ITHOMO RĨA 6

Gũtaarĩria Gĩtũmi gĩa Kũhũthĩra Rĩandĩko

Johana 10:33-36

NA NJĨRA NGUHĨ: Ndũgathome o rĩandĩko ũcoke ũthiĩ ũndũ-inĩ ũrĩa ũrũmĩrĩire. Tigĩrĩra atĩ athikĩrĩria aku nĩ mona wega ũrĩa rĩandĩko rĩrĩa wathoma rĩratwarana na ũndũ ũrĩa ũrarĩrĩria.

ŨRĨA ŨNGĨKA ŨGUO:

Gweta ciugo iria ikuuĩte ũndũ ũrĩa mũnene. Thutha wa gũthoma rĩandĩko, onania ciugo iria ikonainie ĩmwe kwa ĩmwe na ũndũ ũrĩa mũnene. No wĩke ũguo na njĩra ya gũcokera ciugo icio kana kũũria kĩũria gĩgũtũma athikĩrĩria aku mamenye ciugo iria ikuuĩte ũndũ ũrĩa mũnene.

Ũngĩhũthĩra ciugo ngũrani gũcokera rĩciria rĩrĩa rĩrĩ rĩandĩko-inĩ, tigĩrĩra atĩ athikĩrĩria aku nĩ mekuona ũrĩa ciugo iria irĩ thĩinĩ wa Bibilia iratwarana na ũndũ ũrĩa mũnene.
Tĩtĩrithia ũndũ ũrĩa ũrenda athikĩrĩria maririkane. Angĩkorũo ũtanathoma rĩandĩko nĩ ũgwetire gĩtũmi gĩa kũrĩthoma, taarĩria ũrĩa ciugo iria ikuuĩte ũndũ ũrĩa mũnene rĩandĩko-inĩ rĩu iratwarana na gĩtũmi kĩu.

Ũgĩtaarĩria rĩandĩko, iga Bibilia yaku ĩrĩ hingũre. Ũndũ ũcio nĩ ũgũteithia athikĩrĩria aku mone ũrĩa ciugo ciaku iratwarana na rĩandĩko rĩrĩa wathoma.
Taarĩria na njĩra hũthũ. Wĩtheme kwarĩrĩria maũndũ mataranyita mbaru ũndũ ũrĩa mũnene. Gũkĩringana na maũndũ marĩa athikĩrĩria aku moĩ igũrũ rĩgiĩ ũndũ ũrĩa ũrarĩrĩria, thuura nĩ maũndũ maigana marabatarania nĩguo athikĩrĩria mataũkĩrũo wega nĩ ũndũ ũrĩa mũnene.