Ũthamaki wa Ngai Nĩ Kĩĩ?

1. Tũkwarĩrĩria ihoya rĩrĩkũ rĩũĩkaine mũno?

ANDŨ milioni nyingĩ nĩ moĩ ihoya rĩrĩa rĩtagwo Ihoya rĩa Mwathani kana rĩa Ithe Witũ. Jesu aahũthĩrire ihoya rĩu kuonereria arutwo ake ũrĩa magĩrĩirũo kũhoya. Nĩ maũndũ marĩkũ aagwetire? Na nĩkĩ ihoya rĩu nĩ rĩa bata harĩ ithuĩ ũmũthĩ?

2. Nĩ maũndũ marĩkũ matatũ ma bata Jesu aatũrutire tũhoyage?

² Jesu ooigire ũũ: “Nĩ ũndũ ũcio, hoyagai na njĩra ĩno: ‘Ithe witũ ũrĩ igũrũ, rĩĩtwa rĩaku nĩ rĩtherio [kana, rĩamũrũo]. Ũthamaki waku nĩ ũũke. Wendi waku nĩ wĩkwo gũkũ thĩ o ta kũu igũrũ.’” (Thoma Mathayo 6:9-13.) Jesu aatũrutire tũhoyage maũndũ macio matatũ nĩkĩ?—Rora Kohoro ka 20 Mũico-inĩ wa Ibuku.

3. Nĩ maũndũ marĩkũ tũrabatara kũmenya megiĩ Ũthamaki wa Ngai?

³ Nĩ twĩrutĩte atĩ rĩĩtwa rĩa Ngai nĩ Jehova. Ningĩ nĩ twĩrutĩte wendi wa Ngai harĩ andũ na harĩ thĩ. No hihi Jesu eendaga kuuga atĩa rĩrĩa ooigire: “Ũthamaki waku nĩ ũũke”? Nĩ tũkwĩruta Ũthamaki wa Ngai nĩ kĩĩ, maũndũ marĩa ũgeeka, na ũrĩa ũgaatheria rĩĩtwa rĩa Ngai.

ŨTHAMAKI WA NGAI NĨ KĨĨ?

4. Ũthamaki wa Ngai nĩ kĩĩ, na nũũ Mũthamaki waguo?

⁴ Jehova nĩ aathondekire thirikari kũrĩa igũrũ na agĩthuura Jesu atuĩke Mũthamaki wayo. Bibilia ĩtaga thirikari ĩyo Ũthamaki wa Ngai. Jesu nĩwe “Mũthamaki wa arĩa mathanaga marĩ athamaki na Mwathani wa arĩa mathanaga marĩ athani.” (1 Timotheo 6:15) Jesu no ahote gwĩka maũndũ maingĩ mega gũkĩra mũthamaki o wothe thĩinĩ wa thĩ, na nĩ arĩ hinya mũingĩ gũkĩra athamaki othe a thĩ maturanĩirũo hamwe.

5. Thirikari ya Ngai yathanaga kuuma kũ? Na ĩgaathamaka kũ?

⁵ Jesu aacokire igũrũ thikũ 40 thutha wa kũriũkio. Thutha wa ihinda, Jehova akĩmũtua Mũthamaki wa Ũthamaki ũcio. (Atũmwo 2:33) Thirikari ya Ngai ĩgaathamaka gũkũ thĩ ĩrĩ igũrũ. (Kũguũrĩrio 11:15) Nĩkĩo Bibilia ĩtaga Ũthamaki wa Ngai “Ũthamaki . . . wa igũrũ.”—2 Timotheo 4:18.

6, 7. Nĩ kĩĩ gĩtũmaga Jesu akorũo arĩ mwega gũkĩra mũthamaki o wothe wa gũkũ thĩ?

⁶ Bibilia yugaga atĩ Jesu nĩ mũnene gũkĩra mũthamaki o wothe wa gũkũ thĩ tondũ we nowe “ũrĩa wiki ũtangĩkua.” (1 Timotheo 6:16) Atongoria othe thĩinĩ wa thĩ nĩ makuaga, no Jesu ndarĩ hĩndĩ agaakua. Maũndũ mothe mega marĩa Jesu agaatwĩkĩra magaatũũra tene na tene.

