GĨCUNJĨ KĨA 34
Njagĩrĩirũo Gũtũũra Kũringana na Motaaro ma Bibilia Nĩkĩ?
Ta hũũra mbica mũkĩrĩa ranji hamwe na airĩtu erĩ mwĩ cukuru, mũkona mwanake ũrĩa wĩrĩga gũthamĩra cukuru yanyu.
Mũirĩtu wa mbere agakwĩra, “Brett nĩ akwendete mũno. Nyonaga agĩkũrora na ndeheragia maitho harĩ wee!”
Mũirĩtu wa kerĩ nake agakũheherera agakwĩra, “Na nĩ ũĩ, gũtirĩ mũirĩtu marĩ ndũgũ!”
Nawe ũrona ta maũndũ macio marakwĩra marĩ ma ma. O na kũrĩ mũthenya Brett aragwĩtĩte kwao kũrĩ na ndĩa. Nĩ waregire gũthiĩ, o na gũtuĩka nĩ weciragia ũrĩa kũngĩathiire na mbere ũngĩathiire.
Mũirĩtu wa mbere agakwarĩria o hĩndĩ ĩyo ũreciria maũndũ macio.
Akoiga, “Na arĩ korũo gũtirĩ mwanake tũrĩ ndũgũ, ingĩtĩkĩra Brett o rĩo.”
Agacoka agakũrora ta arenda gũkũũria ũndũ, na nĩ ũramenya ũrĩa arenda gũkũũria.
Agakũũria, “Nĩ kĩĩ gĩtũmaga ũkorũo ũtarĩ na mwanake mũrĩ ndũgũ nake?”
Nĩ ũthũire kĩũria kĩu. Ũhoro wa ma nĩ atĩ, no wende kũgĩa ndũgũ na mwanake. No nĩ wĩrĩtwo atĩ nĩ wega gweterera nginya rĩrĩa ũgaakorũo wĩhaarĩirie kũingĩra kĩhiko-inĩ nĩguo ũgĩe ndũgũ na mũndũ. Ũkambĩrĩria kwĩĩra, tiga nĩ . . .
Mũirĩtu wa kerĩ agakũũria, “Nĩ kanitha yanyu?”
Nawe ũkeyũria, ‘Kaĩ arathoma meciria?’
Agacoka agakũnyũrũria akauga, “Hingo ciothe wee wĩciragia o ũhoro wa Bibilia. Rĩmwe nĩ wega gũkenera ũtũũro hanini.”
HIHI nĩ ũrĩ wanyũrũrio nĩ ũndũ wa kwĩrutanĩria gũtũũra kũringana na motaaro ma Bibilia? Angĩkorũo wananyũrũrio, no gũkorũo nĩ weyũragia kana nĩ harĩ maũndũ waagaga gũkenera. Mũirĩtu ũmwe wĩtagwo Deborah nĩ oonaga ũguo. Aaugire: “Ndoonaga ta motaaro ma Bibilia maangiragĩrĩria. Nderiragĩria kũgĩa na wĩyathi ta ũrĩa arata arĩa twathomaga nao maarĩ naguo.”
Ũũma wa Ũhoro
To mũhaka wĩrute na rĩaku. O ta mwandĩki wa thaburi wetagwo Asafu, nĩ wega kwĩruta kuumana na mahĩtia ma andũ arĩa angĩ na noguo Maandĩko monanagia. Harĩ hĩndĩ oonaga ta mawatho ma Ngai maamũimaga wĩyathi. No rĩrĩa aathuthuririe moimĩrĩro ma andũ arĩa maatiganĩirie njĩra cia Ngai, nĩ oonire ũũma wa ũhoro. Thutha-inĩ Asafu nĩ oonire atĩ andũ acio maarĩ “handũ hatenderũ.”—Thaburi 73:18.
Nĩguo wone ũndũ ũcio, ta rora ciugo cia andũ ethĩ maatiganĩirie motaaro ma Bibilia kwa ihinda na makĩingĩria ngomanio-inĩ matarĩ maraingĩra kĩhiko-inĩ.
● Nĩ maũndũ marĩkũ maatongoririe mwĩcirĩrie na ciĩko ciaku?
