Arĩa Makuĩte Nĩ Makaariũka

Hihi wee nĩ wĩtĩkĩtie ũrĩa Bibilia yugaga, atĩ andũ nĩ makaariũka?a Kĩĩrĩgĩrĩro gĩa gũkoona rĩngĩ andũ aitũ arĩa makuĩte, nĩ gĩtũcanjamũraga mũno. No hihi ũndũ ũcio nĩ ũgaakinyanĩra kũna? Nĩguo tũcokie kĩũria kĩu, reke twarĩrĩrie kĩrĩa gĩatũmire arutwo a Jesu Kristo metĩkĩtie ũhoro wa kũriũka.

Atũmwo nĩ meetĩkĩtie biũ ũhoro wa kũriũka kwa arĩa akuũ. Nĩkĩ? Nĩ ũndũ wa maũndũ maya merĩ. Wa mbere, ũũma ũyũ nĩguo watũmĩte magĩe na kĩĩrĩgĩrĩro: Jesu we mwene nĩ aariũkĩtio kuuma kũrĩ arĩa akuũ. Aariũkio nĩ oimĩrĩire atũmwo, na “ariũ a Ithe witũ magana matano na magakĩra, akĩmoimĩrĩra o ihinda rĩmwe othe.” (1 Akorintho 15:6) Makĩria ma ũguo, mabuku marĩa mana ma Injiri nĩ monanagia atĩ, andũ aingĩ nĩ maamenyire na magĩtĩkia atĩ Jesu nĩ aariũkĩte.​—Mathayo 27:62–28:20; Mariko 16:1-8; Luka 24:1-53; Johana 20:1–21:25.

Wa kerĩ, atũmwo nĩ meeyoneire Jesu akĩriũkia andũ atatũ, wa mbere itũũra-inĩ rĩa Naini, ũngĩ itũũra-inĩ rĩa Kaperinaumu, na ũcio ũngĩ Bethania. (Luka 7:11-17; 8:49-56; Johana 11:1-44) Mũndũ ũrĩa wariũkirio Bethania o ta ũrĩa tuonire gĩcunjĩ-inĩ kĩmwe kĩa ngathĩti ĩno, aarĩ mũrata wa hakuhĩ wa Jesu. Reke tuone makĩria ũrĩa gwekĩkire.

“NĨ NIĨ KŨRIŨKA”

“Mũrũ wa nyũkwa nĩakariũka.” Ciugo icio cioigirũo nĩ Jesu akĩĩra Maritha, mwarĩ wa nyina na Lazaro ũrĩa waaniinĩte matukũ mana kuuma aakua. Maritha ndaataũkĩirũo nĩ ciugo icio cia Jesu. Eeciragia ũndũ ũcio ũngĩgeekĩka mahinda marĩa mokĩte, tondũ eerire Jesu ũũ: “Nĩnjũĩ nĩakariũka.” No mũhaka akorũo nĩ aagegire mũno thutha wa kũigua Jesu oiga, “Nĩ niĩ kũriũka na nĩ niĩ muoyo,” na agĩcoka akĩona mũrũ wa nyina ariũkĩte kuuma kũrĩ arĩa akuũ.​—Johana 11:23-25.

Thikũ icio inya Lazaro aakuĩte-rĩ, aarĩ kũ? Gũtirĩ ũndũ Lazaro oigire wonanagia atĩ, aarĩ muoyo kũndũ kũngĩ thikũ icio inya. O na hatirĩ kĩndũ kĩomĩte thĩinĩ wake gĩgathiĩ kũrĩa igũrũ. Rĩrĩa Jesu aariũkirie Lazaro, ndaamũrutire kũrĩa igũrũ agĩkenera ũtũũro mwega hamwe na Ngai, akĩmũcokia gũkũ thĩ. Kwoguo-rĩ, Lazaro arĩ kũ thikũ icio inya? Ũrĩa kũrĩ nĩ atĩ, aarĩ mbĩrĩra-inĩ.​—Kohelethu 9:5, 10.

