Wee nĩ Ũrekaga Jehova Atuĩke Igai Rĩaku?

“No ambai mũcarie ũthamaki wa Ngai o na ũthingu wake, nacio indo icio ciothe nĩmũrĩkĩragĩrĩrio.”—MAT. 6:33.

1, 2. (a) ‘Aisiraeli a Ngai’ arĩa magwetetwo thĩinĩ wa Agalatia 6:16 nĩa? (b) “Mĩhĩrĩga ĩrĩa ikũmi na ĩĩrĩ ya Isiraeli” thĩinĩ wa Mathayo 19:28 ĩrũgamĩrĩire kĩĩ?

RĨRĨA wona rĩĩtwa Isiraeli thĩinĩ wa Bibilia, nĩ ũndũ ũrĩkũ ũkaga meciria-inĩ maku? Hihi wĩciragia ũhoro wa mũrũ wa Jakubu Isaaka, ũrĩa wacokire gwĩtwo Isiraeli? Kana hihi wĩciragia ũhoro wa njiarũa ciake, rũrĩrĩ rwa Isiraeli? Ĩ nao Aisiraeli a kĩĩroho? Rĩrĩa Bibilia ĩkwaria ũhoro wa Isiraeli na njĩra ya mũhaano, ĩkoragwo ĩkĩaria ũhoro wa ‘Aisiraeli a Ngai’ arĩa 144,000, aitĩrĩrie maguta kũgerera roho mũtheru matuĩke athamaki na athĩnjĩri Ngai kũrĩa igũrũ. (Gal. 6:16; Kũg. 7:4; 21:12) No ta rora wone ũrĩa mĩhĩrĩga ĩrĩa 12 ya Isiraeli ĩgwetetwo na njĩra ya mwanya thĩinĩ wa Mathayo 19:28.

2 Jesu oigire ũũ: “Inyuĩ arĩa mũnũmĩrĩire nĩmũgaikarĩra itĩ cia ũthamaki ikũmi na igĩrĩ, mũgĩtuĩra mĩhĩrĩga ĩrĩa ikũmi na ĩĩrĩ ya Isiraeli cira, hĩndĩ ĩrĩa gũkagĩa na thĩ njerũ, o rĩrĩa Mũrũ wa mũndũ agaikarĩra gĩtĩ gĩake gĩa ũthamaki, kĩrĩa kĩĩ na riri.” Thĩinĩ wa mũhari ũcio, “mĩhĩrĩga ikũmi na ĩĩrĩ ya Isiraeli” nĩ andũ arĩa magaatuĩrũo, nĩ arũmĩrĩri a Jesu aitĩrĩrie maguta, na nĩo metereire gũkaaheo muoyo wa tene na tene thĩinĩ wa Paradiso gũkũ thĩ. Nĩ makagunĩka nĩ ũndũ wa ũtungata wa ũthĩnjĩri Ngai wa arĩa 144,000.

3, 4. Arĩa aitĩrĩrie maguta maigĩte kĩonereria kĩrĩkũ kĩega?

3 O ta athĩnjĩri Ngai na Alawii a tene, ũmũthĩ arĩa aitĩrĩrie maguta monaga ũtungata ũrĩa marĩ naguo ũrĩ gĩtĩo kĩnene. (Ndar. 18:20) Arĩa aitĩrĩrie maguta matiĩrĩgĩrĩire gũkaaheo handũ gũkũ thĩ hatuĩke igai rĩao. Ithenya rĩa ũguo, metagĩrĩra gũgaatuĩka athamaki na athĩnjĩri Ngai, igũrũ marĩ hamwe na Jesu Kristo. Kũguũrĩrio 4:10, 11 yonanagia atĩ magaathiĩ na mbere na ũtungata wao harĩ Jehova kũu igũrũ marĩ athamaki na athĩnjĩri Ngai.—Ezek. 44:28.

