtũteithagĩrĩria tũtuĩke athuri kana atumia eega, aciari eega, aanake kana airĩtu eega makĩria.

Hihi ũrĩ wamaka nĩũndũ wa kahinda karĩa gagoka? Kũgĩa na ũmenyo wa ũnabii wa Biblia ũtũonagia harĩa tũrĩ thĩinĩ wa mũtaratara wa mahinda. Ũnabii ũcio ndũheanaga ũhoro ũrĩa thĩ ĩhaanĩte ũmũthĩ tu, no ningĩ ũtũiguithagia kũna atĩ Ngai o ica ikuhĩ nĩarĩgarũra thĩ ĩtuĩke paradiso.—Kũguũrĩrio 21:3, 4.

Ũteithio wa Kũmenya Biblia

No gũkorũo nĩũgeretie gũthoma Biblia ũkĩona ĩrĩ hinya kũmĩmenya. Rĩngĩ no gũkorũo ndũĩ harĩa ũngĩrora Biblia-inĩ nĩgetha wone macokio ma ciũria ciaku. Akorũo nĩguo-rĩ, ndũrĩ wiki. Ithuĩ othe nĩtũkwenda gũteithĩrĩrio nĩgetha tũmenye Kiugo kĩa Ngai. Aira a Jehova thĩinĩ wa mabũrũri 235, maheanaga ũrutani wa Biblia hatarĩ irĩhi kũrĩ mamilioni ma andũ. No makene mũno magĩgũteithĩrĩria kũmenya o nawe.

Hũthĩra ĩrĩa njega mũno nĩ kwĩruta Biblia ũtagũtigithĩrĩa, wambĩrĩrie na morutani ma Ngai ma mũthingi. (Ahibirania 6:1) O ũrĩa ũrathiĩ na mbere, noguo ũrĩhotaga kũrĩa “irio iria nyũmũ” ũguo nĩkuuga ma ĩrĩa ndiku. (Ahibirania 5:14) Biblia nĩyo ĩrĩ na kĩhumo kĩa ũhoro ũcio. Mabuku makonainie na Biblia ta Ngai Endaga Twĩke Atĩa?, no magũteithĩrĩrie kuona na kũmenya Maandĩko ma mĩthemba mĩingĩ.

Hihi No Wende Gũtũmagĩra Kahinda O Kiumia O Kiumia Nĩgetha Ũmenye Biblia?

Kwĩruta Biblia no kũbangwo ihinda rĩrĩa rĩega nawe, handũ harĩa hakũagĩrĩire. Aingĩ mathomithagio marĩ oiki mĩciinĩ yao. Angĩ mathomithagĩrio kũhĩtũkĩra thimũinĩ. Mũtabarĩre ũyũ wa gĩthomo, ndũthomithanagĩrio kĩraathinĩ kũndũ kũrĩ andũ aingĩ, no ũkorũo wĩ wiki kũringana na ũrĩa ũkwenda na ningĩ kũringana na ũmenyo waku wa gĩthomo. Gũtirĩ igeranio, kana ũndũ wagũtũma ũigue thoni. Ciũria ciaku ikoniĩ Biblia nĩirĩcokagio na wĩrutage ũrĩa ũngĩkuhĩrĩria Ngai.

Gũtirĩ hĩndĩ ũkarĩhio nĩũndũ wa gũthomithio Biblia. (Mathayo 10:8) Andũ a ndini ciothe o hamwe na arĩa matarĩ a ndini no nĩmendete kũna kũongerera ũmenyo wao wa Kiugo kĩa Ngai, mathomithagio hatarĩ irĩhi.

Nũũ ũngĩkorũo arĩ ndereti-inĩ icio? Famĩlĩ yaku yoothe. Arata aku arĩa ũngĩenda gwĩta no mũgũatanĩre. Kana ũngĩenda, no ũkorũo ndereti-inĩ icio ũrĩ o wee wiki tu. Andũ aingĩ mabangaga kahinda ga ithaa rĩmwe o kiumia o kiumia kwĩruta Biblia. Ũngĩkorũo no ũhote gũtũmĩra kahinda kanene o na kana kanini o kiumia o kiumia-rĩ, Aira a Jehova nĩmarĩkoragũo na kahinda nĩũndũ wa gũgũteithĩrĩria.

Wahoyo Wĩrute

Nĩtwakũhoya warie na Aira a Jehova. Na njĩra ĩmwe ya gwĩka ũguo nĩ kwandĩka ũtũmĩrĩte andirethi ici cionanĩtio haha mũhuro. Mĩbango hĩndĩ ĩyo ĩthondekwo ya mũndũ gũkũruta Biblia gwaku mũciĩ hatarĩ irĩhi o rĩothe.

□ Ndũmĩra kobi ya kabuku gaka Ngai Endaga Twĩke Atĩa? Ũngĩenda rũthiomi rũrĩkũ?

□ Ndamũhoya mũke mũndute Biblia hatarĩ irĩhi.

Maandiko maria monanĩtio thĩinĩ wa trakti ĩno moimĩte thĩinĩ wa The Bible in Kikuyu.