Mũtaratara Mwerũ wa Kwambĩrĩria Wĩruti wa Bibilia

1. Nĩ mũtaratara ũrĩkũ mwerũ ũrĩkoragwo thĩinĩ wa ngathĩti ya Mũrangĩri, na ũhaarĩrĩirio atĩa?

¹ Kwambĩrĩria mweri wa Janũarĩ nĩ gũgũkorũo na mũtaratara mwerũ thĩinĩ wa ngathĩti ya Mnara wa Mlinzi ĩrĩa ĩthomagwo nĩ andũ othe wa gũtũteithia kwambĩrĩria wĩruti wa Bibilia na andũ. Ĩrĩ na kĩongo “Wĩrute Kuuma Kiugo-inĩ kĩa Ngai.” O na gũtuĩka amwe hatarĩ nganja nĩ marĩkenagĩra gũthoma o gĩcunjĩ mũtaratara-inĩ ũcio-rĩ, icunjĩ icio ihaarĩrĩirio irĩ cia kwarĩrĩrio.

2. Nĩ maũndũ marĩkũ marĩ icunjĩ-inĩ icio?

² Maũndũ Marĩa Marĩ Ho: Kĩongo na ciongo nyinyi ciandĩkĩtwo irĩ ciũria cia kũũria mwene nyũmba rĩrĩa mũraaria nake. Maandĩko ma mũthingi nĩ magwetetwo no mationanĩtio, nĩgetha mwene nyũmba akenere kwĩruta ĩmwe kwa ĩmwe kuuma Kiugo-inĩ kĩa Ngai. Ibungo nĩ nguhĩ nĩguo igathomerũo o mũrango-inĩ. O gĩcunjĩ kĩerekagĩria mũndũ ibuku-inĩ Bibilia Ĩrutanaga nĩguo gĩgũteithie gũcenjia wĩruti wa Bibilia kũrĩ ibuku rĩu ihinda rĩrĩa rĩagĩrĩire.

3. Rĩrĩa tũrahunjia nyũmba kwa nyũmba, tũngĩhũthĩra atĩa mũtaratara ũyũ kwambĩrĩria wĩruti wa Bibilia mũrango-inĩ?

³ Ũrĩa Ũngĩhũthĩrũo: Rĩrĩa ũkũhe mũndũ ngathĩti no ũmũũrie kĩũria gĩgũtũma agucĩrĩrio nĩ ũndũ ũrĩa ũrĩ thĩinĩ wa gĩcunjĩ kĩu. Kwa ngerekano, riuma rĩa mbere rĩraarĩrĩria bata wa Bibilia. No ũũrie ũũ: “Wee wonaga Bibilia ĩrĩ ta Kiugo kĩa Ngai kana ĩrĩ o ibuku rĩega? [Eterera acokie.] Ndĩ na kaũndũ kega mũno gakoniĩ ũhoro ũcio.” Muonie kĩũria kĩa mbere, thoma kĩbungo kĩa mbere, na ũthome rĩandĩko rĩrĩa rĩonanĩtio. Thoma kĩũria rĩngĩ na ũũrie mwene nyũmba macokio make. Wĩcirie mũigana wa ũhoro ũrĩa ũmwagĩrĩire, ũkĩhũthĩra ciũria iria cionanĩtio irĩ ta maũndũ ma kwarĩrĩrio. Ũtanamũtiga, muonie kĩũria kĩrĩa kĩrũmĩrĩire, na ũbange wega ũrĩa ũkamũcokera nĩguo mũkĩarĩrĩrie. Mũcokere rĩngĩ o kiumia nĩguo mwarĩrĩrie makĩria gĩcunjĩ kĩu o nginyagia ũkamũrehera ngathĩti ĩrĩa ĩrũmĩrĩire. Ũndũ ũngĩ nĩ kũhũthĩra njĩra ya ĩmwe kwa ĩmwe na kwambĩrĩria wĩruti wa Bibilia na mwene nyũmba. Ũcoke ũhũthĩre gĩcunjĩ kĩna kĩa ngathĩti kũmuonia ũrĩa aangĩruta Bibilia.

4. Tũngĩhũthĩra icunjĩ ici atĩa rĩrĩa tũracokera arĩa twahunjĩirie?

⁴ Ningĩ no ũhũthĩre mũtaratara ũyũ mwerũ na ũkorũo na moimĩrĩro mega kũrĩ arĩa ũtwaragĩra ngathĩti na rĩrĩa ũracokera arĩa waahunjĩirie. No uuge ũũ: “Thĩinĩ wa ngathĩti ya Mũrangĩri harĩ na ũhoro mwerũ. Reke nguonie ũrĩa ũngĩũhũthĩra.” Nĩ ihoya riitũ atĩ mũtaratara ũyũ mwerũ nĩ ũgũteithia andũ aingĩ makĩria “matũĩke a kũmenya ũhoro-wa-ma.”—1 Tim. 2:4.