4 Marĩ gũkũ thĩ, arĩa aitĩrĩrie maguta matũũraga na njĩra ĩronania kũna atĩ Jehova nĩwe igai rĩao. Monaga mweke ũrĩa marĩ naguo ũtungata-inĩ wa Ngai ũrĩ wa bata mũno. Nĩ monanagia wĩtĩkio harĩ igongona rĩa Kristo rĩa ũkũũri na magathiĩ na mbere kũmũrũmĩrĩra na kwoguo makonania atĩ ‘gwĩtwo na gũthuurũo kwao nĩ kũrũmu.’ (2 Pet. 1:10) Ũhoti wao na maũndũ mao matikoragwo mahanaine. Ĩndĩ, matiĩgwatagia ũndũ o na ũrĩkũ atĩ nĩguo matungatĩre Ngai o hanini. Ngũrani na ũguo-rĩ, maheaga ũtungata wa Ngai mweke wa mbere na mageka o ũrĩa wothe mangĩhota. Na nĩ maigĩire arĩa marĩ na kĩĩrĩgĩrĩro gĩa gũgatũũra thĩinĩ wa paradiso gũkũ thĩ kĩonereria kĩega.

5. Akristiano othe mangĩhota gũtua Jehova igai rĩao atĩa, na nĩkĩ ũndũ ũcio ti mũhũthũ?

5 O na angĩkorũo kĩĩrĩgĩrĩro giitũ nĩ gĩa gũgatũũra igũrũ kana gũkũ thĩ-rĩ, no mũhaka ‘twĩrege na tuoe mũtĩ witũ wa kwambĩrũo tũrũmagĩrĩre Kristo.’ (Mat. 16:24) Andũ milioni nyingĩ arĩa matanyaga gũgatũũra thĩinĩ wa Paradiso gũkũ thĩ nĩ marathathaiya Ngai na makarũmĩrĩra Kristo na njĩra ĩyo. Matiiganagĩra nĩ gwĩka o maũndũ manyinyi tu o rĩrĩa moĩ wega atĩ no mahote gwĩka maũndũ maingĩ. Amwe nĩ mahũthahũthĩtie mũtũũrĩre wao na magatuĩka mapainia. Angĩ nĩ merutanagĩria gũtuĩka mapainia mĩeri ĩmwe o mwaka. Nao angĩ, o na matekũhota gũtuĩka mapainia, no merutanagĩria ũtungata-inĩ. Andũ acio matariĩ o ta Maria, ũrĩa waitĩrĩirie Jesu maguta ma goro mũno. Jesu oigire ũũ: ‘Nĩ wĩra mwega aanduta. . . . Ũndũ ũrĩa angĩhota, nĩguo anjĩka.’ (Mar. 14:6-8) Ti ũndũ mũhũthũ gwĩka o ũrĩa wothe tũngĩhota, tondũ tũratũũra thĩinĩ wa thĩ ĩrĩ rungu rwa Shaitani. O na kũrĩ ũguo, nĩ twĩrutanagĩria biũ na tũkaiga mwĩhoko witũ harĩ Jehova. Rekei twarĩrĩrie njĩra inya iria tũhũthagĩra gwĩka ũguo.

Gũcaria Ũthamaki wa Ngai Mbere

6. (a) Andũ monanagia na njĩra ĩrĩkũ atĩ igai rĩao rĩrĩ thĩinĩ wa ũtũũro ũyũ tu? (b) Nĩkĩ nĩ wega gũkorũo na muonere ta wa Daudi?

