Jesu agĩkũngũĩrũo akĩingĩra Jerusalemu akuuĩtwo nĩ ndigiri

Hihi Morathi Megiĩ Mesia nĩ Monanagia atĩ Jesu Nĩwe Warĩ Mesia?

Macokio ma Bibilia

Ĩĩ. Rĩrĩa Jesu aarĩ gũkũ thĩ, nĩ aahingirie morathi maingĩ megiĩ “Mesia ũrĩa Mũtongoria,” ũrĩa watuĩkire “Mũhonokia wa thĩ.” (Danieli 9:25; 1 Johana 4:14) Ningĩ o na thutha wa Jesu gũkua, nĩ aathiire na mbere kũhingia morathi megiĩ Mesia.—Thaburi 110:1; Atũmwo 2:34-36.

Kiugo “Mesia” kiugĩte atĩa?

Kiugo gĩa Kĩhibirania Ma·shiʹach (Mesia) na kiugo gĩa Kĩngiriki kĩrĩa kĩringaine na kĩu Khri·stos (Kristo) cierĩ ciugĩte “Ũrĩa Mũitĩrĩrie Maguta.” Kwoguo, “Jesu Kristo” nĩ kuuga “Jesu Ũrĩa Mũitĩrĩrie Maguta,” kana “Jesu Ũrĩa Mesia.”

Mahinda-inĩ ma Bibilia, mũndũ aamũragwo na njĩra ya gũitĩrĩrio maguta mũtwe rĩrĩa arehokerũo ũnene mũna wa mwanya. (Maũndũ ma Alawii 8:12; 1 Samueli 16:13) Jesu aamũrirũo nĩ Ngai nĩguo atuĩke Mesia—akĩheo ũnene wa gĩkĩro kĩa igũrũ mũno. (Atũmwo 2:36) O na kũrĩ ũguo, handũ ha kwamũra Jesu na njĩra ya kũmũitĩrĩria maguta, Ngai aamwamũrire kũgerera roho mũtheru.—Mathayo 3:16.

Hihi no kũhoteke morathi megiĩ Mesia mahingio nĩ makĩria ma mũndũ ũmwe?

Aca. O ta ũrĩa kĩrore kĩa mũndũ gĩkũũrithanagia mũndũ o ũmwe tu, noguo morathi ma Bibilia mangĩahingirio nĩ Mesia kana Kristo o ũmwe tu. O na kũrĩ ũguo, Bibilia nĩ ĩtũheaga mũkaana atĩ “nĩ gũgooka Kristo a maheeni na anabii a maheeni na maringe ciama nene na meke maũndũ ma magegania nĩguo mahĩtithie nginya arĩa athuure kũngĩhoteka.”—Mathayo 24:24.

Hihi no kũhoteke Mesia agooka ihinda rĩũkĩte?

Aca. Bibilia nĩ yarathĩte atĩ Mesia angĩkoimana na rũciaro rwa Mũthamaki Daudi wa Isiraeli. (Thaburi 89:3, 4) O na kũrĩ ũguo, rekondi cia ndĩra cia Ayahudi cia gũcoka nginya hĩndĩ ya Daudi nĩ ciorire, na no kũhoteke cianangirũo rĩrĩa Aroma maanangire Jerusalemu mwaka-inĩ wa 70 M.M.a Kuuma hĩndĩ ĩyo, gũtirĩ mũndũ ũrĩ wahota kuonania atĩ ooimanĩte na rũciaro rwa athamaki rwa Daudi. Mũgarũ na ũguo, o na gũtuĩka rekondi icio ciarĩ kuo rĩrĩa Jesu aarĩ gũkũ thĩ, nginya thũ ciake itiakaanire atĩ aarĩ wa rũciaro rwa Daudi.—Mathayo 22:41-46.

Bibilia ĩkoragwo na morathi maigana megiĩ Mesia?

Gũtingĩhoteka kũmenya biũ nĩ morathi maigana megiĩ Mesia marĩ thĩinĩ wa Bibilia. Kwa ngerekano, njĩra cia gũtara morathi no ikorũo irĩ ngũrani nginya icunjĩ-inĩ iria irarĩrĩria Mesia ĩmwe kwa ĩmwe. Ũhoro ũrĩa ũrĩ thĩinĩ wa Isaia 53:2-7 nĩ ũgwetete maũndũ maigana ũna ma ũrathi megiĩ Mesia. Andũ amwe no mone gĩcunjĩ kĩu gĩothe kĩrĩ ũrathi ũmwe, nao angĩ no mone o ũndũ gĩcunjĩ-inĩ kĩu ũrĩ ũrathi ngũrani.

