Cioneki cia Johana

Rĩrĩa mũtũmwo Johana oohetwo gĩcigĩrĩra-inĩ gĩa Patimosi, Jesu nĩ aamuonirie cioneki kana mbica 16 ciĩgiĩ ihinda rĩũkĩte irũmanĩrĩire. Cioneki icio cioonanagia ũrĩa rĩĩtwa rĩa Jehova rĩgaatherio, ũrĩa Ũthamaki wake ũgooka, na ũrĩa wendi wake ũgeekwo gũkũ thĩ o ta ũrĩa wĩkagwo kũrĩa igũrũ.

Thĩinĩ wa kĩoneki kĩmwe, Johana nĩ oonire Jehova arĩ gĩtĩ-inĩ gĩake kĩa ũnene kũrĩa igũrũ, athiũrũrũkĩirio nĩ athuri 24 mehumbĩte nguo cia rangi mwerũ na magekĩra thũmbĩ cia thahabu mĩtwe. Kwarĩ na heni na mĩgambo ya marurumĩ yaumaga gĩtĩ-inĩ kĩu. Athuri acio 24 meegũithagia mbere ya Jehova na makamũthathaiya. Thĩinĩ wa kĩoneki kĩngĩ, Johana nĩ oonire andũ kĩrĩndĩ kĩnene maumĩte thĩinĩ wa ndũrĩrĩ ciothe, ikundi cia andũ, na thiomi ciothe magĩthathaiya Jehova. Jesu arĩ Gatũrũme, aamarĩithagia na akamatwara maĩ-inĩ ma muoyo. Thutha ũcio, Johana oonire Jesu thĩinĩ wa kĩoneki kĩngĩ akĩambĩrĩria gwathana kũrĩa igũrũ arĩ hamwe na athuri arĩa 24. Kĩoneki-inĩ kĩrĩa kĩarũmĩrĩire, Johana oonirio Jesu akĩrũa na ndamathia na ndaimono ciayo, na ndamathia ĩyo nĩ Shaitani. Jesu aamaingatire kũrĩa igũrũ, akĩmaharũrũkia gũkũ thĩ.

Johana aacokire akĩona mbica thaka ya Gatũrũme na andũ 144,000 marũgamĩte Kĩrĩma-inĩ gĩa Zayuni. Ningĩ nĩ oonire mũraika akĩũmbũka igũrũ rĩa thĩ akĩraga andũ metigĩre Ngai na mamũgooce.

Kĩoneki-inĩ kĩrĩa kĩarũmĩrĩire, Johana oonire mbaara ya Hari–Magedoni ĩkĩrũo. Hĩndĩ ya mbaara ĩyo, Jesu na thigari ciake nĩ maahootire Shaitani. Kĩoneki-inĩ kĩa mũthia, Johana oonire maũndũ gũkũ thĩ magĩkĩka o ta kũrĩa igũrũ. Shaitani na njiarũa ciake makĩniinwo biũ, na kuuma hau, ciũmbe ciothe kũrĩa igũrũ na gũkũ thĩ cioonaga rĩĩtwa rĩa Jehova rĩrĩ itheru na ikamũthathaiya o we wiki.