GĨCUNJĨ GĨA 12
Ũngĩka Atĩa Nĩguo Ũtuĩke Mũrata wa Ngai?
1, 2. Nĩ andũ arĩkũ amwe maarĩ arata a Jehova?
NĨ MŨNDŨ ũrĩkũ ũngĩenda atuĩke mũrata waku? Kwahoteka nĩ mũndũ ũrĩa ũgũkenagia na nĩ mũhotanaga nake. Mũndũ mũtugi na ũrĩ na ngumo iria wendete.
2 Jehova Ngai nĩ athuuraga andũ amwe matuĩke arata ake. Kwa ngerekano, Iburahimu aarĩ ũmwe wa arata a Jehova. (Isaia 41:8; Jakubu 2:23) Jehova ningĩ nĩ eendete Daudi. Ooigire atĩ Daudi aarĩ ‘mũndũ wĩtĩkĩrĩkĩte ngoro-inĩ yake.’ (Atũmwo 13:22) Nake mũnabii Danieli aarĩ “mũndũ wendetwo mũno” nĩ Jehova.—Danieli 9:23.
3. Iburahimu, Daudi, na Danieli meekire atĩa nĩguo matuĩke arata a Jehova?
3 Iburahimu, Daudi, na Danieli meekire atĩa nĩguo matuĩke arata a Jehova? Jehova eerire Iburahimu ũũ: “Wee nĩ ũthikĩrĩirie mũgambo wakwa.” (Kĩambĩrĩria 22:18) Jehova atuĩkaga mũrata wa andũ arĩa mamwathĩkagĩra menyihĩtie. O na andũ marĩ rũrĩrĩ rũgima no matuĩke arata ake. Jehova eerire rũrĩrĩ rwa Isiraeli ũũ: “Athĩkĩrai mũgambo wakwa, na niĩ nĩ ngũtuĩka Ngai wanyu, na inyuĩ mũtuĩke andũ akwa.” (Jeremia 7:23) Kwoguo o nawe nĩ wagĩrĩirũo gwathĩkĩra Jehova angĩkorũo nĩ ũrenda gũtuĩka mũrata wake.
JEHOVA NĨ AGITAGĨRA ARATA AKE
4, 5. Jehova agitagĩra arata ake atĩa?
4 Bibilia yugaga atĩ Jehova nĩ acaragia njĩra cia kuonania “hinya wake nĩ ũndũ wa arĩa meheanĩte na ngoro yao yothe harĩ we.” (2 Maũndũ ma Matukũ ma Tene 16:9) Thĩinĩ wa Thaburi 32:8, Jehova nĩ erĩire arata ake ũndũ ũyũ: “Nĩ ndĩrĩkũheaga ũtaũku na ngakũruta njĩra ĩrĩa wagĩrĩire kũgera. Ndĩrĩkũheaga ũtaaro riitho rĩakwa rĩkũrorete.”
5 Nĩ harĩ thũ ĩmwe ĩrĩ hinya yendaga gũtũma tũtige gũtuĩka arata a Ngai. No Jehova nĩ endaga gũtũgitĩra. (Thoma Thaburi 55:22.) Tondũ tũrĩ arata ake, tũmũtungatagĩra na ngoro itũ yothe. Tũikaraga tũrĩ ehokeku harĩ we nginya rĩrĩa tũragerera maũndũ maritũ. Tũkoragwo na ũũma o ta ũrĩa warĩ na mwandĩki wa Thaburi. Aandĩkire ũũ ũhoro-inĩ wĩgiĩ Jehova: “Tondũ arĩ guoko-inĩ gwakwa kwa ũrĩo, gũtirĩ hĩndĩ ngenyenyeka.” (Thaburi 16:8; 63:8) Shaitani ageragia atĩa gũtũma tũtige gũtuĩka arata a Jehova?
