Wee No Wende Kũmenya Ma?

NĨ MA ĩkoniĩ kĩĩ? Ĩkoniĩ imwe cia ciũria iria cia bata mũno ici:

• Ngai hihi nĩ atũrũmbũyagia kũna?

• Hihi mbaara na mĩnyamaro nĩ igaathira o rĩ?

• Gũtuĩkaga atĩa harĩ ithuĩ rĩrĩa twakua?

• Kwĩ na kĩĩrĩgĩrĩro o gĩothe harĩ arĩa makuĩte?

• Ingĩhoya atĩa nĩguo Ngai anjigue?

• Ingĩona gĩkeno kĩa ma atĩa ũtũũro-inĩ?

Wee ũngĩruta kũ macokio ma ciũria icio? Ũngĩũria andũ mwanya mwanya-rĩ, ũkũheo macokio matiganĩte. O na ũngĩũria andũ arĩa mathiaga kanitha kana ahunjia-rĩ, ũkũheo o macokio matahaanaine. Mamwe ma macokio macio mahota kuoneka ta marĩ magĩrĩru hĩndĩ ĩyo, no maikaranga makorũo matirahũthĩka.

No rĩrĩ, nĩ kũrĩ ibuku rĩmwe rĩkoragũo na macokio ma kwĩhokeka. Nĩ ibuku rĩaragia ma. Jesu Kristo oigire ũũ ihoya-inĩ rĩake kwĩ Ngai: “Ũhoro waku nĩguo ũhoro-ũrĩa-wa-ma.” (Johana 17:17) Ũmũthĩ nĩ tũĩ Ũhoro ũcio nĩguo Bibilia. Waguũria haha mbere nĩ ũkuona macokio makuhĩ ma Bibilia ma ma na mahũthũ ma ciũria icio.

Ngai Hihi Nĩ Atũrũmbũyagia Kũna?

GĨTŨMI GĨA KĨŨRIA KĨU: Tũratũũra thĩinĩ wa thĩ ĩiyũirũo nĩ wĩki-naĩ na waagi wa kĩhooto. Ndini nyingĩ irutanaga atĩ mĩnyamaro ĩrĩa tuonaga ĩkoragũo ĩrĩ wendi wa Ngai.

ŨRĨA BIBILIA ĨRUTANAGA: Ngai tiwe ũrehaga maũndũ marĩa mooru. Ayubu 34:12 yugaga ũũ: “Mũrungu ndarĩ hingo angĩĩka waganu, we Mwene-Hinya ndangĩhongʼora cira.” Ngai arĩ na itanya rĩega mũno rĩa wendo harĩ andũ. Nĩkĩo Jesu aatũrutire tũhoyage ũũ: “Ithe witũ wĩ Igũrũ, . . . Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu Igũrũ.” (Mathayo 6:​9, 10) Ngai nĩ atũrũmbũyagia mũno o ũndũ ekĩte maũndũ maingĩ mũno nĩgetha ahingie itanya rĩake.​​—⁠Johana 3:​16.

Rora o na Kĩambĩrĩria 1:​26-​28; Jakubu 1:13; na 1 Petero 5:​6, 7.

Hihi Mbaara na Mĩnyamaro Nĩ Igaathira o Rĩ?

GĨTŨMI GĨA KĨŨRIA KĨU: Mbaara irathiĩ o na mbere kũraga andũ aingĩ mũno. Ithuothe twanahutio nĩ mĩnyamaro ya gũkũ thĩ.

ŨRĨA BIBILIA ĨRUTANAGA: Ngai nĩ arathĩte hĩndĩ akaarehe thayũ thĩ yothe. Rungu rwa Ũthamaki wake, kana thirikari ya igũrũ-rĩ, andũ matigacoka “kwĩruta kana kwĩĩgithia mbaara rĩngĩ o na rĩ.” Ithenya rĩa ũguo-rĩ, ‘magatura hiũ ciao cia njora ituĩke hiũ cia mĩraũ.’ (Isaia 2:4) Ngai nĩ akaanina biũ waagi wothe wa kĩhooto na mĩnyamaro. Bibilia ĩranĩire ũũ: “[Ngai] nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere [o hamwe na waagi wa kĩhooto na mĩnyamaro ĩrĩa ĩ kuo rĩu] nĩ mathengu magathira.”​​—⁠Kũguũrĩrio 21:​3, 4.