6 Jesu aarutire arũmĩrĩri ake macaragie Ũthamaki wa Ngai mbere o na ũthingu wake. Andũ a gũkũ thĩ mambaga gũcaria maũndũ ma kwĩguna o ene, o ta ũrĩa Bibilia yugaga atĩ ‘igai rĩao no rĩa muoyo ũyũ tũrĩ.’ (Thoma Thaburi 17:1, 13-15.) Mategũtindanĩra na Mũũmbi wao, andũ aingĩ merutanagĩria mũno kwagĩria mũtũũrĩre wao, kũgĩa na famĩlĩ, na kũigĩra ciana ciao mũthithũ. Igai rĩao rĩrĩ o ũtũũro-inĩ ũyũ wiki. Ĩndĩ, Daudi eerutanagĩria gwĩthondekera “ngumo njega” harĩ Jehova, o ta ũrĩa mũrũ wake acokire kuuga atĩ ũguo nĩguo andũ othe magĩrĩirũo nĩ gwĩka. (Koh. 7:1) O ta Asafu, Daudi nĩ aamenyaga atĩ gũkorũo Jehova arĩ Mũrata wake nĩ kwa bata mũno gũkĩra kwamba gwĩcarĩria maũndũ ma kwĩguna ũtũũro-inĩ. Nĩ aakenaga nĩ gũkorũo na ũkuruhanu na Ngai. Mahinda-inĩ maya maitũ Akristiano aingĩ nĩ maigĩte maũndũ ma kĩĩroho mbere ya mawĩra mao, tondũ nĩ matuĩte Jehova igai rĩao.

7. Mũrũ wa Ithe witũ ũmwe aarathimirũo atĩa nĩ ũndũ wa gũcaria Ũthamaki mbere?

7 Ta wĩcirie ũhoro wa mũndũ wĩtagwo Jean-Claude kuuma thĩinĩ wa Bũrũri wa Central Africa. Nĩ mũthuri wa kĩũngano ũrĩ na famĩlĩ ya ciana ithatũ. Thĩinĩ wa bũrũri ũcio ti ũndũ mũhũthũ kwandĩkwo, na kwoguo andũ aingĩ mekaga o ũrĩa wothe mangĩhota matũũrie wĩra wao. Mũthenya ũmwe menenja nĩ eerire Jean-Claude atĩ ambĩrĩrie kũrutaga wĩra ũtukũ kuuma thinacara na nuthu cia hwaĩ-inĩ, mĩthenya mũgwanja o kiumia. Jean-Claude akĩmũtaarĩria atĩ makĩria ma gũcarĩria famĩlĩ yake indo cia kĩĩmwĩrĩ, nĩ abataraga kũrũmbũiya mabataro ma kĩĩroho ma famĩlĩ yake. Ningĩ akĩmwĩra atĩ nĩ akoragwo na maũndũ mangĩ ehokeirũo ma gũteithia kĩũngano. Menenja ũcio acokirie atĩa? “Ũngĩenda gũtũũria wĩra waku, no mũhaka ũtigane na maũndũ marĩa mangĩ mothe, mũtumia waku, ciana ciaku, o na mathĩna maku. No mũhaka ũhũthĩre biũ ũtũũro waku wĩra-inĩ—hatarĩ kĩndũ kĩngĩ tiga o wĩra waku. Thuura kĩrĩa ũkwenda: ndini yaku kana wĩra waku.” Korũo nĩwe ũngĩekire atĩa? Jean-Claude nĩ aamenyaga atĩ o na angĩabutirũo, Ngai nĩ angĩarũmbũyirie mabataro make. No angĩathiire na mbere na gũkorũo na wĩra mũingĩ wa kũruta ũtungata-inĩ wa Ngai, na Jehova nĩ angĩamũteithirie kũrũmbũiya mabataro ma famĩlĩ yake. Kwoguo, agĩthiĩ mũcemanio ũrĩa warũmĩrĩire kiumia-inĩ kĩu. Thutha ũcio, akĩĩhaarĩria athiĩ wĩra-inĩ, atarĩ na ma biũ kana nĩ angĩakorire atarĩ mũbuute. O hĩndĩ ĩyo akĩhũrĩrũo thimũ. Menenja ũcio nĩ aarĩkĩtie kũbutwo, no mũrũ wa Ithe witũ ndaarĩ mũbuute.

8, 9. Tũngĩĩgerekania atĩa na athĩnjĩri Ngai na Alawii harĩ kũreka Jehova atuĩke igai riitũ?