⁷ Bibilia nĩ ĩrathĩte atĩ Jesu agaakorũo arĩ Mũthamaki ũrĩ tha na kĩhooto. Yugaga ũũ: “Roho wa Jehova nĩ ũgaaikara igũrũ rĩake, roho wa ũũgĩ na wa ũtaũku, roho wa ũtaarani na wa ũhoti, roho wa ũmenyo na wa gwĩtigĩra Jehova. Na nĩ agaakenagĩra gwĩtigĩra Jehova. Ndagaatuanĩra ciira kũgerera maũndũ marĩa arona na maitho make, kana arũnge andũ kũringana na maũndũ marĩa matũ make maigua. Agaatuĩra andũ arĩa matarĩ hinya [kana, athĩni] na njĩra ya kĩhooto.” (Isaia 11:2-4) No wende gũtongorio nĩ mũthamaki ta ũcio?

8. Tũmenyaga atĩa atĩ Jesu ndagaathana arĩ wiki?

⁸ Ngai nĩ athuurĩte andũ amwe nĩguo magaathana hamwe na Jesu thirikari-inĩ ya igũrũ. Kwa ngerekano, mũtũmwo Paulo eerire Timotheo ũũ: “Tũngĩthiĩ na mbere gũkirĩrĩria, ningĩ nĩ tũgaathana hamwe nake tũrĩ athamaki.” (2 Timotheo 2:12) Nĩ andũ aigana magaathamaka hamwe na Jesu?

9. Nĩ andũ aigana magaathana hamwe na Jesu? Ngai aambĩrĩirie kũmathuura rĩ?

⁹ O ta ũrĩa twerutire thĩinĩ wa Gĩcunjĩ kĩa 7, mũtũmwo Johana nĩ oonirio kĩoneki na akĩona Jesu arĩ Mũthamaki kũrĩa igũrũ marĩ hamwe na athamaki angĩ 144,000. Acio 144,000 nĩa? Johana oigĩte atĩ “mandĩkĩtwo rĩĩtwa rĩake [Jesu] na rĩĩtwa rĩa Ithe mathiithi-inĩ mao.” Agacoka akoiga ũũ: “Acio nĩ arĩa marũmagĩrĩra Gatũrũme [Jesu] o kũrĩa guothe athiaga. Maagũrirũo kuuma harĩ andũ.” (Thoma Kũguũrĩrio 14:1, 4.) Andũ acio 144,000 nĩ Akristiano ehokeku arĩa mathuurĩtwo nĩ Ngai nĩguo ‘magaathana marĩ athamaki igũrũ rĩa thĩ’ hamwe na Jesu. Rĩrĩa makua mariũkagio magathiĩ igũrũ. (Kũguũrĩrio 5:10) Kuuma o hĩndĩ ya atũmwo, Jehova akoretwo agĩthuura Akristiano ehokeku nĩguo mahinge athamaki 144,000.

10. Nĩkĩ no tuuge Jehova nĩ wendo atuonetie nĩ ũndũ wa gũthuura Jesu na arĩa 144,000 matuĩke athamaki?

¹⁰ Jehova nĩ atwĩciragia mũno ũũ atĩ nĩ abangĩte andũ amwe magaathamaka hamwe na Jesu. Jesu agaakorũo arĩ mũthamaki mwega tondũ nĩ atũĩ wega. Nĩ aathĩnĩkire na nĩ oĩ maũndũ marĩa andũ mahĩtũkagĩra. Paulo ooigire atĩ Jesu nĩ atwĩciragia tondũ no ahote “gũtũiguĩra tha maũndũ-inĩ marĩa twagĩte hinya,” na “nĩ ageretio maũndũ-inĩ mothe o ta ithuĩ.” (Ahibirania 4:15; 5:8) O na arĩa 144,000 nĩ moĩ maũndũ marĩa andũ mahĩtũkagĩra. Manahiũrania na mĩrimũ na mathĩna ma kwaga gũkinyanĩra. Kwoguo no tũkorũo na ma atĩ Jesu na arĩa 144,000 nĩ magaataũkĩrũo nĩ ũrĩa tũiguaga o hamwe na mathĩna maitũ.

ŨTHAMAKI WA NGAI ŨGEEKA ATĨA?

