MACOKIO MA CIŨRIA CIA BIBILIA
No kũhoteke andũ matũũre tene na tene?
Nĩ mũbango ũrĩkũ Ngai aigĩte wa gũtũkũũra kuumana na gĩkuũ?
Mũthuri wa mbere Adamu nĩ aatũũrire mĩaka mĩingĩ mũno. No thutha-inĩ nĩ aakũrire na agĩkua. Kuuma hĩndĩ ĩyo andũ nĩ mageretie njĩra nyingĩ cia kũgirĩrĩria matigaakũre. Ĩndĩ gũtirĩ mũndũ ũrĩ wahota kũũrĩra gĩkuũ. Nĩkĩ? Tondũ Adamu aakũrire na agĩkua rĩrĩa eehirie aaga gwathĩkĩra Ngai. Tũkũraga tondũ nĩ twagaire mehia marĩa marehaga gĩkuũ, kuuma kũrĩ Adamu.—Thoma Kĩambĩrĩria 5:5; Aroma 5:12.
Nĩ tũbataraga mũndũ wa gũtũkũũra nĩguo tũgatũũra tene na tene. (Ayubu 33:24, 25) Ũkũũri nĩ thogora ũrĩa ũrĩhagwo nĩguo mũndũ arekererio, o na ithuĩ nĩ tũbataraga gũkũũrũo ũkombo-inĩ wa gĩkuũ. (Thama 21:29, 30) Jesu nĩ aatũrĩhĩire thogora ũcio rĩrĩa aakuire nĩ ũndũ witũ.—Thoma Johana 3:16.
Tũngĩka atĩa tũgĩe muoyo wa tene na tene?
Ti andũ othe magaakũrũo ũkombo-inĩ wa ndwari na gũkũra. Ma nĩ atĩ, andũ arĩa mataathĩkagĩra Ngai o ta Adamu matikaaheo muoyo ũcio. Muoyo wa tene na tene ũkaheo arĩa tu magakorũo moheirũo mehia mao.—Thoma Isaia 33:24; 35:3-6.
Nĩguo tuoherũo, harĩ ũndũ tũrabatara gwĩka. Nĩ tũrabatara kwĩruta Kiugo kĩa Ngai Bibilia nĩ getha tũmũmenye. Bibilia nĩ ĩtũrutaga ũrĩa tũngĩikara mũtũũrĩre mwega na ũrĩa tũngĩtĩkĩrĩka harĩ Ngai nĩguo agaatũhe muoyo wa tene na tene.—Thoma Johana 17:3; Atũmwo 3:19.