MAHEENI MA SHAITANI
6. Nĩ maheeni marĩkũ Shaitani aaririe megiĩ andũ?
6 Thĩinĩ wa Gĩcunjĩ gĩa 11 nĩ twerutire atĩ Shaitani nĩ ookĩrĩire Jehova na akiuga atĩ nĩ mũheenania na atĩ ndarĩ kĩhooto tondũ ndaarekete Adamu na Hawa metuagĩre ũndũ ũrĩa mwega na ũndũ ũrĩa mũũru. Thĩinĩ wa Bibilia ibuku-inĩ rĩa Ayubu nĩ twĩrutaga atĩ Shaitani ningĩ no aheenanagia igũrũ rĩgiĩ andũ arĩa mendaga gũtuĩka arata a Ngai. Oigaga atĩ matungatagĩra Ngai nĩ ũndũ wa indo iria amaheaga, no ti ũndũ wa kũmwenda. Shaitani o na nĩ oigaga atĩ no ahote kũgarũra mũndũ o wothe atige gũtungatĩra Ngai. Reke tuone ũndũ ũrĩa tũngĩĩruta kuumana na Ayubu na ũrĩa Jehova aamũgitĩire.
7, 8. (a) Jehova aaiguaga atĩa igũrũ rĩgiĩ Ayubu? (b) Shaitani ooigire atĩa igũrũ rĩgiĩ Ayubu?
7 Ayubu aarĩ ũ? Aarĩ mũndũ mwega watũũraga mĩaka ta 3,600 mĩhĩtũku. Jehova ooigire atĩ hĩndĩ ĩyo gũtirĩ mũndũ ũngĩ wahaanaga take gũkũ thĩ. Ayubu nĩ aatĩĩte Ngai mũno na nĩ aathũire maũndũ marĩa moru. (Ayubu 1:8) Ayubu aarĩ mũrata wa ma wa Jehova.
8 Shaitani ooigire atĩ Ayubu aatungatagĩra Ngai nĩ ũndũ wa mwĩyendo. Eerire Jehova ũũ: “Githĩ ti kũmũirigĩra ũmũirigĩire ũkamũgitĩra hamwe na nyũmba yake na indo ciake ciothe? Nĩ ũrathimĩte wĩra wa moko make, namo mahiũ make makaingĩha mũno bũrũri-inĩ. No nĩguo kũgĩe na ũgarũrũku, tambũrũkia guoko gwaku ũhutie kĩrĩa gĩothe arĩ nakĩo, nake hatarĩ nganja nĩ egũkũruma o ũthiũ-inĩ waku.”—Ayubu 1:10, 11.
9. Jehova aaheire Shaitani rũtha rwa gwĩka atĩa?
9 Shaitani ooigire atĩ Ayubu aatungatagĩra Jehova no ũndũ tu wa indo iria aamũheaga. Ningĩ nĩ ooigire atĩ nĩ angĩahotire gũtũma Ayubu atige gũtungatĩra Jehova. Jehova ndetĩkanirie na Shaitani, no nĩ aamũheire rũtha rwa kũgeria Ayubu nĩguo kuoneke kana aarĩ mũrata wa Jehova nĩ ũndũ wa kũmwenda.
SHAITANI GŨTHARĨKĨRA AYUBU
10. Shaitani aatharĩkĩire Ayubu atĩa, na Ayubu eekire atĩa?
10 Shaitani aambire gũtũma mahiũ mothe ma Ayubu maiywo na marĩa mangĩ moragwo. Agĩcoka akĩũraga ndungata cia Ayubu hakuhĩ ciothe. Ayubu oorirũo nĩ indo ciake ciothe. Tharĩkĩro-inĩ yake ya mũico, Shaitani aahũthĩrire kĩhuhũkanio kũũraga ciana ikũmi cia Ayubu. No Ayubu aaikarire arĩ mwĩhokeku harĩ Jehova. “Maũndũ-inĩ macio mothe, Ayubu ndeehirie o na kana akiuga atĩ Ngai nĩ ekĩte ũndũ o na ũmwe mũũru.”—Ayubu 1:12-19, 22.
Jehova nĩ aarathimire Ayubu nĩ ũndũ wa gũkorũo arĩ mũrata mwĩhokeku
11. (a) Nĩ ũndũ ũrĩkũ ũngĩ Shaitani aareheire Ayubu? (b) Ayubu eekire atĩa?
