Thabina ya Nuhu

Thutha wa ihinda, nĩ kwagĩire andũ aingĩ mũno thĩinĩ wa thĩ. Aingĩ ao maarĩ oru. O na araika amwe nĩ maatuĩkire ciũmbe njũru. Mooimire igũrũ kũrĩa maatũũraga magĩũka gũkũ thĩ. Nĩ ũĩ nĩ kĩĩ gĩatũmire meke ũguo? Meekire ũguo nĩguo megarũre matuĩke andũ na mahikanie.

Araika acio nĩ maagĩire ciana na atumia arĩa maahikirie. Ciana iria maaciarire ciarĩ na hinya mũno na cianeneha nĩ ciambĩrĩirie gwĩkaga andũ arĩa angĩ maũndũ moru nginya kũmahũũra. Jehova ndangĩetĩkĩririe maũndũ macio mathiĩ na mbere. Kwoguo agĩtua itua rĩa kũniina andũ acio oru na mũiyũro wa maĩ.

No nĩ kwarĩ na mũndũ ũmwe warĩ ngũrani. Eetagwo Nuhu, na nĩ eendete Jehova mũno. Aarĩ na mũtumia na ciana ithatũ, nĩcio Shemu, Hamu, na Jafethu na ciothe ciarĩ na atumia. Jehova eerire Nuhu ake thabina nene nĩguo ahonokie famĩlĩ yake ndĩkaniinwo nĩ Mũiyũro. Thabina nĩ gĩthandũkũ kĩnene kĩngĩrera maĩ-inĩ. Ningĩ Jehova nĩ eerire Nuhu aingĩrie nyamũ thĩinĩ wa thabina nĩguo o nacio itikaniinwo.

Nuhu aambĩrĩirie gwaka thabina ĩyo o hĩndĩ ĩyo. Maamĩakire na famĩlĩ yake kwa ihinda ta rĩa mĩaka 50 ũguo. Maakire thabina ĩyo o ta ũrĩa Jehova aameerĩte. Hĩndĩ ĩyo, Nuhu nĩ aaheaga andũ mũkaana wĩgiĩ Mũiyũro, no gũtirĩ mũndũ wamũthikagĩrĩria.

Thutha ũcio, ihinda rĩa kũingĩra thabina nĩ rĩakinyire. Reke tuone ũrĩa gwacokire gũgĩthiĩ.