Jesu Kristo​—Mesia Ũrĩa Weranĩirũo

NĨGUO atũteithie gũkũũrana Mesia-rĩ, Jehova Ngai nĩ aatongoririe anabii aingĩ a Bibilia marathe maũndũ maingĩ megiĩ gũciarũo, ũtungata, na gĩkuũ kĩa Mũkũũri ũcio weranĩirũo. Ũrathi ũcio wothe wa Bibilia nĩ wahingire harĩ Jesu Kristo. Nĩ ũrathi wĩ maũndũ maingĩ na ndũrĩ mahĩtia o na hanini. Reke tuone morathi mamwe maagwetete maũndũ megiĩ gũciarũo kwa Mesia na ũtũũro wake e mwana.

Mũnabii Isaia nĩ aarathĩte atĩ Mesia angĩoimanire na rũciaro rũa Mũthamaki Daudi. (Isaia 9:7) Jesu na ma oimanire na rũciaro rũa Daudi.​​—Mathayo 1:​1, 6-​17.

Mũnabii ũngĩ wa Ngai, Mika, nĩ aarathire atĩ mwana ũcio thutha-inĩ, angĩatuĩkire mũthamaki na atĩ angĩaciarĩirũo “Bethilehemu Efiratha.” (Mika 5:2) Hĩndĩ ya gũciarũo kwa Jesu-rĩ, kwarĩ na taũni igĩrĩ thĩinĩ wa Isiraeli cietagwo Bethilehemu. Ĩmwe yaarĩ hakuhĩ na Nazarethi, mwena wa gathigathini wa bũrũri, na ĩrĩa ĩngĩ yaarĩ hakuhĩ na Jerusalemu thĩinĩ wa Juda. Tene, Bethilehemu ĩrĩa yaarĩ hakuhĩ na Jerusalemu yetagwo Efiratha. Kũu nĩkuo Jesu aaciarĩirũo, o ta ũrĩa ũrathi woigĩte!​​—Mathayo 2:1.

Ũrathi ũngĩ wa Bibilia woigĩte atĩ Mũrũ wa Ngai nĩ angĩetirũo ‘kuuma Misiri.’ Jesu aatwarĩtwo Misiri e mwana. Aacokirio kuuma Misiri thutha wa Herode gũkua, na kwoguo ũrathi ũcio ũkĩhinga.​​—Hosea 11:1; Mathayo 2:​15.

Maandĩko marĩa monanĩtio karatathi-inĩ ka 200 rungu wa kĩongo “Ũrathi,” marĩ na maũndũ makoniĩ Mesia. No ũringithanie maandĩko macio na marĩa marĩ rungu rũa kĩongo “Kũhinga.” Gwĩka ũguo nĩgũkuongerera hinya wĩtĩkio waku harĩ ũũma wa Kiugo kĩa Ngai.

Ũgĩthuthuria maandĩko macio-rĩ, ririkana atĩ macio ma ũrathi maandĩkirũo mĩaka magana maingĩ Jesu atanaciarũo. Jesu oigire ũũ: “Gũtirĩ hingo maũndũ mothe matakahingio, o marĩa maandĩkĩtwo ũhoro wakwa watho-inĩ wa Musa, o na mabuku-inĩ ma anabii, o na thaburi-inĩ.” (Luka 24:44) O ta ũrĩa ũkuona thĩinĩ wa Bibilia yaku-rĩ, ũrathi ũcio wothe nĩwaahingire!