8 Arĩa manakorũo ũgwati-inĩ wa kũbuutwo, hihi maneyũria, ‘Ndĩhotaga atĩa kũhingĩria andũ a mũciĩ wakwa mabataro mao?’ (1 Tim. 5:8) O na angĩkorũo wanacemania na ũndũ ta ũcio kana ndũrĩ wacemania naguo-rĩ, no kũhoteke nĩ wĩyoneire atĩ ũngĩtua Ngai igai rĩaku ndangĩgũtiganĩria, na angĩkorũo nĩ wonaga kũmũtungatĩra kũrĩ kwa bata mũno. Rĩrĩa Jesu eerire arutwo ake macaragie ũthamaki wa Ngai mbere, agĩcoka akĩmomĩrĩria ũũ: “Nacio indo icio ciothe”—ta irio, kana nguo “nĩ mũrĩkĩragĩrĩrio.”—Mat. 6:33.

9 Ta wĩcirie ũhoro wa Alawii, arĩa mataigana kũheo igai rĩa gĩthaka. Tondũ ũthathaiya wa Jehova nĩguo warĩ wa bata mũno harĩ o-rĩ, no mũhaka mangĩamwĩhokire amahingĩrie mabataro mao, o we wamerire ũũ: ‘Nĩ niĩ igai rĩaku.’ (Ndar. 18:20) O na gũtuĩka tũtitungatagĩra thĩinĩ wa hekarũ ta ũrĩa athĩnjĩri Ngai na Alawii meekaga-rĩ, no tũhote kuonania roho ta ũrĩa moonanirie, tũrĩ na ma atĩ Jehova nĩ arĩrũmbũyagia mabataro maitũ. O ũrĩa tũrakuhĩrĩria mũico, noguo tũkũbatara kwĩhoka Ngai makĩria atũhingagĩrie mabataro maitũ.—Kũg. 13:17.

Gũcaria Ũthingu wa Ngai Mbere

10, 11. Andũ amwe mehokete Jehova atĩa ũhoro-inĩ wĩgiĩ wĩra? Heana ngerekano.

10 Ningĩ Jesu nĩ eekĩrire arutwo ake ngoro ‘maambage gũcaria ũthingu wa Ngai.’ (Mat. 6:33) Ũguo nĩ kuuga tũrũmagĩrĩre ithimi cia Jehova cia kũmenyithania wega na ũũru handũ ha cia andũ. (Thoma Isaia 55:8, 9.) Nĩ ũkũririkana atĩ tene andũ amwe nĩ maakũragia mbakĩ kana makendia indo ithondeketwo nayo, nao angĩ makarutana mbaara, kana magathondeka na makendia indo cia mbaara. Thutha wa kũmenya ũhoro ũrĩa wa ma, aingĩ ao makĩamũra gũcenjia mawĩra macio nĩguo maagĩrĩre kũbatithio.—Isa. 2:4; 2 Kor. 7:1; Gal. 5:14.

11 Andrew nĩ ũmwe wa arĩa meekire ũguo. Marĩ na mũtumia wake, rĩrĩa meerutire ũhoro wa Jehova, nĩ maatuire itua rĩa kũmũtungatĩra. Andrew nĩ aakenagĩra wĩra wake mũno ĩndĩ nĩ aaũtigire. Nĩkĩ? Tondũ aarutaga wĩra na ithondeka rĩa gĩũteti na nĩ atuĩte itua rĩa kũiga ũthingu wa Ngai mbere. Andrew agĩtiga wĩra ũcio, aarĩ na ciana igĩrĩ, na aarĩ na tũbeca tũngĩamatindĩkire o mĩeri mĩnyinyi. Kũringana na muonere wa andũ, nĩ kũngĩonekire kũna ta ataarĩ na ‘igai.’ Nĩ aacaririe wĩra aigĩte mwĩhoko wake harĩ Ngai. Kuumana na maũndũ marĩa meyoneire na famĩlĩ yake no marute ũira atĩ guoko kwa Ngai nĩ kũrĩ ũhoti. (Isa. 59:1) Nĩ ũndũ wa gũikara mũtũũrĩre mũhũthũ, Andrew na mũtumia wake o na nĩ maahotire kũingĩra ũtungata-inĩ wa hĩndĩ ciothe. Andrew oigire ũũ: “Nĩ kũrĩ hĩndĩ tũkoragwo na mĩtangĩko nĩ ũndũ wa mbeca, ũikaro, ũgima wa mwĩrĩ, na gũkorũo no tũrakũra.” Agĩcoka akiuga atĩ, “No hingo ciothe Jehova akoretwo agĩtũteithia. . . . No tuuge tũtarĩ na nganja o na hanini atĩ gũtungatĩra Jehova, nĩguo wĩra ũrĩa mwega mũno mũndũ angĩthingata na ũrĩ na irathimo.”a—Koh. 12:13.

