Airĩtu a Nyina Ũmwe Arĩa Maarĩ Maraya

Ezekieli mũrango wa 23 ĩrĩ na ituĩro iritũ harĩ andũ a Ngai nĩ ũndũ wa kwaga kwĩhokeka kwao. Mũrango ũcio nĩ ũhaanaine na mũrango wa 16 na njĩra nyingĩ. O ta ndũmĩrĩri ĩrĩa ĩrĩ mũrango-inĩ ũcio, mũrango wa 23 ũhũthĩrĩte ngerekano ya ũmaraya. Jerusalemu yonanĩtio ĩrĩ mũirĩtu ũrĩa mũnini, nayo Samaria mũirĩtu ũrĩa mũkũrũ. Mĩrango ĩyo ĩĩrĩ yonanagia ũrĩa mũirĩtu ũrĩa mũnini aarũmĩrĩire ũrĩa mũkũrũ ũhoro-inĩ wĩgiĩ ũmaraya no agĩka ciĩko nyingĩ cia waganu na cia ngomanio itagĩrĩire o na kũmũkĩra. Thĩinĩ wa mũrango wa 23, Jehova nĩ aaheire airĩtu acio erĩ a nyina ũmwe marĩĩtwa: Ohola nĩwe mũirĩtu ũrĩa mũkũrũ, Samaria, itũũra rĩrĩa inene rĩa ũthamaki wa mĩhĩrĩga ikũmi wa Isiraeli; Oholiba nĩwe mũirĩtu ũrĩa mũnini, Jerusalemu, itũũra rĩrĩa inene rĩa Juda.a—Ezek. 23:1-4.

Nĩ harĩ maũndũ mangĩ mahaanaine megiĩ mĩrango ĩyo ĩĩrĩ. No kũhoteke marĩa ma bata makĩria nĩ maya: Kĩambĩrĩria-inĩ ahũũri maraya acio maarĩ atumia a Jehova magĩcoka makĩaga kwĩhokeka harĩ we. Ningĩ, harĩ na mwĩhoko wĩranĩirũo. Mũrango wa 23 ndũrĩ na ndũmĩrĩri ya ĩmwe kwa ĩmwe ĩgiĩ mwĩhoko wa gũkũũrũo, no nĩ ũhaanaine na mũrango wa 16 harĩa Jehova oigĩte ũũ: “Nĩ ngaatũma mĩtugo yaku ya ũũra-thoni ĩkinye mũthia, hamwe na ũmaraya waku.”—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Hihi Marũgamĩrĩire Ndini Iria Ciĩĩtaga cia Gĩkristiano?

Tene mabuku maitũ moonanagia atĩ airĩtu acio erĩ a nyina ũmwe, Ohola na Oholiba, marũgamĩrĩire ndini iria ciĩĩtaga cia Gĩkristiano iria ihutĩtie kanitha wa Gatoreki, na kanitha cia Gĩprotestanti. O na kũrĩ ũguo, thutha wa gwĩciria na njĩra ndikĩru makĩria na gwĩka ũthuthuria, nĩ harĩ ciũria imwe ciĩyumĩrĩtie. Hihi nĩ kũrĩ hĩndĩ ndini iria ciĩĩtaga cia Gĩkristiano ciatariĩ ta mũtumia wa Jehova na njĩra o yothe? Hihi nĩ kũrĩ hĩndĩ ciarĩ na kĩrĩkanĩro hamwe nake? Aca. Ndini icio o na itiarĩ kuo rĩrĩa Jesu aatuĩkire mũiguithania wa “kĩrĩkanĩro kĩerũ” hamwe na Aisiraeli a kĩĩroho; o na gũtirĩ hĩndĩ irĩ ciakorũo irĩ gĩcunjĩ kĩa rũrĩrĩ rũu rwa kĩĩroho rwa Akristiano aitĩrĩrie maguta. (Jer. 31:31; Luk. 22:20) Cioimĩrire thutha wa atũmwo gũkua. Ciaambĩrĩirie hĩndĩ ya karine ya kana Mahinda Maitũ kuumana na ũregenyũki, irĩ ithondeka rĩũru rĩa Akristiano a maheeni, arĩa maringithanĩtio na “itindiĩ” ũrathi-inĩ wa Jesu wĩgiĩ ngano na itindiĩ.—Mat. 13:24-30.

Ngũrani ĩngĩ nĩ ĩno: Jehova nĩ aaheanire mwĩhoko wa ũkũũri harĩ andũ a Jerusalemu na Samaria arĩa mataarĩ ehokeku. (Ezek. 16:41, 42, 53-55) Hihi Bibilia nĩ ĩheaga ndini iria ciĩĩtaga cia Gĩkristiano mwĩhoko ta ũcio? Aca! Itirĩ kĩĩrĩgĩrĩro o na kĩnini o ta ndini iria ingĩ cia Babuloni Ũrĩa Mũnene.

Kwoguo Ohola na Oholiba matirũgamĩrĩire ndini icio ciĩĩtaga cia Gĩkristiano. O na kũrĩ ũguo, nĩ matũteithagia gũtaũkĩrũo nĩ ũndũ ũngĩ wa bata o na makĩria: ũrĩa Jehova aiguaga igũrũ rĩgiĩ arĩa mathahagia rĩĩtwa rĩake itheru na ithimi ciake cia ũthathaiya mũtheru. Ndini iria ciĩĩtaga cia Gĩkristiano nĩ ikoragwo na mahĩtia manene makĩria ũndũ-inĩ ũcio tondũ ciugaga atĩ irũgamĩrĩire Ngai ũrĩa ũgwetetwo thĩinĩ wa Bibilia. Makĩria ma ũguo, ciugaga atĩ mũtongoria wao nĩ Jesu Kristo, Mũrũ wa Jehova ũrĩa endete. No cionanagia atĩ ũguo tiguo kũrĩ tondũ ciugaga atĩ Jesu nĩ gĩcunjĩ kĩa Ũtatũ na itiathĩkagĩra rĩathani rĩake rĩa gũikara ‘itarĩ cia thĩ ĩno.’ (Joh. 15:19) Ndini icio nĩ cionanĩtie atĩ ikoragwo irĩ gĩcunjĩ kĩa “mũmaraya ũrĩa mũnene” tondũ nĩ ciĩingĩranagia mũno na ũhoi mĩhianano na maũndũ ma gĩũteti. (Kũg. 17:1) Hatarĩ nganja, no mũhaka igaacemania na ituĩro rĩrĩa rĩtuĩrĩirũo ndini iria ingĩ ciothe cia maheeni gũkũ thĩ!