Morathi mamwe megiĩ Mesia marĩa maahingirio nĩ Jesu

Ũrathi	Wonekaga thĩinĩ wa	Kũhinga
Rũciaro rwa Iburahimu	Kĩambĩrĩria 22:17, 18	Mathayo 1:1
Mbeũ ya Isaaka mũrũ wa Iburahimu	Kĩambĩrĩria 17:19	Mathayo 1:2
Angĩaciarĩirũo mũhĩrĩga-inĩ wa Juda	Kĩambĩrĩria 49:10	Mathayo 1:1, 3
Angĩoimanire na rũciaro rwa athamaki rwa Mũthamaki Daudi	Isaia 9:7	Mathayo 1:1
Angĩaciarirũo nĩ mũirĩtu gathirange	Isaia 7:14	Mathayo 1:18, 22, 23
Angĩaciarĩirũo Bethilehemu	Mika 5:2	Mathayo 2:1, 5, 6
Angĩetirũo Imanuelib	Isaia 7:14	Mathayo 1:21-23
Oimĩte famĩlĩ-inĩ ya athĩni	Isaia 53:2	Luka 2:7
Twana tũnini nĩ tuoragirũo thutha wake gũciarũo	Jeremia 31:15	Mathayo 2:16-18
Nĩ eetirũo kuuma Misiri	Hosea 11:1	Mathayo 2:13-15, 19, 20
Angĩgeetwo Mũnazarethic	Isaia 11:1	Mathayo 2:23
Nĩ kũngĩgooka mũtũmwo mbere yake	Malaki 3:1	Mathayo 11:7-10
Aaitĩrĩirio maguta atuĩke Mesia mwaka wa 29 M.M.d	Danieli 9:25	Mathayo 3:13-17
Ngai kũmũmenyithania arĩ ta Mũrũ Wake	Thaburi 2:7	Atũmwo 13:33, 34
Gũkorũo na kĩyo nĩ ũndũ wa nyũmba ya Ngai	Thaburi 69:9	Johana 2:13-17
Mũhunjia wa ũhoro mwega	Isaia 61:1	Luka 4:16-21
Wĩra wa kũhunjia kũrehe ũtheri mũnene Galili	Isaia 9:1, 2	Mathayo 4:13-16
Kũringa ciama ta Musa	Gũcokerithia Maathani 18:15	Atũmwo 2:22
O ta Musa, aaragia maũndũ moimanĩte na Ngai	Gũcokerithia Maathani 18:18, 19	Johana 12:49
Nĩ aahonirie andũ aingĩ	Isaia 53:4	Mathayo 8:16, 17
Ndeecaragĩria ngumo	Isaia 42:2	Mathayo 12:17, 19
Nĩ aaiguagĩra arĩa maanyamarĩkaga tha	Isaia 42:3	Mathayo 12:9-20; Mariko 6:34
Nĩ aaguũririe ũrĩa Ngai onanagia kĩhooto	Isaia 42:1, 4	Mathayo 12:17-20
Mũtaarani wa Magegania	Isaia 9:6, 7	Johana 6:68
Nĩ aaguũririe rĩĩtwa rĩa Jehova	Thaburi 22:22	Johana 17:6
Nĩ aahũthagĩra ngerekano akĩrutana	Thaburi 78:2	Mathayo 13:34, 35
Nĩ Mũtongoria	Danieli 9:25	Mathayo 23:10
Andũ aingĩ matiamwĩtĩkagia	Isaia 53:1	Johana 12:37, 38
Ihiga rĩa kũhĩngithia	Isaia 8:14, 15	Mathayo 21:42-44
Nĩ aaregirũo nĩ andũ	Thaburi 118:22, 23	Atũmwo 4:10, 11
Aathũũrĩtwo hatarĩ gĩtũmi	Thaburi 69:4	Johana 15:24, 25
Nĩ aakũngũĩirũo akĩingĩra Jerusalemu akuuĩtwo nĩ ndigiri	Zekaria 9:9	Mathayo 21:4-9
Nĩ aagaathĩrĩirio nĩ twana	Thaburi 8:2	Mathayo 21:15, 16
Ookire na rĩĩtwa rĩa Jehova	Thaburi 118:26	Johana 12:12, 13
Gũkunyanĩrũo nĩ mũrata wake wa hakuhĩ	Thaburi 41:9	Johana 13:18
Aakunyanĩirũo na icunjĩ 30 cia bethae	Zekaria 11:12, 13	Mathayo 26:14-16; 27:3-10
Nĩ aatiganĩirio nĩ arata ake	Zekaria 13:7	Mathayo 26:31, 56
Nĩ aarutĩirũo ũira wa maheeni	Thaburi 35:11	Mathayo 26:59-61
Gũkira arĩ mbere ya arĩa maamũthitangaga	Isaia 53:7	Mathayo 27:12-14
Nĩ aatuĩrĩirũo mata	Isaia 50:6	Mathayo 26:67; 27:27, 30
Nĩ aaringirũo mũtwe	Mika 5:1	Mariko 15:19
Nĩ aahũũrirũo na iboko	Isaia 50:6	Johana 19:1
Ndaagirĩrĩirie arĩa maamũhũũraga	Isaia 50:6	Johana 18:22, 23
Atongoria a thirikari nĩ maabangire njama ya kũmũũkĩrĩra	Thaburi 2:2	Luka 23:10-12
Nĩ aahũũrĩrĩirũo mĩcumarĩ moko na magũrũ mũtĩ-inĩ	Thaburi 22:16	Mathayo 27:35; Johana 20:25
Andũ nĩ maacukĩire nguo yake mĩtĩ	Thaburi 22:18	Johana 19:23, 24
Nĩ aataranĩirio hamwe na ehia	Isaia 53:12	Mathayo 27:38
Nĩ aathũũrĩtwo, na akarumwo	Thaburi 22:7, 8	Mathayo 27:39-43
Nĩ aanyamarĩkire nĩ ũndũ wa ehia	Isaia 53:5, 6	1 Petero 2:23-25
Oonekaga ta atiganĩirio nĩ Ngai	Thaburi 22:1	Mariko 15:34
Nĩ aaheirũo thiki na maĩ ma nyongo anyue	Thaburi 69:21	Mathayo 27:34
Nĩ aanyotire kahinda kanini atanakua	Thaburi 22:15	Johana 19:28, 29
Nĩ aaigire roho wake guoko-inĩ kwa Ngai	Thaburi 31:5	Luka 23:46
Nĩ aarutire muoyo wake	Isaia 53:12	Mariko 15:37
Nĩ aarutire ũkũũri nĩguo eherie mehia	Isaia 53:12	Mathayo 20:28
Mahĩndĩ make matiaunirũo	Thaburi 34:20	Johana 19:31-33, 36
Nĩ aathecirũo	Zekaria 12:10	Johana 19:33-35, 37
Aathikirũo hamwe na itonga	Isaia 53:9	Mathayo 27:57-60
Nĩ aariũkirio	Thaburi 16:10	Atũmwo 2:29-31
Mũndũ ũngĩ gũthuurũo acoke ithenya-inĩ rĩa mũmũkunyanĩri	Thaburi 109:8	Atũmwo 1:15-20
Nĩ aikarire thĩ guoko-inĩ kwa ũrĩo kwa Ngai	Thaburi 110:1	Atũmwo 2:34-36