12. Nĩ ngumo ĩrĩkũ ĩrabatarania nĩguo mũndũ aige ithimi cia Ngai mbere? Gweta cionereria cia kwanyu.

12 Jesu eerire arutwo ake ũũ: “Mũngĩkorũo mũrĩ na wĩtĩkio ũiganaine na kahĩndĩ ga karatarĩ-rĩ, mũngĩkera kĩrĩma gĩkĩ, Ehera haha ũthiĩ harĩa, na no gĩkehera; na gũtirĩ ũndũ ũkamũrema.” (Mat. 17:20) Hihi wee no ũhote kũrũmĩrĩra ithimi cia Ngai biũ angĩkorũo gwĩka ũguo no gũkũrehere moritũ? Angĩkorũo ndũrĩ na ma biũ kana no ũhote gwĩka ũguo, aria na andũ arĩa angĩ thĩinĩ wa kĩũngano. Hatarĩ nganja nĩ ũgwĩkĩrũo ngoro mũno nĩ kũigua maũndũ marĩa meyoneire.

Onania Ngatho nĩ Ũndũ wa Maũndũ Marĩa Jehova Atũheete

13. Tũngĩĩrutanĩria ũtungata-inĩ wa Jehova, tũrĩrĩgagĩrĩra eke atĩa ũhoro-inĩ wĩgiĩ mabataro maitũ ma kĩĩroho?

13 Angĩkorũo nĩ wonaga mweke waku wa gũtungatĩra Jehova ũrĩ wa bata, no ũkorũo na ma atĩ nĩ arĩkũheaga mabataro maku ma kĩĩmwĩrĩ na ma kĩĩroho, o ta ũrĩa aaheaga Alawii. Ta wĩcirie ũhoro wa Daudi. O na gũtuĩka aarĩ thĩinĩ wa ngurunga-rĩ, nĩ aamenyaga atĩ Ngai nĩ angĩamũrũmbũyirie. O na ithuĩ no twĩhoke Jehova o na rĩrĩa maũndũ marĩ maritũ. Ririkana atĩ rĩrĩa Asafu aatonyire “handũ harĩa haamũre ha Mũrungu,” nĩ aagĩire na muonere ũrĩa wagĩrĩire wĩgiĩ maũndũ marĩa maamũthumbũraga. (Thab. 73:17) O na ithuĩ, nĩ tũrabatara kwĩhoka Ngai arĩ we Kĩhumo giitũ kĩa irio cia kĩĩroho. Tweka ũguo nĩ tũrĩonanagia ngatho ciitũ harĩ mweke ũrĩa tũrĩ naguo wa gũtungatĩra Ngai o na maũndũ maitũ mangĩkorũo mahaana atĩa. Na njĩra ĩyo nĩ tũrĩkoragwo tũkĩreka Jehova atuĩke igai riitũ.

14, 15. Twagĩrĩirũo nĩ kũiyũkia maũndũ atĩa rĩrĩa ũtheri wĩgiĩ maandĩko mamwe wongerereka, na nĩkĩ?