Rora o na Thaburi 37:​10, 11; 46:9; na Mika 4:​1-4.

Gũtuĩkaga Atĩa Harĩ Ithuĩ Rĩrĩa Twakua?

GĨTŨMI GĨA KĨŨRIA KĨU: Ndini nyingĩ irutanaga atĩ nĩ harĩ kĩndũ gĩkoragũo thĩinĩ wa mũndũ gĩthiaga na mbere gũtũũra o na aakua. Amwe moigaga atĩ arĩa makuĩte no matũgere ngero kana atĩ Ngai atuagĩra andũ arĩa oru gũikio mwaki-inĩ matũũre maheraga.

ŨRĨA BIBILIA ĨRUTANAGA: Mũndũ aakua nĩ athira. Kohelethu 9:5 yugaga atĩ “arĩa makuĩte-rĩ, matirĩ ũndũ moĩ.” Tondũ arĩa makuĩte gũtirĩ ũndũ mangĩmenya, kana kũigua, kana kuona, kana gwĩciria-rĩ, matingĩteithia arĩa me muoyo kana mameke ũũru.​​—⁠Thaburi 146:​3, 4.

Rora o na Kĩambĩrĩria 3:​19 na Kohelethu 9:​6, 10.

Kwĩ na Kĩĩrĩgĩrĩro o Gĩothe Harĩ Arĩa Makuĩte?

GĨTŨMI GĨA KĨŨRIA KĨU: Nĩ twendaga gũtũũra muoyo, na nĩtwendaga gũkenera ũtũũro hamwe na arĩa twendete. Nĩ ũndũ wa ndũire atĩ nĩtwĩriragĩria gũkoona rĩngĩ endwa aitũ arĩa makuĩte.

ŨRĨA BIBILIA ĨRUTANAGA: Andũ aingĩ arĩa makuĩte nĩmakariũkio. Jesu eeranĩire atĩ “arĩa othe me thĩinĩ wa mbĩrĩra [nĩ] makaigua mũgambo wake . . . na moime kuo.” (Johana 5:​28, 29) Kũringana na itanya rĩa Ngai rĩa mbere-rĩ, arĩa makariũkio gũkũ thĩ nĩ makaagĩa na mweke wa gũtũũra thĩinĩ wa paradiso. (Isaia 65:​21-25) Hĩndĩ ĩyo andũ arĩa aathĩki magaakenera ũgima mũkinyanĩru wa mwĩrĩ na muoyo wa tene na tene. Bibilia yugaga ũũ: “Arĩa athingu nĩo makagaya thĩ, na gũtũũra mamĩtũũre o nginya tene.”​​—⁠Thaburi 37:29.

Rora o na Ayubu 14:​14, 15; Luka 7:​11-​17; na Atũmwo 24:15.

Ingĩhoya Atĩa Nĩguo Ngai Anjigue?

GĨTŨMI GĨA KĨŨRIA KĨU: Andũ a ndini hakuhĩ ciothe nĩmahoyaga. No, aingĩ monaga mahoya mao ta matacokagio.

ŨRĨA BIBILIA ĨRUTANAGA: Jesu oigire atĩ tũtigacokagĩre ciugo o iria iria rĩrĩa tũkũhoya. Oigire ũũ: “Mũkĩhoya-rĩ, tigai kũhũhũtaga,” kana kũraihia ũhoro. (Mathayo 6:7) Okorũo nĩ tũkwenda Ngai aigue mahoya maitũ-rĩ, no nginya tũhoe na njĩra ĩrĩa etĩkĩrĩte. Nĩgetha twĩke ũguo-rĩ, tũbataire kwĩruta wendi wa Ngai nĩ ũrĩkũ na tũhoe kũringana naguo. Johana wa mbere 5:​14 yugaga ũũ: “Twahoya ũndũ waganĩrĩire na kwenda gwake [Ngai], nĩatũiguaga.”

Rora o na Thaburi 65:2; Johana 14​:​6, 14; na 1 Johana 3:​22.

Ingĩona Gĩkeno kĩa Ma Atĩa Ũtũũro-inĩ?