a Ibuku rĩa McClintock and Strong’s Cyclopedia riugaga ũũ: “Hatirĩ nganja atĩ rekondi cia mĩhĩrĩga na famĩlĩ cia Ayahudi cianangirũo rĩrĩa Jerusalemu yanangirũo, no ti mbere ĩyo.”

b Rĩĩtwa rĩa Kĩhibirania Imanueli, rĩrĩa riugĩte “Ngai Arĩ Hamwe na Ithuĩ,” nĩ rĩonanagia wega itemi rĩa Jesu arĩ Mesia. Gũka gwake gũkũ thĩ na maũndũ marĩa eekire nĩ moonanirie atĩ Ngai arĩ hamwe na athathaiya Ake.—Luka 2:27-32; 7:12-16.

c No kũhoteke kiugo “Mũnazarethi” kiumanĩte na kiugo gĩa Kĩhibirania neʹtser, kĩrĩa kiugĩte “thuuna.”

d Nĩguo wone ũhoro makĩria wĩgiĩ ũrĩa morathi ma Bibilia monanagia atĩ mesia angĩgooka mwaka-inĩ wa 29 M.M., rora gĩcunjĩ kĩrĩ na kĩongo “Ũrĩa Ũnabii wa Danieli Waarathĩte Gũũka kwa Mesia.”

e O na gũtuĩka ũrathi ũcio ũrĩ ibuku-inĩ rĩa Zekaria, mwandĩki wa ibuku rĩa Mathayo ooigire atĩ ciugo icio “ciaaririo nĩ mũnabii Jeremia.” (Mathayo 27:9) Kuonekaga atĩ ibuku rĩa Jeremia rĩmwe nĩ rĩaigagwo kĩambĩrĩria-inĩ gĩa gĩcunjĩ kĩa Maandĩko marĩa meetagwo “ma Anabii.” (Luka 24:44) No kũhoteke Mathayo aahũthĩrire rĩĩtwa “Jeremia” kũrũgamĩrĩra mabuku macio mothe, marĩa maarĩ hamwe na ibuku rĩa Zekaria.