14 Hihi nĩ wĩhokaga Jehova, Kĩhumo kĩa ũtheri wa kĩĩroho, rĩrĩa atũguũrĩria ‘maũndũ make ma thĩinĩ’ marĩa makoragwo Bibilia-inĩ? (1 Kor. 2:10-13) Tũrĩ na ngerekano njega mũno ya ũrĩa mũtũmwo Petero aaiyũkirie maũndũ hĩndĩ ĩrĩa Jesu eerire arutwo Ake ũũ: “Mwaaga kũrĩa mwĩrĩ wa Mũrũ wa mũndũ na mũnyue thakame yake, mũtirĩ na muoyo thĩinĩ wanyu.” Nĩ ũndũ wa kwaga kũmenya atĩ ĩyo yarĩ ngerekano, arutwo aingĩ makiuga ũũ: “Ũhoro ũcio wĩ hinya; nũ ũngĩhota kũũigua?” Nĩ ũndũ ũcio “makĩhũndũka, magĩtiga gũcoka gũthiĩ nake.” Nowe Petero akĩmwĩra atĩrĩ, “Mwathani, tũgĩthiĩ kũrĩ ũ? Wee wĩ na ndeto cia muoyo wa tene na tene.”—Joh. 6:53, 60, 66, 68.

15 Petero ndaataũkĩirũo biũ nĩ ũrĩa Jesu eendaga kuuga ũhoro-inĩ wĩgiĩ kũrĩa mwĩrĩ Wake na kũnyua thakame Yake. Ĩndĩ, mũtũmwo ũcio eehokire Ngai arehe ũtheri wa kĩĩroho. Rĩrĩa ũtheri wa kĩĩroho wĩgiĩ ũndũ mũna wongerereka-rĩ, hihi nĩ ũgeragia gũtaũkĩrũo nĩ itũmi cia Kĩĩmaandĩko iria ikoragwo itũmĩte kũgĩe na ũgarũrũku ũcio? (Thim. 4:18) Aberoia a karine ya mbere meetĩkĩrire ũhoro “meendeire na ngoro, magĩtuĩragia Maandĩko mũthenya o mũthenya.” (Atũm. 17:11) Kwĩgerekania nao gũgũtũma ũgĩe na ngatho makĩria nĩ ũndũ wa mweke ũrĩa ũrĩ naguo wa gũtungatĩra Jehova, na gũkorũo arĩ we igai rĩaku.

Kũhikania o Thĩinĩ wa Mwathani

16. Ngai angĩtuĩka igai riitũ na njĩra ĩrĩkũ ũhoro-inĩ wĩgiĩ 1 Akorintho 7:39?

16 Ningĩ Akristiano nĩ marabatara kũririkana mĩoroto ya Ngai, harĩ kũrũmĩrĩra ũtongoria wa Bibilia ũkoniĩ kũhikania o “thĩinĩ wa Mwathani.” (1 Kor. 7:39) Amwe nĩ mamũrĩte kwaga kũingĩra thĩinĩ wa kĩhiko handũ ha kwagarara ũtaaro ũcio wa Ngai. Ngai nĩ akenagio nĩ andũ acio. Daudi eekire atĩa rĩrĩa aaiguire ihooru na akĩona ta ataarĩ na mũndũ wa kũmũteithia? Oigire ũũ: ‘Ũhoro ũrĩa ũranjaithia ngũũitũrũra mbere ya Ngai, nĩ kũmuonia ngũmuonia mĩnyamaro ĩrĩa ndĩ nayo.’ (Thab. 142:1-3) No kũhoteke atĩ mũnabii Jeremia ũrĩa watungatĩire Ngai arĩ mwĩhokeku mĩaka mĩingĩ atarĩ thĩinĩ wa kĩhiko, o nake aaiguaga o ta Daudi. No wĩrute ũhoro wa kĩonereria gĩake ta ũrĩa kĩarĩrĩirio thĩinĩ wa gĩcunjĩ gĩa 8 kĩa ibuku rĩa Mungu Asema Nasi Kupitia Yeremia.