GĨTŨMI GĨA KĨŨRIA KĨU: Andũ aingĩ metĩkĩtie atĩ mbeca, ngumo, kana ũthaka no imarehere gĩkeno. Nĩ ũndũ ũcio-rĩ, methaga indo ta icio na hinya mũno, no mationaga gĩkeno.

ŨRĨA BIBILIA ĨRUTANAGA: Jesu nĩ oonanirie hitho ya kuona gĩkeno rĩrĩa oigire ũũ: “Gũkena-rĩ, nĩ andũ arĩa maiguaga Ũhoro wa Ngai, makaũrũmagia.” (Luka 11:28) Gĩkeno kĩa ma no kĩonekire tu korũo tuoya ikinya rĩa kũhingia bata witũ ũrĩa mũnene biũ, ũrĩa guo arĩ nyota itũ ya kũmenya ma ĩkoniĩ Ngai na itanya rĩake harĩ ithuĩ. Ma ĩyo yonekaga thĩinĩ wa Bibilia. Kũmenya ma ĩyo no gũtũteithie gũkũũrana maũndũ marĩa ma bata na marĩa matarĩ ma bata. Gwĩtĩkĩria ma ya Bibilia ĩtongorie matua maitũ na ciĩko ciitũ nĩgũtũmaga tũgĩe na ũtũũro wĩ na uumithio makĩria.

Rora o na Thimo 3:​5, 6, 13-​18; na 1 Timotheo 6:​9, 10.

Twarora o na njĩra nguhĩ tu macokio ma Bibilia ma ciũria ithathatũ. No wende kũmenya makĩria ma ũguo? Angĩkorũo ũrĩ ũmwe wa ‘arĩa maiguaga Ũhoro wa Ngai, na makaũrũmia-rĩ,’ hatarĩ nganja no wende. No wĩyũrie ciũria ingĩ ta ici: ‘Okorũo Ngai nĩatũrũmbũyagia-rĩ, etĩkĩrĩtie waganu na mĩnyamaro mĩingĩ ũguo ithiĩ na mbere mĩaka ĩyo yothe nĩkĩ? Ingĩka atĩa nĩguo ũtũũro wa famĩlĩ yakwa wagĩre?’ Bibilia nĩ ĩcokagia wega biũ ciũria icio na ingĩ nyingĩ na njĩra ĩgũtũma ũiganĩre.

No rĩrĩ, andũ aingĩ ũmũthĩ matithomaga Bibilia. Mamĩonaga ta arĩ ibuku inene mũno na iritũ gũtaũkĩrũo nĩrĩo. No wende ũteithio wa kuona macokio thĩinĩ wa Bibilia? He maũndũ merĩ Aira a Jehova mangĩgũteithia namo.

Wa mbere, nĩ ibuku rĩĩtagwo Bibilia Ĩrutanaga Atĩa Kũna?, rĩrĩa rĩhaarĩirio gũteithĩrĩria andũ arĩa matarĩ na mahinda maiganu, mathuthurie macokio ma Bibilia ma ciũria cia bata. Ũteithio wa kerĩ nĩ mũtaratara wa kwĩruta Bibilia na andũ mĩciĩ-inĩ kwao hatarĩ marĩhi. Ũmwe wa Aira a Jehova ũikaraga hakuhĩ nawe no agũceerere gwaku mũciĩ, kana handũ hangĩ hega nawe, na ahũthĩre kahinda kanini tu o kiumia kwĩruta Bibilia nawe hatarĩ marĩhi. Andũ milioni nyingĩ thĩ yothe nĩ magunĩkĩte nĩ mũtaratara ũcio. Aingĩ ao macokaga kuuga ũũ makenete: “Ĩno nĩyo ma!”

Gũtirĩ ũndũ mwega gũkĩra ũcio. Ma ya Bibilia ĩtũkũũraga kuuma gwĩtigĩra maũndũ matarĩ kuo, kũhĩngĩcanĩrwo nĩ maũndũ, na guoya. Ĩtũheaga mwĩhoko, gĩkeno, na gĩtũmi gĩa gũtũũra. Jesu oigire ũũ: “Nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.”​​—⁠Johana 8:​32.