11. Hihi nĩ kũrĩ hĩndĩ wendi wa Ngai ũteekagwo kũrĩa igũrũ?

¹¹ Nĩ kĩĩ gĩatũmire Jesu arute arutwo ake mahoyage wendi wa Ngai wĩkwo gũkũ thĩ o ta ũrĩa wĩkagwo igũrũ? Nĩ twerutire thĩinĩ wa Gĩcunjĩ gĩa 3 atĩ Shaitani ũrĩa Mũcukani nĩ aaremeire Jehova. Thutha wa Shaitani kũrema, Jehova nĩ aamwĩtĩkĩririe hamwe na araika arĩa mataarĩ ehokeku, kana ndaimono, maikare kũu igũrũ kwa ihinda. Kwoguo ti ciũmbe ciothe iria ciarĩ igũrũ hĩndĩ ĩyo ciathĩkagĩra Ngai. Thĩinĩ wa Gĩcunjĩ gĩa 10 nĩ tũkeeruta ũhoro makĩria wĩgiĩ Shaitani na ndaimono.

12. Nĩ maũndũ marĩkũ merĩ ma bata mataarĩirio thĩinĩ wa Kũguũrĩrio 12:10?

¹² Bibilia ĩtaaragĩria atĩ ihinda inini thutha wa Jesu gũtuwo Mũthamaki wa Ũthamaki wa Ngai, nĩ angĩarũire mbaara na Shaitani. (Thoma Kũguũrĩrio 12:7-10.) Mũhari wa 10 ũtaaragĩria maũndũ merĩ ma bata. Ũthamaki wa Ngai kwambĩrĩria gwathana Jesu Kristo arĩ Mũthamaki waguo, na Shaitani kũharũrũkio gũkũ thĩ. O ta ũrĩa tũkwĩruta, maũndũ macio nĩ marĩkĩtie gwĩkĩka.

13. Nĩ ũndũ ũrĩkũ wekĩkire igũrũ rĩrĩa Shaitani aaingatirũo kuo?

¹³ Bibilia nĩ ĩtaaragĩria gĩkeno kĩrĩa araika arĩa ehokeku maagĩire nakĩo thutha wa Shaitani na ndaimono ciake kũingatwo igũrũ. Yugaga ũũ: “Kenai igũrũ rĩrĩ o na inyuĩ mũikaraga kuo!” (Kũguũrĩrio 12:12) Rĩu kũrĩ na ũrũmwe na thayũ mũingĩ kũrĩa igũrũ tondũ arĩa othe marĩ kuo nĩ mareka wendi wa Ngai.

14. Thĩ ĩkoretwo ĩhaana atĩa nĩ ũndũ wa Shaitani kũharũrũkio kuo?

¹⁴ No ũtũũro gũkũ thĩ nĩ ngũrani mũno na kũrĩa igũrũ. Maũndũ moru mũno nĩ makoraga andũ “tondũ Mũcukani nĩ aharũrũkĩte” na arĩ na “marakara manene, akĩmenyaga atĩ arĩ na ihinda inini.” (Kũguũrĩrio 12:12) Shaitani arĩ na marũrũ manene nĩ ũndũ wa kũingatwo igũrũ, na nĩ oĩ atĩ ica ikuhĩ nĩ egũka kũniinwo. Ekaga ũrĩa wothe angĩhota nĩguo andũ thĩinĩ wa thĩ yothe makorũo na ruo na mathĩna.

15. Wendi wa Ngai harĩ thĩ nĩ ũrĩkũ?

¹⁵ No Ngai ndarĩ acenjia wendi wake harĩ thĩ. O na rĩu no endaga andũ magaatũũra tene na tene thĩinĩ wa paradiso gũkũ thĩ marĩ akinyanĩru. (Thaburi 37:29) No Ũthamaki wa Ngai ũkaahota atĩa gũtũma ũndũ ũcio ũhinge?

16, 17. Tũreruta atĩa kuumana na rĩandĩko rĩa Danieli 2:44 igũrũ rĩgiĩ Ũthamaki wa Ngai?