11 Shaitani ndaatigĩire hau. Eerire Ngai ũũ: “Tambũrũkia guoko gwaku ũhutie mahĩndĩ na nyama cia mwĩrĩ wake, nake hatarĩ nganja nĩ egũkũruma o ũthiũ-inĩ waku.” Nĩ ũndũ ũcio Shaitani akĩrehera Ayubu mũrimũ warĩ na ruo mũno. (Ayubu 2:5, 7) O na hĩndĩ ĩyo Ayubu aaikarire arĩ mwĩhokeku harĩ Jehova. Ooigire ũũ: “O nginya rĩrĩa ngaakua, gũtirĩ hĩndĩ ngaatiganĩria wĩkindĩru wakwa!”—Ayubu 27:5.
12. Ayubu oonanirie atĩa atĩ Shaitani nĩ mũheenania?
12 Ayubu ndaamenyaga maũndũ ma maheeni marĩa Shaitani ooigĩte o na kana kĩrĩa gĩatũmaga athĩnĩke ũguo. Eeciragia atĩ nĩ Jehova wamũrehagĩra mathĩna macio. (Ayubu 6:4; 16:11-14) O na kũrĩ ũguo, Ayubu aaikarire arĩ mwĩhokeku harĩ Jehova. Rĩu hatiarĩ na nganja rĩngĩ. Ayubu ndaatungatagĩra Ngai nĩ ũndũ wa mwĩyendo. Aarĩ mũrata wa Ngai tondũ nĩ aamwendete. Maũndũ marĩa mothe Shaitani ooigĩte maarĩ ma maheeni.
13. Moimĩrĩro ma wĩhokeku wa Ayubu maarĩ marĩkũ?
13 O na gũtuĩka Ayubu ndaamenyaga ũndũ ũrĩa wathiaga na mbere kũrĩa igũrũ, aaikarire arĩ mwĩhokeku harĩ Ngai na akĩonania atĩ Shaitani nĩ mũũru. Jehova nĩ aarathimire Ayubu nĩ ũndũ wa gũkorũo arĩ mũrata mwĩhokeku.—Ayubu 42:12-17.
MAHEENI MA SHAITANI GŨKWEREKERA
14, 15. Nĩ ũndũ ũrĩkũ Shaitani ooigire wĩgiĩ andũ othe?
14 No wĩrute maũndũ ma bata kuumana na ũrĩa gwekĩkire harĩ Ayubu. O na mahinda-inĩ maya Shaitani oigaga atĩ tũtungatagĩra Jehova nĩ ũndũ wa indo iria atũheaga. Shaitani ooigire ũũ thĩinĩ wa Ayubu 2:4: “Mũndũ no aneane kĩrĩa gĩothe arĩ nakĩo nĩguo ahonokie muoyo wake.” Kwoguo Shaitani ndaaragia ũhoro wa Ayubu tu, no ooigaga atĩ andũ othe matungatagĩra Ngai nĩ ũndũ wa mwĩyendo. Mĩaka magana maingĩ thutha wa Ayubu gũkua, Shaitani no aanyũrũragia Jehova na akaria maheeni igũrũ rĩgiĩ ndungata ciake. Kwa ngerekano, tũthomaga ũũ thĩinĩ wa Thimo 27:11: “Mũrũ wakwa, tuĩka mũndũ mũũgĩ, ũkenagie ngoro yakwa, nĩgetha hotage gũcokeria ũrĩa ũnyũrũragia.”
15 No ũthuure gwathĩkagĩra Jehova na gũkorũo ũrĩ mũrata wake mwĩhokeku, na njĩra ĩyo wonanie atĩ Shaitani nĩ mũheenania. O na angĩkorũo nĩ ũkũbatara gwĩka mogarũrũku manene nĩguo ũtuĩke mũrata wa Ngai, rĩu nĩrĩo itua rĩrĩa rĩega biũ ũngĩtua ũtũũro-inĩ waku! Nĩ ũrabatara kuoya itua rĩu na ũritũ. Shaitani oigaga atĩ wagĩa na mathĩna nĩ ũgũtiga gũkorũo ũrĩ mwĩhokeku harĩ Ngai. Ageragia gũtũhĩtithia nĩguo tũtige gũkorũo tũrĩ ehokeku harĩ Ngai. Ekaga ũguo atĩa?
