Thikĩrĩria na Wĩrute
1. Nĩkĩ kĩngĩtũma tũbatare kwĩrutanĩria makĩria nĩguo tũhote gũthikĩrĩria na kwĩruta tũrĩ kĩrũrũngano-inĩ?
1 Ihinda rĩtarĩ kũnene irũrũngano cia ngʼongo cia 2013 nĩ ikwambĩrĩria. Wĩra mũingĩ nĩ ũrutĩtwo wa kũhaarĩria programu ĩrĩa ĩrarĩrĩria mabataro ma ihinda rĩrĩ ma andũ thĩinĩ wa thĩ yothe. Hihi nĩ ũbangĩte nĩguo ũgaakorũo kuo mĩthenya yothe ĩtatũ ya kĩrũrũngano? Irũrũngano nene nĩ ikoragwo na ihĩngĩca nyingĩ, kwoguo kĩyo kĩnene nĩ kĩbataranagia nĩguo mũndũ athikĩrĩrie programu na kinyi. Tondũ tabarĩra ikoragwo irĩ ndaya gũkĩra cia mĩcemanio ya kĩũngano, mũndũ nĩ abataraga kũiga meciria make tabarĩra-inĩ kwa ihinda iraihu. Makĩria ma ũguo, rũgendo o hamwe na maũndũ mangĩ no matũme mũndũ aigue arĩ mũnogu. Nĩ maũndũ marĩkũ mangĩtũteithia gũikara twĩhaarĩirie gũthikĩrĩria na kwĩruta?—Gũcok. 31:12.
2. Tũngĩhaarĩria ngoro ciitũ atĩa nĩ ũndũ wa kĩrũrũngano?
2 Mbere ya Mũthenya wa Kĩrũrũngano: Rĩarĩro riitũ rĩa www.pr2711.com/ki, nĩ rĩonanĩtie programu ya kĩrũrũngano, ĩrĩa ĩrĩ na ciongo cia mĩario yothe na rĩandĩko rĩmwe kana merĩ ma mũthingi harĩ o mĩario. Angĩkorũo nĩ tũhũthagĩra Intaneti, kũrora maũndũ macio marĩ programu-inĩ kabere no gũtũteithie kũhaarĩria ngoro ciitũ nĩ ũndũ wa maũndũ marĩa makaarĩrĩrio. (Ezar. 7:10) Hĩndĩ ya hwaĩ-inĩ wa Ũthathaiya wa Famĩlĩ, hihi no mũcarie ihinda mwarĩrĩrie maũndũ macio nĩguo mũikare mwĩhaarĩirie nĩ ũndũ wa kĩrũrũngano kĩu?
3. Nĩ kĩĩ kĩngĩtũteithia gũthikĩrĩria na kinyi?
3 Hĩndĩ ya Programu: Kũngĩhoteka, nĩ wega gũthiĩ kahinda mbere ya tabarĩra kwambĩrĩria. Horia thimũ yaku nĩguo ndĩgakũhĩngĩce wahũũrĩrũo kana watũmĩrũo ndũmĩrĩri kana wĩcirie gũtũma ndũmĩrĩri programu ĩgĩthiĩ na mbere. Angĩkorũo to mũhaka ũhorie thimũ yaku, tigĩrĩra atĩ ndĩkũgia andũ arĩa angĩ ũngĩhũũrĩrũo. Ũngĩkorũo nĩ ũkũhũthĩra kompiuta nini hĩndĩ ya programu, mĩhũthĩre na njĩra ĩtekũhĩngĩca andũ. Ti wega kũrĩa programu ĩgĩthiĩ na mbere. (Koh. 3:1) Rora mwaria hĩndĩ ĩrĩa araruta mĩario. Rĩandĩko rĩgĩthomwo, humbũria Bibilia yaku na ũtwarane na mwaria. Andĩka maũndũ ma kũhũthĩra.
4. Aciari mangĩteithia ciana ciao atĩa ithikĩrĩrie na ciĩrute?
4 Ningĩ nĩ twendaga ciana ciitũ ithikĩrĩrie na ciĩrute. Thimo 29:15 yugaga ũũ: “Mwana wa kũrekererio nĩaconorithagia nyina.” Kwoguo, nĩ wega andũ a famĩlĩ maikare hamwe nĩguo aciari matigĩrĩre atĩ ciana ciao nĩ irathikĩrĩria programu na kinyi handũ ha kwaranĩria, kwandĩkanĩra ndũmĩrĩri, kana kũũrũra. O na akorũo ciana nĩ nini mũno ũũ atĩ itingĩhota kũnyita maũndũ mothe marĩa mararĩrĩrio, no imenyerio gũthikĩrĩria ikindĩirie.
5. Nĩkĩ nĩ harĩ bata gũcokera maũndũ marĩa tweruta kĩrũrũngano-inĩ, na tũngĩka ũguo atĩa?
5 O Mũthenya Programu Yathira: Ndũgacererũo mũno kũinũka. Koma tene nĩguo ũgĩe na ihinda rĩiganu rĩa kũhurũka. Gũcokera maũndũ marĩa ũiguire nĩ gũgũgũteithia ũmaririkanage. Nĩ ũndũ ũcio, no mũgunĩke mũno o hwaĩ-inĩ mũngĩhũthĩra ihinda inini kwarĩrĩria maũndũ marĩa moima programu-inĩ mũrĩ famĩlĩ. Mwathiĩ mũkawa-inĩ na arata-rĩ, na githĩ ti wega ũkuue maũndũ marĩa wandĩkire na mwarĩrĩrie maũndũ marĩa ũkeneire? Mwacoka mũciĩ thutha wa kĩrũrũngano, no mũhũthĩre mahinda maigana ũna hĩndĩ ya Ũthathaiya wanyu wa Famĩlĩ, kwarĩrĩria ũrĩa mũngĩhũthĩra maũndũ macio. Ningĩ no mũcarie ihinda o kiumia gũthoma gĩcunjĩ kĩna kĩa ibuku rĩerũ rĩrĩa rĩroimire kĩrũrũngano-inĩ.
6. Hihi gũkorũo kĩrũrũngano-inĩ tu nĩ kũiganu? Taarĩria.
6 Irio nduge wega itingĩguna mũndũ atangĩcirĩa na ithĩĩke. Ũguo noguo kũrĩ ũhoro-inĩ wĩgiĩ irio cia kĩĩroho iria tũheagwo kĩrũrũngano-inĩ. Rekei tũgakorũo kuo programu-inĩ yothe nĩguo tũkaagunĩka kuumana na gũthikĩrĩria na kinyi na kũhũthĩra maũndũ marĩa tũkeeruta.