¹⁶ Ũrathi ũrĩa ũrĩ thĩinĩ wa Danieli 2:44 uugaga ũũ: “Matukũ-inĩ ma athamaki acio, Ngai wa igũrũ nĩ akaahanda ũthamaki ũrĩa gũtarĩ hĩndĩ ũkaanangwo. Na ũthamaki ũcio ndũkaaneanwo kũrĩ andũ angĩ. Nĩ ũkaamemenda na ũniine mothamaki macio mothe, na noguo wiki ũgaatũũra wĩhandĩte tene na tene.” Twĩrutaga atĩa kuumana na ũrathi ũcio igũrũ rĩgiĩ Ũthamaki wa Ngai?

¹⁷ Ũndũ wa mbere tũreruta nĩ atĩ Ũthamaki wa Ngai warĩ wambĩrĩrie gwathana “matukũ-inĩ ma athamaki acio.” Ũguo nĩ kuuga nĩ kũngĩakorirũo na thirikari ingĩ irathana rĩrĩa Ũthamaki ũcio ũngĩambĩrĩirie gũthamaka. Ũndũ wa kerĩ nĩ atĩ, Ũthamaki wa Ngai ũngĩgathamaka tene na tene na gũtirĩ thirikari ĩngĩgacoka ithenya rĩaguo. Na ũndũ wa gatatũ ũrĩa tũreruta nĩ atĩ nĩ kũngĩgakorũo na mbaara gatagatĩ ka Ũthamaki wa Ngai na thirikari cia gũkũ thĩ. Ũthamaki wa Ngai nĩguo ũngĩkaahootana na ũkorũo noguo tu ũrathana thĩinĩ wa thĩ yothe. Macũngĩrĩro-inĩ, andũ nĩ magaakorũo na thirikari ĩrĩa njega biũ ĩtarĩ yoneka.

18. Mbaara ya mũico ĩrĩa ĩkaarũo nĩ thirikari cia gũkũ thĩ na Ũthamaki wa Ngai ĩtagwo atĩa?

¹⁸ Gũgaathiĩ atĩa nĩguo Ũthamaki wa Ngai woe wathani thĩinĩ wa thĩ? Mbaara ya mũico ĩrĩa ĩtagwo Hari-Magedoni ĩtanatuthũka, ndaimono nĩ ikaahĩtithia “athamaki a thĩ yothe ĩrĩa ĩikaragwo nĩguo imacokanĩrĩrie nĩ ũndũ wa mbaara ya mũthenya ũrĩa mũnene wa Ngai Mwene-Hinya-Wothe.” Hatarĩ nganja, thirikari cia thĩ nĩ ikaarũa na Ũthamaki wa Ngai.—Kũguũrĩrio 16:14, 16; rora Kohoro ga 10 Mũico-inĩ wa Ibuku.

19, 20. Tũrabatara Ũthamaki wa Ngai gũkũ thĩ nĩkĩ?

¹⁹ Tũrabatara Ũthamaki wa Ngai nĩkĩ? Harĩ na itũmi ta ithatũ ũguo. Kĩa mbere nĩ atĩ tũrĩ ehia na kwoguo nĩ tũrwaraga na tũgakua. No Bibilia yugaga atĩ Ũthamaki wa Ngai woka, tũgaatũũra tene na tene. Rĩandĩko rĩa Johana 3:16 riugaga ũũ: “Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.”

²⁰ Gĩtũmi gĩa kerĩ nĩ atĩ tũkoragwo tũthiũrũrũkĩirio nĩ andũ aganu. Andũ aingĩ nĩ maheenanagia na matirĩ mĩtugo mĩega. Tũtingĩhota kũmeheria, no Ngai nĩ akaameheria. Andũ arĩa mekaga maũndũ moru na matiendaga kũgarũrũka, Ngai nĩ akaamaniina hĩndĩ ya mbaara ya Hari-Magedoni. (Thoma Thaburi 37:10.) Gĩtũmi gĩa gatatũ kĩrĩa gĩtũmaga tũbatare Ũthamaki wa Ngai nĩ tondũ thirikari cia andũ ikoretwo itarĩ na hinya, itarĩ na tha, kana igakorũo na ungumania. Itikoragwo ciĩhaarĩirie gũteithia andũ maathĩkĩre Ngai. Bibilia yugaga atĩ “mũndũ akoretwo agĩatha mũndũ agatũmaga one o maũndũ moru.”—Kohelethu 8:9.

21. Ũthamaki wa Ngai ũgaatũma wendi wa Ngai wĩkwo gũkũ thĩ atĩa?