Deborah: “Ndĩ cukuru ndoonaga anake na airĩtu marĩ na ndũgũ, na moonekaga marĩ na gĩkeno. Twĩ nao nĩ ndoonaga makĩmumunyana na makahĩmbanĩria, na ũndũ ũcio nĩ watũmaga njigue ihooru na ngamaiguĩra ũiru. Kaingĩ nĩ ndeekoraga ngĩciria ũhoro wa mwanake ũmwe ndeendete. Ũndũ ũcio watũmaga ndĩrirĩrie o na makĩria gũkorũo hamwe nake.”
Mike: “Ndaathomaga mabuku na ngerorera ibindi ciatũũgagĩria ngomanio. Kwarĩrĩria ũhoro wa ngomanio hamwe na arata akwa nĩ gwatũmaga ndĩrirĩrie mũno gwĩka ũguo. Ingĩekorire ndĩ nyiki na mũirĩtu, ndeeciragia atĩ nĩ tũngĩonanirie wendo na njĩra ya kũhutahutania tũtegũkoma hamwe, na atĩ nĩ ingĩahotire kwĩgirĩrĩria.”
Andrew: “Nĩ ndaamenyerete kwĩrorera ponografĩ Intaneti-inĩ. Ndaambĩrĩirie kũnyua njohi mũno, na gũthiaga ndĩa na andũ ethĩ arĩa mataatĩĩte motaaro ma Bibilia.”
Tracy: “Meciria-inĩ makwa nĩ ndaamenyaga atĩ ti wega mũndũ kwĩingĩria ngomanio-inĩ atarĩ kĩhiko-inĩ, no ndiathũire ũndũ ũcio. Ndiendaga gũkoma na mũndũ itaingĩrĩte kĩhiko-inĩ, no nĩ ndaatooririo nĩ merirĩria makwa. Kwa ihinda rĩna thamiri yakwa ndĩathumbũraga o na hanini.”
● Hihi mũtũũrĩre ũcio nĩ watũmire ũgĩe na gĩkeno?
Deborah: “Kĩambĩrĩria-inĩ nĩ ndaaiguaga ndĩ na wĩyathi, na nĩ ndaakenaga nĩ ũndũ wa gwĩtĩkĩrĩka nĩ arata akwa. No ndaaiguire ũguo kwa ihinda. Ndaambĩrĩirie kwĩyona itarĩ mũtheru, ndĩ na mahĩtia, na itarĩ kĩene. Nĩ ndeeririre mũno tondũ rĩu ndiarĩ gathirange rĩngĩ.”
Andrew: “Kũhingia merirĩria makwa moru gwathiire gũtuĩkĩte ũndũ mũhũthũ. No ihinda-inĩ o rĩu ndaaiguaga hĩtĩtie na ndĩĩmenete.”
Tracy: “Kwĩingĩria ngomanio-inĩ nĩ gwathũkirie wĩthĩ wakwa. Ndeeciragia atĩ twĩ na mwanake ũrĩa twarĩ ndũgũ nake tũngĩatũũrire na gĩkeno kĩnene. No tiguo gwathiire. O ũmwe witũ aatumire ũcio ũngĩ aigue arĩ na ruo rwa ngoro, kĩeha, na ihooru. Kaingĩ ũtukũ ndeekoraga ngĩrĩra ndĩ ũrĩrĩ, ngĩĩrira kaba ingĩekire ũrĩa Jehova augaga.”
Mike: “Ndaambĩrĩirie kũigua ta nguĩte. Nĩ ndaageririe kwaga gũtindanĩra na moimĩrĩro ma ciĩko ciakwa harĩ andũ arĩa angĩ, no ngĩremwo. Nĩ ndaaiguire ũũru kuona atĩ hĩndĩ ĩyo ndeyethagĩra gĩkeno, nĩ ndaatuurithagia andũ arĩa angĩ.”
● Nĩ ũtaaro ũrĩkũ ũngĩhe andũ ethĩ arĩa monaga ta motaaro ma Bibilia megiĩ mĩtugo maimaga andũ wĩyathi?
Tracy: “Tũũra kũringana na mawatho ma Jehova na ũnyitanagĩre na arĩa mekaga ũguo. Nĩ ũrĩkoragwo na gĩkeno makĩria weka ũguo.”
Deborah: “Ndũgeciragie o ũhoro waku mwene na ũrĩa ũrenda. Ciĩko ciaku nĩ ihutagia andũ arĩa angĩ. Na ũngĩaga kũrũmĩrĩra ũtaaro wa Ngai ũkwĩreherera mathĩna wee mwene.”