Ririkana atĩ, Jesu aaringithanirie gĩkuũ na toro, toro ũrĩa mũndũ okagĩra aariũkio. Tũthomaga ũũ: “Mũrata witũ Lazaro nĩakomete toro, no nĩngũthiĩ ngamũũkĩrie. Nao arutwo magĩkĩmwĩra, Mwathani, akorũo nĩonete toro, nĩekũhona. Na rĩrĩ, Jesu nĩ ũhoro wa gũkua gwake aagwetire; nao moĩ aagwetaga ũhoro wa gũkoma toro. Hĩndĩ ĩo Jesu agĩkĩmera wega, atĩrĩ, Lazaro nĩakuĩte.” (Johana 11:11-14) Rĩrĩa Jesu aariũkirie Lazaro, nĩ kũmũcokia aamũcokirie muoyo na akĩmuonithania rĩngĩ na andũ ao. Na githĩ ũndũ ũcio ndwareheire famĩlĩ ĩyo gĩkeno kĩnene!

Ciama iria Jesu aaringire rĩrĩa aarĩ gũkũ thĩ cia kũriũkia andũ, cionanagia ũrĩa angĩgeeka arĩ Mũthamaki wa Ũthamaki wa Ngai, mahinda mokĩte.b Jesu arĩ Mũthamaki kũrĩa igũrũ, nĩ agaacokia muoyo andũ arĩa makomete toro mbĩrĩra-inĩ, hĩndĩ ĩrĩa agaakorũo agĩathana gũkũ thĩ. Nĩkĩo gĩatũmire oige ũũ: “Nĩ niĩ kũriũka.” Ta wĩcirie gĩkeno kĩrĩa ũgaakorũo nakĩo, wonana rĩngĩ na andũ anyu! Ningĩ ta wĩcirie gĩkeno kĩrĩa gĩgaakorũo na arĩa makaariũkio!​—Luka 8:56.

‘ŨRĨA WĨHOKETE NIĨ, NO AGATŨŨRA MUOYO’

Jesu eerire Maritha ũũ: “Ũrĩa wĩĩ’hokete niĩ, o na aakua, no agatũũra muoyo, na mũndũ o wothe wĩ muoyo na akeĩ’hoka niĩ, ndarĩ hingo agakua.” (Johana 11:25, 26) Arĩa makaariũkio nĩ Jesu hĩndĩ ya wathani wake wa mĩaka ngiri ĩmwe, nĩ magaakorũo na kĩĩrĩgĩrĩro gĩa gũgaatũũra tene na tene, angĩkorũo nĩ mamwĩtĩkĩtie.

Jesu aarĩkia kuuga ũguo, aacokire akĩũria Maritha kĩũria gĩkĩ gĩa bata: “Ũguo nĩwĩtĩkĩtie?” Nake akĩmwĩra ũũ: “Ĩĩ-ni Mwathani; niĩ nĩnjĩtĩkĩtie atĩ wee nĩwe Kristo, Mũrũ wa Ngai.” (Johana 11:26, 27) Ĩ wee nawe, hihi no wende kũgĩa na wĩtĩkio ta ũrĩa warĩ na Maritha, ũhoro-inĩ wĩgiĩ kũriũka? Ũndũ wa mbere ũrabatara gwĩka, nĩ kwĩruta ũhoro wĩgiĩ muoroto wa Ngai harĩ andũ. (Johana 17:3; 1 Timotheo 2:4) Kũmenya ũndũ ũcio, nĩ gũgũtũma ũgĩe na wĩtĩkio. Na githĩ ti wega waranĩrie na Aira a Jehova, nĩguo makuonie ũrĩa Bibilia ĩrutanaga ũhoro-inĩ wĩgiĩ kũriũka? Nĩ megũkena mũno kwĩruta hamwe nawe ũhoro ũcio mwega.