²¹ Thutha wa mbaara ya Hari-Magedoni, Ũthamaki wa Ngai nĩ ũgaatũma wendi wa Ngai wĩkwo gũkũ thĩ. Kwa ngerekano, nĩ ũkeeheria Shaitani na ndaimono ciake. (Kũguũrĩrio 20:1-3) Macũngĩrĩro-inĩ, gũtirĩ mũndũ ũkaarwaraga kana agakua. Nĩ ũndũ wa igongona rĩa ũkũũri, andũ othe ehokeku nĩ magaatũũra tene na tene thĩinĩ wa Paradiso. (Kũguũrĩrio 22:1-3) Ningĩ Ũthamaki ũcio nĩ ũgaatheria rĩĩtwa rĩa Ngai. No gũtherio kwa rĩĩtwa rĩa Ngai nĩ kuuga atĩa? Nĩ kuuga atĩ rĩrĩa thirikari ya Ngai ĩkaambĩrĩria gwathana gũkũ thĩ, andũ othe nĩ magaakorũo magĩtĩa rĩĩtwa rĩa Jehova.—Rora Kohoro ka 21 Mũico-inĩ wa Ibuku.

JESU AATUĨKIRE MŨTHAMAKI RĨ?

22. Tũmenyaga atĩa atĩ Jesu ndaatuĩkire Mũthamaki rĩrĩa aarĩ gũkũ thĩ kana acoka igũrũ o ũguo?

²² Jesu aarutire arutwo ake mahoyage ũũ: “Ũthamaki waku nĩ ũũke.” Kwoguo Ũthamaki wa Ngai ndwarĩ kuo hĩndĩ ĩyo. Jehova aabataraga kwamba kũhanda Ũthamaki wake na atue Jesu Mũthamaki waguo. No hihi Jesu aatuirũo Mũthamaki acoka igũrũ o ũguo? Aca, nĩ aabataraga gweterera. Thutha wa Jesu kũriũkio, Petero na Paulo nĩ moonanirie atĩ Jesu nĩ aabataraga gweterera, rĩrĩa maagwetire ũrathi ũmwĩgiĩ ũrĩa ũkoragwo thĩinĩ wa rĩandĩko rĩa Thaburi 110:1. Thĩinĩ wa ũrathi ũcio, Jehova oigĩte ũũ: “Ikara thĩ guoko-inĩ gwakwa kwa ũrĩo nginya rĩrĩa ngaatũma thũ ciaku ituĩke gaturũa ka magũrũ maku.” (Atũmwo 2:32-35; Ahibirania 10:12, 13) No Jesu aabataraga gweterera ihinda rĩigana atĩa mbere ya atuĩtwo Mũthamaki nĩ Jehova?

23. (a) Nĩ rĩ Jesu aambĩrĩirie gwathana arĩ Mũthamaki wa thirikari ya Ngai? (b) Nĩ maũndũ marĩkũ tũkwĩruta thĩinĩ wa gĩcunjĩ kĩrĩa kĩrũmĩrĩire?

²³ Kwa ihinda rĩa mĩaka mĩingĩ mbere ya mwaka wa 1914, gakundi ka Akristiano ehokeku nĩ gaataũkĩirũo atĩ mwaka ũcio ũngĩarĩ wa bata mũno harĩ ũrathi wa Bibilia. Maũndũ marĩa makoretwo kuo thĩinĩ wa thĩ kuuma mwaka wa 1914 nĩ ũira wa atĩ Akristiano acio matiahĩtĩtie. Jesu aambĩrĩirie gwathana mwaka ũcio. (Thaburi 110:2) Kahinda kanini thutha ũcio, Shaitani nĩ aaharũrũkirio gũkũ thĩ na rĩu “arĩ na ihinda inini.” (Kũguũrĩrio 12:12) Gĩcunjĩ-inĩ kĩrĩa kĩrũmĩrĩire nĩ tũkuona maũndũ mangĩ maronania atĩ tũratũũra ihinda-inĩ rĩu. Ningĩ nĩ tũkwĩruta atĩ ica ikuhĩ Ũthamaki wa Ngai nĩ ũgũtigĩrĩra wendi wa Ngai nĩ wekwo gũkũ thĩ.—Rora Kohoro ka 22 Mũico-inĩ wa Ibuku.