Athomi Aitũ Maroria Atĩrĩ . . .

Hihi Akristiano arĩa othe ehokeku mathiaga igũrũ?

▪ Andũ aingĩ nĩ mathomete ciugo ici cia Jesu cia kũũmĩrĩria: “Ngai, tondũ wa ũrĩa endete kĩrĩndĩ gĩa gũkũ thĩ, nĩaarutire Mũrũ wake wa mũmwe, nĩ getha mũndũ o wothe ũmwĩhokete ndakore, no agĩe muoyo wa tene na tene.” (Johana 3:16, nĩ ithuĩ tũinamĩtie ndemwa icio.) Hihi Jesu eendaga kuuga atĩ arĩa othe ehokeku mathathayagia Ithe, Jehova Ngai, nĩ magaathiĩ igũrũ gũtũũra makenaga tene na tene?

Ta rora ciugo ici cia Jesu iratũteithia gwĩciria: “Na gũtirĩ mũndũ ũrĩ aambata Igũrũ, tiga o ũrĩa waikũrũkire akiuma Igũrũ, nĩwe Mũrũ wa mũndũ, o ũrĩa ũtũũraga Igũrũ.” (Johana 3:13) Ũguo nĩ kuonania atĩ athathaiya a tene ehokeku, ta Nuhu, Iburahimu, Musa, na Daudi, matiathiĩte igũrũ. (Atũmwo 2:34) Kwoguo-rĩ, maagĩthire kũ? Na njĩra nguhĩ: Andũ acio ehokeku a tene marĩ thĩinĩ wa mbĩrĩra, makomete, matarĩ ũndũ moĩ, metereire kũriũkio.—Kohelethu 9:5, 6; Atũmwo 24:15.

Mũndũ wa mbere thĩinĩ wa Bibilia kũgweta atĩ nĩ harĩ andũ magathiĩ igũrũ thutha wa gũkua nĩ Jesu. Eerire arũmĩrĩri ake atĩ nĩ egũthiĩ kũmathondekera handũ kũrĩa igũrũ. (Johana 14:2, 3) Ũcio waarĩ ũrutani mwerũ harĩ andũ a Ngai. Mũtũmwo Paulo aacokire agĩtaarĩria atĩ thutha wa Jesu gũkua na kũriũka, aambata igũrũ, ‘nĩ aaguũririe njĩra njerũ na ĩrĩ muoyo harĩ arutwo ake’—ĩrĩa gũtarĩ mũndũ o na ũmwe wamĩgereire mbere ĩyo.—Ahibirania 10:19, 20.

Hihi ũguo nĩ kuuga atĩ kuuma hĩndĩ ĩyo arĩa othe ehokeku mathiaga igũrũ? Aca, tondũ arĩa mariũkagio magathiĩ igũrũ mathiaga kũheo wĩra ũrĩa ũheagwo o gakundi kanini ka andũ. Hwaĩ-inĩ wa mũico marĩ hamwe na atũmwo ake, Jesu aamerire atĩ nĩ ‘mangĩgaikarĩra itĩ-cia-ũnene magĩtuanĩra’ Ũthamaki-inĩ wake wa igũrũ. Kwoguo, wĩra ũrĩa mangĩaheirũo igũrũ nĩ wa gũthamaka hamwe na Jesu.—Luka 22:28-30.

Makĩria ma atũmwo a Jesu, nĩ kũrĩ andũ angĩ makaheo wĩra ũcio wa mwanya. Mũtũmwo Johana, nĩ onire Jesu thĩinĩ wa kĩoneki arĩ na gĩkundi kĩa andũ maariũkĩtio marĩ igũrũ arĩa metĩtwo ‘kĩrĩndĩ gĩa gũthamakĩrũo nĩ Ngai, na amũthĩnjagĩri arĩa magaathamakaga thĩ.’ (Kũguũrĩrio 3:21; 5:10) Maarĩ aigana? O ta ũrĩa gũkoragwo thirikari-inĩ o yothe, no gakundi kanini gathamakaga. Ũguo noguo Ũthamaki wa igũrũ ũtariĩ. Jesu, Gatũrũme ka Ngai, agaathamaka hamwe na andũ 144,000 arĩa “maagũrirũo makĩamũranio na andũ arĩa angĩ.”—Kũguũrĩrio 14:1, 4, 5.

Ma nĩ atĩ, andũ 144,000 nĩ anyinyi maringithanĩtio na andũ othe arĩa maarĩ ehokeku, a tene na a mahinda maya. No harĩ na gĩtũmi kĩega tondũ acio 144,000 marariũkio mathiĩ igũrũ makarute wĩra mũna ũrĩa mamũrĩirũo. Ũngĩtua gwaka nyumba-rĩ, hihi ũngĩtĩra mabundi mothe marĩa njorua itũũra-inĩ rĩanyu wĩra ũcio? Aca. Ũngĩta o arĩa ũrabatara wĩra-inĩ ũcio. No taguo o nake Ngai atathuurĩte arĩa othe ehokeku nĩguo amahe mweke wa mwanya wa gwathana hamwe na Kristo igũrũ.

Thirikari ĩyo ya igũrũ nĩ ĩkaahingia muoroto wa Ngai harĩ andũ, ũrĩa akoretwo naguo kuuma o kĩambĩrĩria. Jesu marĩ na acio 144,000 nĩ makaarũgamĩrĩra wĩra wa kũgarũra thĩ yothe ĩtuĩke paradiso, kũrĩa andũ aingĩ mũno ehokeku magatũũra tene na tene marĩ na gĩkeno. (Isaia 45:18; Kũguũrĩrio 21:3, 4) Andũ acio nĩ hamwe na arĩa marĩ kĩririkano-inĩ kĩa Ngai, arĩa makaariũkio.—Johana 5:28, 29.

Mũthathaiya o wothe wa Jehova mwĩhokeku—wa mahinda-inĩ maya kana wa tene, no aamũkĩre kĩheo kĩu kĩega mũno kĩa muoyo wa tene na tene. (Aroma 6:23) Nĩ andũ anyinyi magaatũũra igũrũ makĩruta wĩra wa mwanya, no arĩa aingĩ makaaherũo muoyo thĩinĩ wa paradiso gũkũ thĩ.