“Nyũnganĩria Andũ”
1. Igomano cia thikũ ithatũ na cia kĩmabũrũri, ihaanaine atĩa na ũrĩa Aisiraeli monganire moima Misiri?
1 Kahinda kanini thutha wa Aisiraeli kuuma Misiri, Jehova nĩ aathire Musa ‘amũnganĩrie andũ’ kĩrĩma-inĩ gĩa Sinai, maigue kĩrĩra kĩa Ngai, nĩguo mamenye kũmwĩtigĩra na marute ciana ciao njĩra ciake. (Gũcok. 4:10-13) No mũhaka akorũo rĩarĩ ihinda matangĩkariganĩrũo, na rĩa gwĩkĩra wĩtĩkio wao hinya! Mĩeri ĩigana ũna yũkĩte, ndungata cia Jehova nĩ ikongana igomano-inĩ cia thikũ ithatũ na cia kĩmabũrũri, nĩguo irutwo nĩ Jehova. Tũbataire gwĩka atĩa nĩguo tũkaagunĩka biũ na igomano icio?
2. Ũngĩka atĩa nĩguo ‘ũgakorũo wĩhaarĩirie’ nĩ ũndũ wa kĩgomano?
2 ‘Ũgakorũo Wĩhaarĩirie’: Jehova aathire Aisiraeli “magakorũo mehaarĩirie” nĩ ũndũ wa kĩgomano kĩu. (Tham. 19:10, 11) Ũndũ ũmwe na ũguo, ithuothe nĩ twagĩrĩirũo twĩharĩrie wega nĩ ũndũ wa igomano icio na to arĩa tu magakorũo na icunjĩ hĩndĩ ĩyo. Nĩ wega tũkaahoya rũtha wĩra-inĩ kabere. Kwahoteka maũndũ maku makorũo mahaana ta ma Nehemia. Nĩ abataraga gũtiga wĩra kũrĩa aarutaga kwa Mũthamaki Aritashashita, nĩguo agateithie gwaka thingo cia Jerusalemu, no ndonaga ta mũthamaki ũcio angĩetĩkĩrire. Nehemia nĩ aahoire Ngai, na akĩgĩa na ũcamba wa kũhota kũhoya mũthamaki rũtha na njĩra ya gĩtĩo. Mũthamaki nĩ etĩkĩrire na makĩria nĩ aamũheire ũteithio wĩra-inĩ ũcio wa gwaka thingo. (Neh. 2:1-9) Makĩria ma kũhoya rũtha-rĩ, hihi nĩ wĩkĩte mĩbango ĩgiĩ thabarĩ na gwa gũkoma? Ũngĩbatara ũteithio, athuri a kĩũngano no makene mũno gũgũteithĩrĩria. Banga gũgaakinyaga tene o mũthenya wa kĩgomano na wĩhaarĩrie “kũrũmbũiya makĩria” ũhoro ũrĩa ũkaigua.—Ahib. 2:1.
3. Tũngĩka atĩa nĩguo tũhaarĩrie ngoro ciitũ nĩ ũndũ wa kĩgomano?
3 Ũndũ ũngĩ tũrabatara gwĩka nĩguo tũgakorũo twĩhaarĩirie gũthikĩrĩria na kwĩruta, nĩ kũhaarĩria ngoro ciitũ. (Ezar. 7:10) Programu ya kĩgomano nĩ ĩgaakorũo Rĩarĩro-inĩ rĩa jw.org, ĩrĩ na ciongo cia mĩario yothe hamwe na rĩandĩko rĩmwe kana merĩ marĩa manene ma mĩario ĩyo. Famĩlĩ no ihũthĩre programu ĩyo hĩndĩ ya Ũthathaiya wa Famĩlĩ, kũhaarĩria ngoro ciao nĩ ũndũ wa kĩgomano kĩu. Ahunjia amwe o na nĩ macabaga programu na makamĩhũthĩra kwandĩka maũndũ manene hĩndĩ ya kĩgomano.
4. Aciari mangĩhũthĩra atĩa igomano kũruta ciana ciao?
4 ‘Ũrute Ciana Ciaku’: Ũndũ ũmwe ũgwetetwo, wĩgiĩ kĩrĩa gĩatũmire Aisiraeli mongane kĩrĩma-inĩ gĩa Sinai, nĩ getha aciari “marutage ciana ciao.” (Gũcok. 4:10) Igomano iria tũkoragwo nacio ũmũthĩ, nĩ iteithagia aciari kũruta ciana ciao. Aciari magĩrĩirũo gũikarania na ciana ciao rĩrĩa kĩgomano kĩrathiĩ na mbere, nĩguo maciteithie gũthikĩrĩria na kinyi. O mũthenya wa kĩgomano wathira, na thutha-inĩ hĩndĩ ya ũthathaiya wanyu wa famĩlĩ, no mwarĩrĩrie maũndũ marĩa mwĩrutĩte.
5. Tũkagunĩka atĩa nĩ kĩgomano kĩrĩa gĩkuhĩrĩirie?
5 Kĩgomano kĩnene kĩrĩa kĩarĩ kĩrĩma-inĩ gĩa Sinai nĩ gĩateithirie Aisiraeli kuoya na ũritũ gĩtĩo kĩrĩa maarĩ nakĩo gĩa kwamũrũo matuĩke rũrĩrĩ rwa Ngai. (Gũcok. 4:7, 8) Kĩgomano kĩrĩa kĩrĩ mbere itũ nĩ gĩgatũteithia o na ithuĩ na njĩra o ta ĩyo. Tũgakorũo twehereire werũ ũyũ mũũru wa thĩ ya Shaitani mĩthenya ĩtatũ, nĩguo tũkenere gũcanjamũrũo na kũrutwo nĩ Jehova na tũkenanĩre na andũ arĩa angĩ paradiso-inĩ ya kĩĩroho. (Isa. 35:7-9) Tondũ mũthenya wa Jehova nĩ ũkuhĩrĩirie, rekei tũtigĩrĩre atĩ nĩ tuoya mweke ũcio wa gũcemania hamwe nĩguo twarahũrane!—Ahib. 10:24, 25.