16. (a) Nĩ njĩra irĩkũ Shaitani ahũthagĩra akĩgeria gũtũma andũ matige gũtungatĩra Jehova? (b) Nĩ njĩra ĩrĩkũ Mũcukani angĩhũthĩra nĩguo atũme ũtige gũtungatĩra Jehova?
16 Shaitani ahũthagĩra njĩra nyingĩ itiganĩte akĩgeria gũtũma tũtige gũtuĩka arata a Ngai. Atharĩkagĩra “ta mũrũthi ũrararama, agĩetha mũndũ wa gũtambura.” (1 Petero 5:8) Ndũkanamake wona arata, andũ a famĩlĩ, o na kana andũ angĩ makĩgeria gũkũgiria wĩrute Bibilia na gwĩka ũrĩa kwagĩrĩire. Ũndũ ũcio wahota gũtũma ũigue ta ũratharĩkĩrũo.a (Johana 15:19, 20) Shaitani ningĩ nĩ aikaraga “agĩĩtuaga mũraika wa ũtheri.” Kwoguo no agerie gũtũhĩtithia nĩguo tũtigathĩkĩre Jehova. (2 Akorintho 11:14) Njĩra ĩngĩ Shaitani ahũthagĩra nĩguo agerie kana nĩ tũgũtiga gũtungatĩra Jehova nĩ gũtũma twĩyone ta tũtagĩrĩire gũtuĩka ndungata cia Ngai.—Thimo 24:10.
ATHĨKAGĨRA MAATHANI MA JEHOVA
17. Twathĩkagĩra Jehova nĩkĩ?
17 Rĩrĩa twathĩkĩra Jehova, tuonanagia atĩ Shaitani nĩ mũheenania. Nĩ kĩĩ kĩrĩtũteithagia gwathĩka? Bibilia yugaga ũũ: “No mũhaka wende Jehova Ngai waku na ngoro yaku yothe na muoyo waku wothe na hinya waku wothe.” (Gũcokerithia Maathani 6:5) Twathĩkagĩra Jehova tondũ nĩ tũmwendete. O ũrĩa wendo witũ harĩ Jehova ũrĩthiaga wongererekete, noguo tũrĩendaga gwĩka ũrĩa wothe arĩtwĩraga twĩke. Mũtũmwo Johana aandĩkire ũũ: “Kwenda Ngai nĩ atĩrĩ, tũrũmagĩrĩre maathani make; na maathani make ti mũrigo.”—1 Johana 5:3.
18, 19. (a) Nĩ maũndũ ta marĩkũ Jehova oigaga nĩ moru? (b) Tũmenyaga atĩa atĩ Jehova ndatwĩraga twĩke ũndũ tũtangĩhota gwĩka?
18 No nĩ maũndũ ta marĩkũ Jehova atwĩraga nĩ moru? Mamwe nĩ magwetetwo thĩinĩ wa ithandũkũ rĩrĩ na kĩongo “Thũũra Maũndũ Marĩa Jehova Athũire.” Kĩambĩrĩria-inĩ, wahota gwĩciria atĩ maũndũ mamwe harĩ macio ti moru mũno. No wathoma maandĩko marĩa monanĩtio ho na wĩcũranie ũhoro wamo, nĩ ũkuona bata wa gwathĩkĩra mawatho ma Jehova. Ningĩ wahota kuona atĩ harĩ mogarũrũku ũrabatara gwĩka ũtũũro-inĩ waku. O na gũtuĩka rĩmwe ũndũ ũcio no ũkorũo ũtarĩ mũhũthũ, weka mogarũrũku macio ũrĩkoragwo na thayũ na gĩkeno kĩrĩa kiumanaga na gũtuĩka mũrata mwĩhokeku wa Ngai. (Isaia 48:17, 18) Tũmenyaga atĩa atĩ mũndũ no ahote gwĩka mogarũrũku macio?