17. Mwarĩ wa Ithe witũ ũmwe ũtarĩ mũhiku ekaga atĩa rĩrĩa aigua ihooru?

17 Mwarĩ wa Ithe witũ ũmwe thĩinĩ wa Amerika (US) oigire ũũ: “Ndirĩ ndatua atĩ ndikahika. Rĩrĩa ngona mũndũ ũrĩa ũnjagĩrĩire nĩ ngaahika. Mami ti Mũira wa Jehova, na nĩ kũrĩ hĩndĩ ageretie kũnjiguithia atĩ hikĩre o mũndũ ũrĩa ngona. Ngĩmũria kana no ende gũgacokererio mahĩtia kĩhiko gĩakwa kĩngĩkaharagana. Thutha ũcio, rĩrĩa onire ndĩ na wĩra mwega ũrahingĩria mabataro makwa, na ndĩ na gĩkeno, agĩtiga kũndindĩkĩrĩria.” Rĩmwe na rĩmwe mwarĩ wa Ithe witũ ũcio nĩ aiguaga ihooru. Oigire ũũ: “Nĩ ũndũ ũcio, ngeragia gũtua Jehova mwĩhoko wakwa. Gũtirĩ hingo andiganagĩria.” Hihi nĩ kĩĩ kĩmũteithĩtie kwĩhoka Jehova? “Mahoya nĩ mandeithagia mũno kuona Ngai arĩ wa ma na atĩ gũtirĩ hingo ngoragwo ndĩ nyiki. Tondũ Ũrĩa-Wĩ-Igũrũ-Mũno nĩ athikagĩrĩria-rĩ, nĩ njiguaga ndĩ mũtĩe na ndĩ na gĩkeno.” Arĩ na ma atĩ “kũheana nĩkuo kũrehage gĩkeno kũrĩ kũheo,” mwarĩ wa Ithe witũ ũcio oigire ũũ: “Ngeragia kwĩheana mũno nĩguo ndeithie andũ, itekwĩrĩgĩrĩra mahe kĩndũ. Rĩrĩa ndĩreciria ũrĩa ingĩka nĩgetha ndeithie mũndũ mũna, njiguaga ndĩ na gĩkeno.” (Atũm. 20:35) Ĩĩni, nĩ arekete Jehova atuĩke igai rĩake, na nĩ akenagĩra mweke wa gũtungatĩra Jehova.

18. Jehova angĩgũtua igai rĩake na njĩra ĩrĩkũ?

18 O ũrĩa maũndũ maku mangĩkorũo matariĩ, no ũreke Ngai atuĩke igai rĩaku. Weka ũguo, ũrĩkoragwo ũrĩ wa itari rĩa andũ ake arĩa makoragwo na gĩkeno. (2 Kor. 6:16, 17) Ũndũ ũcio ũgũtũma o nawe ũtuĩke igai rĩa Jehova o ta ũrĩa andũ amwe a tene maarĩ. (Thoma Gũcokerithia Maathani 32:9, 10.) O ta ũrĩa Aisiraeli maatuĩkire igai rĩa Ngai gatagatĩ-inĩ ka ndũrĩrĩ, Jehova no agũthuure ũtuĩke wake na akũrũmbũyagie na wendo.—Thab. 17:8.

[Kohoro ka magũrũ-inĩ]

Ũngĩcokia Atĩa?

Ũngĩreka Jehova atuĩke igai rĩaku atĩa

• na njĩra ya kwamba gũcaria Ũthamaki wa Ngai na ũthingu wake?

• na njĩra ya kuonania ngatho ciaku nĩ ũndũ wa irio cia kĩĩroho?

• na njĩra ya kũrũmĩrĩra watho wa Ngai wa kũhikania o thĩinĩ wa Mwathani?

[Mbica karatathi ka 16]

Jehova atuĩkaga igai riitũ rĩrĩa twaiga ũtungata wake mbere ya maũndũ marĩa mangĩ

[Mbica karatathi ka 18]

Kĩonereria kĩa Jeremia nĩ gĩtwĩkĩraga ngoro