KĨŨRIA KĨA 7

Ingĩka Atĩa Mũndũ Angĩnjĩra Tũkomanie?

BATA WA KŨMENYA ŨNDŨ ŨCIO

Matua maku megiĩ ngomanio nĩ mahutagia mũno ũtũũro waku wa thutha-inĩ.

ŨRĨA ŨNGĨKA

Ta wĩcirie ũndũ ũyũ: Mary amenyete Mike kwa ihinda rĩa mĩeri ĩĩrĩ tu, no arona ta maamenyanire tene. Nĩ matũmanagĩra ndũmĩrĩri maita maingĩ, makaranĩria na thimũ mathaa maingĩ, na o ũmwe wao no ahote kũmenya ũndũ ũrĩa ũcio ũngĩ arenda kuuga. No rĩu Mike arenda meke ũndũ ũngĩ makĩria.

Mĩeri-inĩ ĩyo ĩĩrĩ mĩthiru, Mike na Mary no moko manyitanaga na makamumunyana hanini. Mary ndarenda meke ũndũ ũngĩ makĩria ma ũguo. No ningĩ ndangĩenda matigane na Mike. Nowe tu ũtũmaga eigue arĩ mũthaka na arĩ wa mwanya. Eĩraga ũũ: ‘Nĩ twendanĩte na Mike . . . ’

Angĩkorũo ũrĩ mũgima ũndũ ũngĩtuma ndũgũ na ũcemanie na ũndũ ta wa Mary-rĩ, ũngĩka atĩa?

TA WĨCIRIE

Nguo ĩkĩhũthĩrũo gũtheria handũ — Ngomanio nĩ kĩheo kuuma kũrĩ Ngai kũrĩ arĩa mahikanĩtie tu. Gũkomania mbere ya kĩhiko nĩ kũhũthĩra kĩheo kĩu ũũru. Nĩ ta ũheetwo nĩ mũndũ nguo thaka mũno no ũkamĩhũthĩra ũũru

Ũngĩrũga kuuma mũtĩ igũrũ ũgerie kũmbũka ta nyoni, ũngĩringa thĩ ũigue. Na ũguo noguo kũrĩ ũngĩaga gwathĩkĩra watho ta ũyũ wĩgiĩ mĩtugo: “Mwĩthemage ngomanio itagĩrĩire.”—1 Athesalonike 4:3.

Nĩ moimĩrĩro marĩkũ moru ũngĩcemania namo ũngĩaga gwathĩkĩra watho ũcio? Bibilia yugaga ũũ: “Mũndũ o wothe wĩingĩragia thĩinĩ wa ngomanio itagĩrĩire nĩ mwĩrĩ wake mwene ehagĩria.” (1 Akorintho 6:18) Nĩkĩ ũndũ ũcio nĩ wa ma?

Athuthuria nĩ monete atĩ andũ aingĩ ethĩ arĩa meingĩranagia na ngomanio tene, nĩ macemanagia na maũndũ ta maya marũmĩrĩire.

MĨTANGĨKO. Andũ aingĩ ethĩ arĩa maneingĩria ngomanio-inĩ moigaga atĩ nĩ meriraga.
KWAGA KWĨHOKANA. Thutha wa andũ gũkomania, o ũmwe wao no ambĩrĩrie kwĩyũria ũũ: ‘Hihi nũ ũngĩ manakomania nake?’
GŨKUA NGORO. Airĩtu aingĩ mendete mũndũ ũramagitĩra no ti mũndũ ũramahũthĩra ũũru. Nao anake aingĩ matigucagĩrĩrio nĩ mũirĩtu marĩkĩtie gũkomania nake.
Ũrĩa kũrĩ: Ũngĩĩingĩria ngomanio-inĩ mbere ya kĩhiko, nĩ wĩyagagĩra gĩtĩo. (Aroma 1:24) Mwĩrĩ waku nĩ wa goro mũno na ndũbatiĩ kũwagĩra gĩtĩo.

Onania ũrĩ na ũhoti wa ‘gwĩthema ngomanio itagĩrĩire.’ (1 Athesalonike 4:3) Na rĩrĩa ũkaingĩra kĩhiko-inĩ nĩ ũgakenera ngomanio. Hĩndĩ ĩyo ndũgacemania na mathĩna marĩa moimanaga na ngomanio mbere ya kĩhiko.—Thimo 7:22, 23; 1 Akorintho 7:3.

ŨGWĨCIRIA ATĨA?

Hihi mũndũ ũkwendete kuuma ngoro no eke ũndũ ũngĩkũingĩria thĩna-inĩ?
Hihi mũndũ ũkũrũmbũyagia biũ no akwĩre wĩke ũndũ ũngĩthũkia ũkuruhanu waku na Ngai?—Ahibirania 13:4.