Hitho Ĩrĩa Tũkenagĩra Kũmenya

Hihi nĩ ũrĩ werũo kaũndũ nĩ mũndũ atarĩ era andũ angĩ?​—a Angĩkorũo nĩ ũrĩ werũo, kaũndũ kau getagwo hitho tondũ andũ angĩ matikoĩ. Bibilia nĩ yaragia ũhoro wa “hitho” ya mwanya kuuma kũrĩ Ngai. Ĩtagwo hitho tondũ andũ matiamĩmenyete. Nginya araika nĩ meendaga kũmĩmenya. Hihi wee no wende kũmenya hitho ĩyo?​—

Tene tene mũno-rĩ, Ngai nĩ ombire mũthuri na mũtumia wa mbere. Meetagwo Adamu na Hawa. Ngai akĩmahe mũciĩ mũthaka wetagwo mũgũnda wa Edeni. Adamu na Hawa mangĩathĩkĩire Ngai, o hamwe na ciana ciao nĩ mangĩathondekire thĩ yothe ĩtuĩke paradiso ta mũgũnda ũcio. Na nĩ mangĩatũũrire thĩinĩ wa Paradiso tene na tene. No hihi nĩ ũraririkana ũrĩa Adamu na Hawa meekire?​—

Adamu na Hawa matiathĩkĩire Ngai, na nĩkĩo tũtatũũraga thĩinĩ wa paradiso ũmũthĩ. No Ngai oigire atĩ nĩ agaathondeka thĩ ĩthakare na andũ othe matũũre tene na tene marĩ na gĩkeno. Ageka ũguo atĩa? Kwa ihinda iraya, andũ matiamenyaga tondũ ũndũ ũcio warĩ hitho.

Rĩrĩa Jesu okire gũkũ thĩ, nĩ aarutire andũ ũhoro makĩria wĩgiĩ hitho ĩyo. Oigire atĩ hitho ĩyo ĩgiĩ Ũthamaki wa Ngai. Nĩkĩo eerire andũ mahoyage Ũthamaki ũcio ũũke. Ũthamaki ũcio nĩguo ũgaathondeka thĩ ĩtuĩke paradiso thaka.

Hihi nĩ wakena nĩ kũmenya hitho ĩyo?​—Ririkana atĩ no andũ arĩa mathĩkagĩra Jehova magaatũũra thĩinĩ wa Paradiso. Bibilia nĩ ĩtwĩraga ũhoro wa athuri na atumia aingĩ arĩa maathĩkĩire Jehova. No wende kwĩruta ũhoro wao?​—Ta reke tũmenye amwe ao na tuone ũrĩa tũngĩtuĩka tao.