Kwagagĩria Ũtungata Witũ—Gũtigĩra Andũ Ibuku rĩa Bibilia Ĩrutanaga

Ũndũ Ũcio nĩ wa Bata Nĩkĩ? Ibuku rĩa Bibilia Ĩrutanaga nĩ rĩmwe rĩa indo cia bata thĩinĩ wa gathandũkũ gaitũ ka indo cia kũrutana. O na kũrĩ ũguo, no mũhaka twambe tũtigĩre mũndũ ibuku tũtanambĩrĩria kũmũruta narĩo. Nĩ ũndũ ũcio, o ũmwe witũ agĩrĩire erutanĩrie kũgĩa na ũhoti wa gũtigĩra andũ ibuku rĩu ũtungata-inĩ. (Thim. 22:29) Kũrĩ njĩra nyingĩ cia gwĩka ũguo, na mũhunjia agĩrĩirũo kũhũthĩra njĩra ĩrĩa ekũhota.

Ũrĩa Tũngĩka:

Ũria kĩũria gĩa kũgucĩrĩria kĩrĩa ũngĩhũthĩra kwerekeria mwene nyũmba thĩinĩ wa gĩcunjĩ kĩna ibuku-inĩ rĩu. O na no ũthuure kĩũria kĩmwe harĩ iria ikoragwo kĩambĩrĩria-inĩ kĩa o gĩcunjĩ. Thutha wa kũigua macokio ma mwene nyũmba, thoma rĩandĩko rĩrĩa rĩagĩrĩire na ũcoke ũmuonie kĩbungo kĩrĩa kĩarĩrĩirie ũndũ ũcio na hihi mũkĩarĩrĩrie nake na njĩra nguhĩ.
Njĩra ĩngĩ nĩ kũhũthĩra tũratathi twa mbere twa ibuku rĩu kũgucĩrĩria mwene nyũmba na ũcoke ũmuonie harĩa rĩheanĩte macokio ma Bibilia. Kwa ngerekano, no ũgwete ũgwati mũna ũrarĩrĩirio mohoro-inĩ na ũtaarĩrie atĩ andũ aingĩ nĩ marigagwo kũrĩa mangĩona macokio ma ciũria iria irĩ karatathi-inĩ ga 3. O na no ũmwĩre atĩ ũraria na andũ ũhoro wa maũndũ mega ma ihinda rĩroka. Ũcoke ũmuonie mbica karatathi-inĩ ga 4-5 na ũmũũrie ũũ: “Harĩ maũndũ maya-rĩ, nĩ ũndũ ũrĩkũ ũngĩenda kuona ũkĩhinga?” O na hihi no ũmwĩre atĩ ũraria na andũ na njĩra nguhĩ ũkĩmateithia kuona macokio ma ciũria iria nditũ ũtũũro-inĩ. Ũcoke ũmuonie ciũria iria irĩ mũhuro wa karatathi ga 6, na ũmũũrie nĩ kĩrĩkũ angĩenda mwarĩrĩrie.
Hũthĩra njĩra ya ĩmwe kwa ĩmwe ya kwambĩrĩria kwĩruta Bibilia. No uuge ũũ: “Tũronia andũ ibuku rĩrĩ rĩa gũtũteithia kwĩruta Bibilia. Nĩ ũrĩ warĩona? [Eterera acokie.] Ũngĩhe o ndagĩka nini tu, no nguonie ũrĩa ũngĩrĩhũthĩra hamwe na Bibilia yaku.”

Geria Gwĩka ũũ Mweri-inĩ Ũyũ:

Hũthĩrai mahinda kwĩmenyeria njĩra icio hĩndĩ ya ũthathaiya wanyu wa famĩlĩ.
Hĩndĩ ĩrĩa ũrĩ ũtungata-inĩ, ĩra ahunjia arĩa angĩ njĩra ĩrĩa ũbangĩte kũhũthĩra. (Thim. 27:17) Garũrĩra njĩra ĩyo angĩkorũo ndĩrĩ na moimĩrĩro mega.