Andrew: “Mũndũ atagimarĩte wega onaga ũtũũro wa arata ake ũrĩ mwega. No ambĩrĩrie kuona maũndũ ta o. Kwoguo thuuraga arata aku na ũũgĩ. Wĩhoke Jehova na ndũkeerira.”
Mike: “Iheo imwe cia bata iria Jehova akũheete nĩ thamiri theru na kwĩhe gĩtĩo. Gũteanĩria iheo icio tondũ ndũngĩhota kwĩgirĩrĩria nĩ kwĩyagĩra kĩene. Aria na aciari aku kana andũ angĩ agimaru ũmeere mathĩna maku. Ũngĩhĩtia, umbũra mahĩtia maku na ũrũnge maũndũ o na ihenya. Weka maũndũ ũrĩa Jehova endaga, ũrĩkoragwo na thayũ wa ma.”
Hihi Motaaro ma Bibilia nĩ ma Gũkũgirĩrĩria Kana nĩ ma Gũkũgitĩra?
Jehova nĩ ‘Ngai mũkeni,’ na nĩ endaga o nawe ũgĩe gĩkeno. (1 Timotheo 1:11; Kohelethu 11:9) Motaaro marĩa marĩ thĩinĩ wa Bibilia nĩ ma gũkũguna. Nĩ ma no wone ta marakũgirĩrĩria kũgĩa wĩyathi. No ũrĩa kũrĩ nĩ atĩ, motaaro ma Bibilia nĩ ma gũkũgitĩra.
No wĩhoke Bibilia. Ũngĩtũũra kũringana na motaaro mayo, nĩ ũgũkenia Jehova na nĩ ũkũgunĩka.—Isaia 48:17.
No ũtuĩke mũrata wa Ngai. Thoma wone ũrĩa ũngĩka ũguo.
RĨANDĨKO RĨA MŨTHINGI
“Niĩ Jehova, nĩ niĩ Ngai waku, o we Ũrĩa ũkũrutaga nĩguo ũgunĩke wee mwene.”—Isaia 48:17.
ŨNDŨ ŨNGĨKA
Wĩcirie ũrĩa ũngĩtaarĩria mũndũ mũnini gũgũkĩra atĩ kũrũmĩrĩra motaaro ma Bibilia nĩ kũrĩ ũguni. Kwaria ũhoro wa maũndũ marĩa wĩtĩkĩtie nĩ njĩra ĩmwe ya gũtũma makorũo marũmĩte wega ngoro-inĩ yaku.
HIHI NĨ ŨĨ . . . ?
Mũndũ no oye o ihinda inini gũthũkia ũrata wake na Jehova, no kũũcokia no kuoe mĩaka mĩingĩ.
MAKINYA MARĨA ŨNGĨOYA!
Nĩguo hote gũtaũkĩrũo nĩ ũũgĩ ũrĩa uumanaga na motaaro ma Bibilia, ngwĩka ũũ ․․․․․
Ingiambĩrĩria kũiguĩra ũiru arĩa mathiaga na mĩthiĩre ya gũkũ thĩ ĩtagĩrĩire ngwĩka ũũ ․․․․․
Ũndũ ũrĩa ingĩenda kũria aciari akwa wĩgiĩ ũndũ ũyũ nĩ ․․․․․
ŨGWĨCIRIA ATĨA?
● Ũhoro-inĩ wĩgiĩ maumĩrĩra ma kwaga gwathĩkĩra mawatho ma Ngai-rĩ, nĩkĩ to mũhaka mũndũ erute na rĩake?
● Ũreruta atĩa kuumana na ũrĩa Deborah, Mike, Andrew, na Tracy maaugire?
● Nĩ kĩĩ gĩtũmaga andũ amwe mone ta mawatho ma Bibilia marĩ ma kũmagirĩrĩria, no nĩkĩ muonere ũcio ndwagĩrĩire?
“Ruo rwa kũrũngwo nĩ ũndũ wa kũhĩtia ti rũnene ta rwa kũgeria kũhitha mahĩtia.’’—Donna
Motaaro ma Bibilia ti ma gũkũgirĩrĩria kũgĩa gĩkeno, nĩ ma gũkũgitĩra