19 Gũtirĩ hĩndĩ Jehova atwĩraga twĩke ũndũ tũtangĩhota gwĩka. (Gũcokerithia Maathani 30:11-14) Tondũ we nĩ Mũrata wa ma, nĩ atũĩ gũkĩra ũrĩa twĩyũĩ. Nĩ oĩ ũhoti witũ o na kũrĩa tũnyihĩirũo. (Thaburi 103:14) Mũtũmwo Paulo atwĩraga ciugo ici cia gũtwĩkĩra ngoro: “Ngai nĩ mwĩhokeku, na ndangĩreka mũgerio gũkĩra ũrĩa mũngĩhota gwĩtiiria, no hĩndĩ ya igerio nĩ arĩmũheaga njĩra ya kuumĩrĩra nĩguo mũkahota kũrĩkirĩrĩria.” (1 Akorintho 10:13) No tũkorũo na ma atĩ hĩndĩ ciothe Jehova nĩ arĩtũheaga hinya wa gwĩka ũrĩa kwagĩrĩire. Nĩ arĩkũheaga “hinya ũrĩa ũkĩrĩte wa ndũire” nĩguo ũhote gũkirĩrĩria maũndũ maritũ. (2 Akorintho 4:7) Thutha wa gũteithio nĩ Jehova maũndũ-inĩ maritũ, Paulo ooigire ũũ: “Maũndũ-inĩ mothe nĩ ngoragwo na hinya kũgerera ũrĩa ũũheaga hinya.”—Afilipi 4:13.
WĨRUTE KWENDA MAŨNDŨ MARĨA NGAI ENDETE
20. Nĩ ngumo irĩkũ wagĩrĩirũo kwĩgerekania nacio, na nĩkĩ?
20 Angĩkorũo nĩ tũkwenda gũtuĩka arata a Jehova, no mũhaka tũtige gwĩka maũndũ marĩa oigĩte nĩ moru na twĩrutanĩrie gwĩka makĩria ma ũguo. (Aroma 12:9) Arata a Ngai nĩ mendete maũndũ marĩa endete. Arata acio mataarĩirio thĩinĩ wa Thaburi 15:1-5. (Thoma.) Arata a Jehova nĩ megerekanagia na ngumo ciake na makonania “wendo, gĩkeno, thayũ, wetereri, ũtugi, wega, wĩtĩkio, ũhooreri, na kwĩgirĩrĩria.”—Agalatia 5:22, 23.
21. Ũngĩka atĩa nĩguo ũhote kuonania ngumo iria Ngai endete?
21 Ũngĩhota atĩa kuonania ngumo icio? Ũrabatara kwĩruta maũndũ marĩa Jehova endete na njĩra ya gũthomaga Bibilia kaingĩ. (Isaia 30:20, 21) Wathiĩ na mbere gwĩka ũguo, wendo waku harĩ Jehova nĩ ũgũkũra, na o ũrĩa wendo waku ũrĩkũraga noguo ũrĩendaga kũmwathĩkĩra.
22. Moimĩrĩro ma gwathĩkĩra Jehova nĩ marĩkũ?
22 Gwĩka mogarũrũku ũtũũro-inĩ no kũringithanio na kwaũra nguo ngũrũ ũgekĩra ĩngĩ njerũ. Bibilia yugaga atĩ ũrabatara ‘kwĩyaũra ũmũndũ ũrĩa wa tene,’ wĩhumbe “ũmũndũ mwerũ.” (Akolosai 3:9, 10) O na gũtuĩka ũndũ ũcio no ũkorũo ũtarĩ mũhũthũ, rĩrĩa tweka ũguo na twathĩkĩra Jehova, atwĩraga atĩ nĩ egũtũhe “kĩrathimo kĩnene.” (Thaburi 19:11) Thuura gwathĩkĩra Jehova nĩguo wonanie atĩ Shaitani nĩ mũheenania. Tungatĩra Jehova nĩ ũndũ wa kũmwenda no ti ũndũ wa irathimo iria atũigĩire. Weka ũguo nĩ ũgũtuĩka mũrata wa ma wa Ngai!
a Ũguo ti kuuga atĩ Shaitani nĩwe ũtongoragia andũ arĩa mageragia gũtũma ũtige kwĩruta Bibilia. No Shaitani nĩwe “ngai wa mũtabarĩre ũyũ wa maũndũ” na “thĩ yothe ĩkoragwo rungu rwa hinya [wake].” Kwoguo tũtiagĩrĩirũo kũmaka rĩrĩa andũ amwe marageria gũtũma tũtige gũtungatĩra Jehova.—2 Akorintho 4:4; 1 Johana 5:19.